Ayong Phàn Diếu Hồ, djuai ania Dao, dŏ amăng plơi Nậm Lúng, să Bản Lang, tơring glông Phong Thổ (Lai Châu) hơmâo 6 čô mơnuih, samơ̆ kơnong hơmâo 2 čô mă bruă phun, tơlơi bơwih ƀong huă amăng sang anŏ tơnap tap, sui thun kơnong gơnang nao rơbêh 5.000 met karê hmua pơdai ngă sa bơyan. Mơng rơnoh prăk djru jơlan hơdră pơđĭ kyar bơwih ƀong huă, mơnuih mơnam kual mơnuih djuai ania ƀiă hăng čư̆ siăng, dua rơkơi bơnai ñu hơmâo plih hơdai nao pla phun boh kruăi hrĕ hăng rông hơni, prăk pơhrui mơng anun jai hrơi đĭ tui. Mah aka ƀu pơdrong asah, samơ̆ dua rơkơi bơnai ñu ăt ngă hră rơkâo tơbiă mơng anăn sang anŏ ƀun rin amăng plơi pla, amăng să.

Hlâo adih sang anŏ dong anăn sang anŏ ƀun rin tui hră čih amăng să 4 thun.  Thun 2024 sang anŏ gơmơi čih hră rơkâo tơbiă mơng anăn sang anŏ ƀun rin, kiăng kơnuk kơna pioh glăi prăk djru brơi hơdôm boh sang anŏ tơnap tap pơkŏn”.

Hrŏm hăng sang anŏ ayong Phàn Diếu Hồ, ƀơi tơring čar Lai Châu hơmâo lu sang anŏ čih hră rơkâo tơbiă mơng anăn sang anŏ ƀun rin. Ră anai, pran khăp pap mơng ană plơi pla hăng hơdôm bruă djru tơdruă hơmâo lar hyu djop plơi pla kual mơnuih djuai ania ƀiă. Hơdôm boh sang anŏ anai lêng kơ pơplih tơlơi pơmĭn.

“Sang anŏ ƀu dŏ tơguăn tơlơi gum djru mơng kơnuk kơna, yua lăng glăi pơ tlôn ăt dŏ lu sang anŏ tơnap tap pơhmu hăng sang anŏ gơmơi”.

“Lơm dŏ hlăk ai, dŏ hơmâo pran, ƀing gơmơi gir run hăng kâo hơmâo čih hră tơbiă mơng anăn sang anŏ ƀun rin, kiăng kơ pioh glăi prăk djru mơng kơnuk kơna brơi hơdôm boh sang anŏ tơnap tap hloh pơhmu hăng sang anŏ gơmơi”.

Blung hlâo kơnong sa, dua boh sang anŏ amăng să Bản Lang, samơ̆ bruă čih hră rơkâo tơbiă mơng sang anŏ ƀun rin ră anai lar hyu lu să amăng tơring glông. Kar hăng să kual čư̆ siăng, giăm guai Sin Suối Hồ, anih dŏ hơdip lu hloh lĕ djuai ania Mông hăng Dao, anai lĕ kual ataih, asuek rin rơpa amăng tơring čar, samơ̆ yua kơ hơmâo tơlơi gum djru mơng gong gai ƀon lan, amăng thun 2024 hơmâo laih rơbêh 30 boh sang anŏ rơkâo tơbiă mơng anăn sang anŏ ƀun rin, ba mrô sang anŏ ƀun rin amăng să hrŏ trun dŏ rơbêh 40%. Ơi Sùng A Lùng, Kơ-iăng khua jơnum min mơnuih ƀôn sang să Sin Suối Hồ brơi thâo:

“Bruă čih hră rơkâo tơbiă mơng anăn sang anŏ ƀun rin amăng ƀon lan hơmâo lar hyu lu sang anŏ pơkŏn dong amăng plơi pla, amăng să. Mơng anai kơnuk kơna amra hơmâo dong ngăn rơnoh djru brơi hơdôm boh sang anŏ pơkŏn hăng anai lĕ tơlơi pơtrut kiăng hơdôm boh sang anŏ hơmâo pơklaih mơng ƀun rin gir run hrưn đĭ pơdrong asah”.

Tơring čar giăm guai Lai Châu lĕ anih hơmâo lu sang anŏ ƀun rin pơhmu hăng đơ đam dêh čar, hăng mrô sang anŏ ƀun rin dŏ rơbêh 20%. Hlâo anun, lu sang anŏ dŏ pơmĭn dŏ tơguăn tơlơi gum djru mơng kơnuk kơna. Yua hơmâo gưl Ping gah, gong gai hăng hơdôm khul grup pơtrut kơtang bruă pơtô pơblang, pơtrut pơsur hăng ngă tui klă hơdôm hơdră bruă pơhrŏ trun ƀun rin, yua anun mơnuih ƀôn sang glăk ƀơƀrư̆ pơplih tơlơi pơmĭn, gir run hrưn đĭ pơklaih mơng ƀun rin.

Tui jŭ yap amăng thun 2024, đơ đam tơring čar hơmâo rơbêh 4.000 boh sang anŏ tơbiă mơng ƀun rin, amăng anun hơmâo giăm 500 boh sang anŏ ngă hră pơ-ar rơkâo tơbiă mơng anăn sang anŏ ƀun rin. Tơring glông giăm guai Phong Thổ tŏ tui lĕ ƀon lan ba jơlan hlâo amăng bruă pơhrŏ trun ƀun rin hăng mrô sang anŏ rơkâo tơbiă mơng sang anŏ ƀun rin.

Yă Mai Thị Hồng Sim, kơ-iăng khua jơnum min mơnuih ƀôn sang tơring glông Phong Thổ brơi thâo, thun  2025 anai, tơring glông gir run hrŏ trun mơng 4-5% mrô sang anŏ ƀun rin, ngă mrô sang anŏ ƀun rin hrŏ trun dŏ giăm 27%.

“Kiăng pơhlôm brơi mơnuih ƀôn sang tŏ tui pơklaih mơng ƀun rin hơđong kjăp, neh met wa hơđong tơlơi hơdip mơda, tơring glông amra ngă tui hơdôm jơlan hơdră tui hơnong pơkă dêh čar, pơđĭ kyar bơwih ƀong huă mơnuih mơnam kual mơnuih djuai ania ƀiă hăng čư̆ siăng; jơlan hơdră tui hơnong pơkă dêh čar pơđĭ kyar bơwih ƀong huă mơnuih mơnam pơhrŏ trun ƀun rin hơđong kjăp hăng man pơdong plơi pla phrâo. Laih dong, tơring glông amra pơtrut kơtang hơdôm jơlan hơdră gum djru kơ hơbô̆ bruă djru bơwih ƀong, pơđĭ kyar bơwih ƀong huă brơi neh met wa”.

Bruă lu mơnuih ngă hră pơ-ar rơkâo tơbiă mơng anăn sang anŏ ƀun rin ƀu djơ̆ kơnong lĕ boh than ba glăi mơng hơdôm hơdră djru mơng gưl gong gai đôč ôh mơ̆ ăt pơdah pran gơgrong hrưn đĭ pơklaih mơng ƀun rin mơng kual čư̆ siăng. Tơlơi anai pơsit tong pran gum pơgôp, tơlơi gir run, tơlơi đăo gơnang nao kơñ pơgi hiam klă ƀiă dong mơng plơi pla ala ƀon./.