Kiăng čơkă Jơnum ruah khua mua đơ đam dêh čar tal XIV mơng Ping gah, mơng rơnuč blan 12/2025, tơring čar Khánh Hòa hơmâo pơphun pok man pơdong, mă yua 5 ring bruă, akŏ bruă pơprong. Tơlơi bơwih ƀong huă mơnuih mơnam amăng tơring čar ăt tŏ tui pơplih đĭ tui amăng thun 2025, ngă pơtrut pơplih tong ten amăng tơlơi hơdip mơda mơnuih ƀôn sang tơdơi kơ hơjan ia ling dăo. Ƀơi să Thuận Bắc, tơring čar Khánh Hòa, lu sang anŏ tŏ tui hrưn đĭ pơklaih mơng ƀun rin hơđong kjăp, gir run bơwih ƀong, pơjing tơlơi hơdip hơđong, trơi pơđao ƀiă. Yă Chamaléa Thị Điêm, djuai ania Raglay, dŏ amăng plơi Đá Mài Dưới, să Thuận Bắc brơi thâo:

“Anăp nao Jơnum tal XIV mơng Ping gah, neh met wa đăo gơnang hăng čang rơmang ƀing khua mua tŏ tui đing nao lu ƀiă dong kual mơnuih djuai ania ƀiă; pơgiong črăn hră lăi pơthâo kơđi čar tui djơ̆ hăng tơlơi sit nik, tuh pơ alin lăp djơ̆, djơ̆ anih kiăng. Mơng anun, pơtrut kơtang ƀiă dong pran gir run mă pô, gơgrong, gum pơgôp, pran hrưn đĭ mơng mơnuih ƀôn sang, kiăng mơnuih djuai ania ƀiă ƀu djơ̆ kơnong dưi pơklaih mơng ƀun rin hơđong kjăp đôč ôh mơ̆ ăt pơgôp amăng bruă pơđĭ kyar hrŏm amăng lŏn ia ta”.

Nao Jơnum ruah khua mua đơ đam dêh čar tal XIV mơng Ping gah, Ping gah tơring čar Khánh Hòa hơmâo 32 čô khua mua. Pran gơgrong mơng Khua mua hơmâo pơdah tong ten amăng bruă prap lui mut hrŏm Jơnum tal anai. Hơdôm tơlơi pơgôp hiăp mơng ƀing apăn bruă, mơnuih Ping gah hăng mơnuih ƀôn sang amăng tơring čar Khánh Hòa hăng črăn hră pơsit Jơnum hơmâo pơtum pơƀut glăi, mơ-it nao gơnong glông tañ hloh. Ƀing khua mua pioh lu mông kơsem min tong ten hơdôm črăn hră, kiăng dưi mut hrŏm pơčrông sai klă hloh. Kơ-iăng nai tha prin, nai prin tha Phan Quốc Anh, nai pơtô Sang hră gưl prong Văn Lang, Khua pơ ala tơring čar Khánh Hòa nao Jơnum tal XIV brơi thâo:

“Kâo bơtŭ ư hăng hơdôm črăn tơlơi pơtrun tal anai lơm Ping gah tŏ tui pơsit tong bruă pơđĭ kyar gru grua nao hrŏm hăng pơđĭ kyar bơwih ƀong huă. Črăn tơlơi pơtrun pơsit tong pơđĭ kyar gru grua, pơjing rơnoh yôm dêh čar, gru grua ană mơnuih hăng sang anŏ; lăng tơlơi bơwih ƀong huă lĕ phun, gru grua lĕ ngăn rơnoh phun brơi pơđĭ kyar. Hăng pran gơgrong mơng khua mua, kâo amra gir run pơgôp hiăp amăng hơdôm črăn hră pơtrun, jơlan hơdră bruă mă”.

Tui ơi Nghiêm Xuân Thành, Khua git gai Ping gah tơring čar, Khua khul pơ ala Ping gah tơring čar Khánh Hòa, rĭm čô khua mua amăng khul amra tŏ tui pran gơgrong, pơgôp hiăp hluai tui tơlơi pơƀut glăi sit nik pơđĭ kyar amăng ƀon lan hăng lŏn ia, sit biă ñu, amra đing nao hơdôm bruă mơ̆ tơring čar pơƀut glăi mơng tơlơi sit nik:

“Hăng tơring čar Khánh Hòa, tơring čar hơmâo hăng glăk kơsem min, rơkâo hơdôm tơhnal pơkă, hơdră bruă ƀu djơ̆ kơnong dŏ glăi mă yua đôč ôh mơ̆ ăt anăp nao wai lăng kual ia rơsĭ. Akŏ phun lĕ pơđĭ kyar tuai čuă ngui, bơwih bơwang, ngă hmua mă yua boh thâo ia rơgơi, sit biă ñu lĕ rông akan hơdang yua măi mok phrâo; pơđĭ kyar logistics hăng tuh tia pơkra ming ter hang ia rơsĭ. Laih dong, tơring čar amra mut hrŏm pơgôp pơgiong hơdôm tơhnal pơkă, hơdră bruă gưl dêh čar kiăng pok phư hơdôm ngăn rơnoh amăng pơđĭ kyar bơwih ƀong huă ƀơi hơdôm boh ƀon lan hơmâo tơlơi gal, mơng anun pơgôp prong amăng pơđĭ kyar hrŏm amăng dêh čar”.

Mơng tơlơi sit nik pơđĭ kyar djop mơta mơng ƀon lan, sit biă ñu lĕ hơdôm boh than amăng hơkrŭ glăi bơwih ƀong huă-mơnuih mơnam, bơwih brơi tơlơi hơdip mơnuih ƀôn sang hăng anăp nao pơđĭ kyar hơđong kjăp bơwih ƀong huă kual ia rơsĭ, ƀing khua mua tơring čar Khánh Hòa čang rơmang amra pơgôp sit nik amăng bruă pơgiong hơdôm hơdră bruă yôm phun mơng Jơnum. Hơdôm tơlơi pơgôp lăp djơ̆, glăm ba anun ƀu djơ̆ kơnong pơdah pran dăo gơnang mơng ƀing apăn bruă, mơnuih Ping gah hăng mơnuih ƀôn sang Khánh Hòa amăng tơlơi truh kih mơng Jơnum tal XIV đôč ôh mơ̆ ăt pơsit tong tơlơi gir run gum hrŏm đơ đam dêh čar ngă tui tơlơi gơgrong pơđĭ kyar tañ, hơđong kjăp, pơjing lŏn ia pơdrong sah, yâo mơ-ak amăng rơwang phrâo./.