Plơi Ka Líp hăng kual pơlir plơi pla Kai Ya, Ya Mâu, să Phan Sơn, tơring čar Lâm Đồng hơmâo abih tih rơbêh 700 boh sang anŏ hăng giăm 3.000 čô mơnuih, lu hloh lĕ mơnuih djuai ania K’ho, Raglai, Chăm, Nùng. Amăng hrơi blan rơgao, mơnuih ƀôn sang amăng să gir run mut hrŏm hơdôm tal pơphun “Abih bang mơnuih gum pơgôp man pơdong plơi pla phrâo, plơi prong hiam klă”. Mơng akŏ thun truh ră anai, djop sang anŏ amăng kual pơlir djop plơi pla hơmâo pơgôp rơbêh 180 hrơi djru bư̆ bơnư̆, hyu bruăi rơmet čroh ia, pơkra ming jơlan glông djru brơi bruă bơwih ƀong huă; rơmet pơagaih jum dar, duñ pơƀut asuk ruk hăng rơmet jơlan glông amăng plơi pla hơmâo pơphun na nao; rơbêh 550 boh sang anŏ jing sang anŏ ba gru hiam (truh rơbêh 90%)…

Phrâo anai, neh met wa hơmâo pơphun truh kih hrơi gum pơgôp djop djuai ania, ngă pơtrut pơsur kiăng gum tơngan hrŏm pơjing tơlơi hơdip trơi pơđao. Tơlơi kơđŏm glăi mơng hrơi ngui anai lĕ hơdôm bruă ngui adôh suang, bơrơguăt drơi jăn hăng pơplông tơnă hơbai pơdah gru grua mơng djuai ania K’ho, Raglai ƀơi anai. Amai Đặng Thị Thái Thuận, djuai ania Chăm, dŏ amăng kual Ya Mâu, să Phan Sơn hok mơ-ak brơi thâo, ñu mut hrŏm djop tơlơi ngui ngor anun lĕ adăt kơsăk, hơdui hrĕ, gôm mơta taih un lŏn, samơ̆ mơ-ak hloh lĕ tơlơi pơplông tơnă hơbai, yua grup gơñu dưi mă pri prong hloh.

“Hrơi ngui ngor gum pơgôp anai mơ-ak biă mă, neh met wa mơng djop kual pơtum pơƀut mut hrŏm hơdôm tơlơi ngui ngor ngă kjăp tui pran khăp pap amăng plơi pla. Ƀuh abih bang mơnuih hlơi hlơi lêng kơ hur har, hok mơ-ak mut hrŏm. Grup gơmơi dưi mă pri prong hloh tơlơi pơplông tơnă hơbai, bơ tơlơi pơplông dŏ glăi lêng kơ hơmâo pri pơsur pran”.

Ƀrô tal anai, mơnuih ƀôn sang kual plơi pla Ka Líp, Kai Ya, Ya Mâu hơmâo gir run mut hrŏm pơgôp hiăp kiăng pơjing kual plơi pla jai hrơi pơđĭ kyar. Ơi Mang Ngọc Văn, mơnuih arăng đăo gơnang brơi thâo, hrơi ngui thun anai pơphun amăng hrơi mông đơ đam dêh čar glăk pok pơhai gong gai ƀon lan 2 gưl. Hlâo anun, să Phan Sơn hăng Phan Lâm hơđăp lĕ dua boh să phara, ră anai pơmut hrŏm jing sa, mơng anun truh rơnuč thun ăt dŏ lu bruă kiăng ngă, yua anun, neh met wa ƀơi hơdôm kual plơi pla kiăng gum pơgôp, ha pran hrŏm hăng gong gai ƀon lan.

“Gong gai ƀon lan glăk pok pơhai ha wŏt lu bruă mă yua anun neh met wa kiăng gum tơngan hrŏm. Ƀing ta glăk pơjing tơlơi hơdip gru grua phrâo amăng kual plơi pla yua anun kiăng lui hĭ hơdôm tơlơi phiăn ƀu klă hiam; kiăng pơkrem amăng hơdôm hrơi pơphun mơyut jôk, pơdô̆ rơkơi bơnai, kiăng pơkrem wŏt prăk kak hăng hrơi mông, ngă tui anun ƀing ta kah mơng pơđĭ kyar”.

Ơi Mai Hồng Đăng, Khua Jơnum min mơnuih ƀôn sang să Phan Sơn, tơring čar Lâm Đồng brơi thâo, pơ anăp anai, să tŏ tui pơtrut kơtang, hrưn đĭ klă tơlơi pơphun “Abih bang mơnuih ƀôn sang gum pơgôp man pơdong plơi pla phrâo, plơi prong hiam klă”, pơlir hăng bruă ngă tui hơdôm hơnong pơkă pơđĭ kyar bơwih ƀong-mơnuih mơnam amăng ƀon lam. Amăng anun, kiăng đing nao pơđĭ kyar bơwih ƀong huă amăng sang anŏ, pơplih hơdai nao hơdôm hơbô̆ bruă bơwih ƀong lăp djơ̆, hrưn đĭ prăk pơhrui hăng pơhrŏ trun ƀun rin hơđong kjăp. Ƀon lan ăt glăk hơmâo jơlan gah lăp djơ̆ brơi pơđĭ kyar sĭ mơdrô, tuai čuă ngui.

“Să dong amăng ară jơlan mrô 28B, ară jơlan glông 37 km, amăng hrơi blan pơ anăp ăt amra kơsem min hơdôm tơlơi pơkă kiăng pơtrut kơtang sĭ mơdrô rôk tui jơlan anai hăng amăng ƀon lan ăt hơmâo dơnao ia krông Lũy prong hăng lăng hiam biă mă, anai ăt lĕ sa amăng hơdôm anih pơhưč tuai čuă ngui tơdah ƀing ta tŏ tui tŭ mă hơdôm tơlơi dưi, tơlơi gal”.

Tơring čar Lâm Đồng tơdơi kơ pơmut hrŏm jing tơring čar hơmâo kual lŏn mơnai prong hloh đơ đam dêh čar, hăng 49 djuai ania dŏ hơdip hrŏm, găn rơgao mơng kual Dap kơdư truh pơ hơdôm boh să ter hang ia rơsĭ, hơmâo lu tơlơi phiăn, gru grua yôm phara mơng djop djuai ania./.