Rơnuč mông mă bruă či tlam lơ 16/10, ƀơi Đà Nẵng, Khua dêh čar ơi Phạm Minh Chính nao jơnum hrŏm hơdor glăi 80 thun hrơi gru grua ling tơhan blah ngă kual 5 lơ 16/10/1945-lơ 16/10/2025) laih anun čơkă mă Miđai Hồ Chí Minh. Kual 5 lĕ tơring lŏn “Mơguah pơgăn rơbŭ kơthel mơ̆ng ngŏ, či tlam pơgăn pơ-iă kơtang pơčrang kah hăng apui”; hơmâo anih dŏ yom biă mă amăng bruă pơgang lŏn ia yua ling tơhan pô gơgrong phun.

Hơdôm thun laih rơgao, ling tơhan blah ngă kual 5 hơmâo ngă giong bruă jao tŭ yua hiam klă hloh, ngă giong djop bruă jao phun, man pơdong kual pioh pơhlom pơgang lir hơbit kơjăp tong ten, hơđong na nao; laih dơ̆ng jing tơhan blah ngă phun djru hrŏm pơgang tơlơi truh lŏn adai ngă, klin kheng; djru mơnuih ƀôn sang pơđĭ kyar bơwih ƀong huă, lui rơmŏn kŏn rin….Pơ ala kơ ping gah hăng kơnuk kơna, Khua dêh čar ơi Phạm Minh Chính hơmâo jao Miđai djă anăn Hồ Chí Minh kơ tơhan blah ngă kual 5-jing gơnam apah bơni yom čih pioh bruă mă, pran jua hơmâo pơyơr đĭ laih anun gru grua hing ang mơ̆ng tơhan kual 5 laih anun djă kơjăp gru grua anun, gir run hloh, mă bruă ba glăi boh tŭ yua lu, djru hrŏm prong hloh amăng bruă man pơdong lŏn ia hăng pơgang dêh čar. 

Ƀrô djơ̆ tal anai, Khua dêh čar ơi Phạm Minh Chính nao jơnum hăng git gai mông jơnum pơphun man pơdong sang hră đôm lăm, sang hră dŏ glăi yang hrơi dơ̆ng gưl sa hăng gưl dua ƀơi să Tây Giang, ƀôn prong Đà Nẵng. Rơnoh prăk tuh pơ alin kơ ring bruă anai rơbêh 260 klai, him lăng ngă giong amăng plah wah thun pơ anăp.