Lu tơring čar ƀôn prong hơmâo ngă bruă klă, prăp rơmet hlâo, pơčeh phrâo, iâu pơthưr lu mơnuih khul grup djru ba dong, jing hơmâo mrô dưi ngă lu biă, hăng rơgao kơ tơlơi čang rơmang. Anai jing tơlơi pơhing hơmâo ơi Đỗ Văn Chiến, Khua Jơnum min djŏp djuai ania mơnuih mơnam Việt Nam brơi thâo ƀơi mông jơnum lơ 9/7.

Kơnuk kơna hăng hơdôm khul grup tuh pơ alin rơbêh 17.800 klai prăk, iâu pơthưr rơbêh 100 rơbâo wơ̆t mơnuih gum djru sang anŏ rin man pơkra sang dŏ. Hơmâo laih 18 boh tơring ngă giong jơlan hơdră anai. Dŏ glăi 16 boh tơring amra ngă giong amăng blan 8 pơ anăp či čơkă hrơi Akŏ pơdong Kơnuk kơna lŏn ia lơ 2/9 hăng Hrơi ngă hơkrŭ blan čơpăn truh kih. Ơi Đỗ Văn Chiến pơsit, bruă lŏm lui sang dŏ tơ̆i, sang phô̆ hơmâo bang hyu lu khul grup, mơnuih mă bruă mơ̆ng Jơnum min djŏp djuai ania gum ngă, pơtrut pran kơtang, djru kiăng hơmâo lu mơnuih gum djru ba hơdôm boh sang anŏ tơnap./.