Hơdôm hrơi anai, Khul tơhan 34 (Ding jum ling tơhan) glăk pơphun man pơdong 100 boh sang kơ hơdôm boh sang anŏ ƀơi Gia Lai hăng Dak Lăk rơngiă pưk sang amăng tal hơjan ia dăo phrâo rơgao, amăng anun 70 boh sang ƀơi Gia Lai hăng 30 boh sang ƀơi Dak Lăk.

Tơdơi kơ hơmâo tơlơi pơtrun, rơbêh 600 čô khua, ling tơhan hrŏm hăng rơdêh, măi mok ječ ameč nao mă bruă laih, jao mơnuih ngă bruă ƀơi rim kual phara, ngă hrŏm hăng gong gai, sang anŏ đah mơ̆ng tañ nao sem lăng, čih pơkra hơdră man pơdong hăng man pơdong, ngă djơ̆ boh thâo ia rơgơi, rơnuk rơnua hăng ngă giong tui hrơi pơkă; Đại tá Phạm Hồng Sơn, Kơ-iăng khua ping gah Sang hră ling tơhan Khul tơhan 34 brơi thâo, abih bang ling tơhan, wơ̆t hăng ơi ia jrao mơ̆ng anom bruă, leng kơ hơmâo pơkiăo nao djru lăng ba tơlơi suaih pral kơ ling tơhan hăng djru ngă bruă tŭ yua. Khul tơhan 34 hơmâo jao ngă giong bruă man pơdong sang hlâo kơ lơ 20/1/2026, djru mơnuih ƀôn sang tañ hơđong glăi tơlơi hơdip hăng hmao čơkă Tê̆t amăng sang dŏ phrâo.