Jơlan hơdră hơdor tơngiă, bơkơtuai hăng ƀing ling tơhan hơđăp rơkă ruă kơtang amăng đơ đam dêh čar hmâo anăn “Bơngač apui mơng hơtai bôh”, hmâo tơlơi gum hrŏm mơ̆ng 100 čô mơnuih pơ ala lĕ ling tơhan rơka ruă kơtang, 50 čô mơnuih apăn bruă, ƀing ơi, nai ia jrao mơng 14 bôh anom wai lăng, pơjrao brơi ling tơhan rơka ruă amăng đơ đam dêh čar hăng giăm truh 600 čô mơnuih hlăk ai, čơđai gưl dlông amăng Plơi prong jưh jom Hà Nội. Ƀing mơnuih pơ ala dưi hmư̆ ƀing ling tơhan rơka ruă bơkơtuai, lăi pơthâo kơ hơdôm pran jua tuh rơyuh, rơngiă ngom hăng bruă dưi ngă mơ̆ ƀing ling tơhan rơka ruă hmâo hăng glăk găn rơgao. Rơgao tơlơi ruai mơ̆ng gơñu, tơlơi hơdip blah ngă, hơdôm bruă mă hăng hơdôm tơlơi rơngiă ngom, rơka ruă kah hăng hmâo pơdah glăi kiăng rim mơnuih lăng, biă ñu ƀing čơđai gưl dlông ƀuh bruă blah ayăt hur har, pran gơgrong ăt kah hăng hơdôm pran jua tuh rơyuh mơ̆ng ƀing ling tơhan rơka ruă lăi ha jăn hăng rơnuk nao hlâo lăi hrŏm. Adơi Lê Thảo Đan, čơđai gưl dlông Sang hră Đại học pơtô bruă bơwih ƀong dêh čar ta lăi pơthâo:

 “Lơm dưi gum hrŏm jơlan hơdră, hmâo hmư̆ ƀing ling tơhan rơka ruă lăi pơthâo sa rơnuk blah ayăt, kâo ƀuh tơlơi pơsăn drơi prong prin mơ̆ng ƀing wa, pioh pran jua hlăk ai mơ̆ng pô kiăng ƀing gơmơi hmâo kah hăng hrơi anai. Drơi pô kâo amra gir run hrăm hră kiăng djru ngă brơi lŏn ia pơđĭ kyar hloh dong, lăp djơ̆ hăng hơdôm pran jua tuh rơyuh mơ̆ng rơnuk nao hlâo”. 

Anăp nao tal hơdor glăi 69 thun hrơi pơklaih rơngai plơi prong jưh jom. Khul pơlir hơbit đah kơmơi ƀôn prong Hà Nội pơphun hrơi jơnum tum pơƀut hăng anăn “Đah kơmơi plơi prong jưh jom pơphun mă bruă pơčeh phrâo” thun 2023. Hrơi tum pơƀut lĕ hrơi mông kiăng pơsur pran jua pơphun mă bruă hăng pơplih pơčeh phrâo mơng đah kơmơi ƀôn prong Hà Nội, ngă gêh gal brơi ƀing mơnuih wai lăng, abom bơwih ƀong sĭ mơdrô hăng djop khul grup djru pơphun mă bruă pơbưp nao rai, pơlăi nao rai tơlơi găn rơgao, pơhrăm nao rai hăng pơlir hơbit, ngă hrŏm pơđĭ kyar. Khul pơlir hơbit đah kơmơi ƀôn prong Hà Nội hơmâo pơpŭ lăng yôm 10 tơlơi pơčeh, gơnam pơkra mă. Ăt amăng hrơi pơbưp anai mơn, ƀing adơi amai hơmâo tơnă hơbai lu gơnam ƀong mơng ƀon lan. Amai Phạm Thị Tư Hậu, pô sang pơkra gơnam ƀong Yến Anh Food brơi thâo:

“Ba Vì plơi pla kâo lĕ kual lŏn kơčong čư̆, mơnuih ƀon sang juăt pla lu phun plum mơ̆ sĭ mơdrô ƀu hơđong ôh. Sĭ brơi arăng lêng kơ trun nua, yua anun kâo pơčeh pơkra mă rơbêh 10 gơnam ƀong mơng hơbơi plum anun lĕ: ƀañ hơbơi plum om ia boh đung, ƀañ hơbơi plum om phomai, ƀañ hơbơi plum om sầu riêng, hơbơi plum hơ-uh hăng hla pơdai điô̆, hơbơi plum dim café…anom pơkra ră anai dưi ba hyu sĭ mơdrô amăng đơ đam dêh čar hăng sa, dua boh dêh čar anun lĕ Lao, Kur".

Čơkă mơ-ak hơdor glăi 69 thun Hrơi tlaih rơngai plơi prong jưh jom. Ƀơi Hà Nội hmâo pơphun laih bruă pơdă prưng rŭp hăng anăn ñu “Ngă tui phiăn, bruă gơgrong, ngă bruă, pơčeh phrâo, pơđĭ kyar”. Bruă pơdă prưng thun anai pơdă prưng 260 pok rup kah hăng hơdôm gơnam kač pha ra: kač, pik, trah trel, dưi hmâo Khul wai lăng bôh thâo ruah mă mơ̆ng 365 mơta rŭp mơ̆ng ƀing kač rŭp. Amăng anun, hmâo 229 mơta rup kač, pik hăng 31 mơta rup trah trel. Tui tơlơi pơsit mơ̆ng ƀing kač rup kơhnâo, anô̆ pha ra rơđah mơ̆ng bruă pơdă prưng rup Plơi prong jưh jom thun anai lĕ tơhnal hreč bruă jai hrơi jai prong. Anun lĕ hơdră pơdah hơdôm mơta rŭp tơnap hăng tơlơi tuh pơplai tơpă mơ̆ng mơnuih kač rŭp. Bruă pơdă prưng pok tơbiă tơhnal gal bơkơtuai hrăm tui kơ ƀing kač rŭp. Anai ăt lĕ tal pioh ƀing kač rŭp Plơi prong jưh jom gum hrŏm pơkĕ nao rai, anăp nao tơhnal pơkă pơđĭ kyar kơjăp phik bruă kač rup Plơi prong jưh jom pơgi kơdih anai. Pô trah trel rup Nguyễn Xuân Thủy – Khua Khul kač rup Hà Nội brơi thâo:

 “Bruă pơdă prưng anai hmâo gru klă biă lĕ bơni ană mơnuih Hà Nội, anih anom hăng bôh thâo Hà Nội. Hluai tui bruă pơdă prưng anai, ƀing thâo kač rup kiăng lăi pơthâo kơ mơnuih hor kơ rup kač Plơi prong jưh jom tơlơi pơhing lĕ Bôh thâo Hà Nội pơđĭ kyar na nao, hơdôm akô̆ bruă dưi pơpŭ na nao ăt kah hăng dưi tŭ mă hăng ngă tui phiăn juăt klă hiam mơ̆ng mơnuih Hà Nội, phiăn juăt pơdŏng hăng pơgang Plơi prong jưh jom ăt kah hăng bôh thâo mơnuih Hà Nội lăi hrŏm”.

./.