VOV4.Jarai-Ƀrô hơdor glăi tal 92 thun Hrơi akŏ pơjing Khul pơlir hơbit đah kơmơi ƀudah juăt lăi khul đah kơmơi mut phung Việt Nam, mơmŏt lơ 18/10, ƀơi Hà Nội, Khul đah kơmơi mut phung Việt Nam pơphun Hơdră adoh suang anăn “Anŏ hiam hloh ao dai Việt”. Nao jơnum hrom, hơmâo yă Đặng Thị Ngọc Thịnh, Kơ-iăng Khua hơđăp mir sir dêh čar ta. Amăng hơdră anai, ƀing kơhnâo adoh suang, pơdah ngă sen Việt Nam hơmâo lir hơbit hăng bruă pơdah gru ao dai hiam mơ̆ng pô pơkra Đỗ Trịnh Hoài Nam hăng lu mơnuih tơčoh ao dai đah kơmơi tui hăng 3 akŏ bruă :

Pơdah gru hiam ao dai amăng hơdră mlam adoh suang

Phun akha-Hà Nội đưm hlâo; Anŏ hiam hloh hăng Mut phung. Anai lĕ hơdôm ao dai mă gru ngă rup hăng pơdah tơlơi adoh suang, ngă sen kiăng pơpŭ kơ đah kơmơi Việt Nam hăng pơdah gru ao dai hiam anŏ phara hơjăn tơlơi khăp kiăng hăng ao dai. Hơdră adoh suang ngă sen kiăng rŭ glăi pran jua tơlơi khăp, tơlơi pơ-ư ang hăng gơgrong djă pioh, pơđĭ tui rơnoh yôm ao dai hăng lăi pơthâo rup rap ao dai, ană mơnuih Việt Nam hăng mơnuih ƀôn sang ta laih anun gơyut gơyâo jar kmar.

Lơ 18/10, Khul pơlir hơbit đah kơmơi tơring čar Kontum pơphun khul pơlir hơbit bruă mă hăng hơdôm bruă mă tŭ yua hơdor glăi 92 thun Hrơi pioh kơ đah kơmơi Việt Nam. Ƀuh rơđah hloh lĕ Jơlan hơdră Amĭ gum ba – Tô nao rai kiăng khăp; Bơkơtuai tơlơi ƀu kah pha bơnai hăng rơkơi; Hrơi đah kơmơi pơphun bruă thun 2022 hăng Klah čun bruă pơplông đah kơmơi pơphun bruă; Bơkơtuai gum hrom hơdră bruă hăng pơphun bruă bơkơtưn “Pơdŏng khul đah kơmơi Việt Nam rơnuk phrâo”.

Khua Khul pơlir hơbit đah kơmơi tơring čar Kontum ƀơk gơnam kơ amĭ gum ba hăng čơđai muai drit druai

Kơnong kơ jơlan hơdră Amĭ gum ba – Tô nao rai kiăng khăp, hơdôm gưl khul pơsur ngăn rơnoh gum tơngan hrom djru čơđai muai drit druai hmâo tơlơi hơdip tơnap hăng abih bang prăk rơbêh kơ 2 klai prăk. Tal anai Khul pơlir hơbit đah kơmơi tơring čar Kontum ƀơk pri kơ 10/23 tơlơi pơmin pơphun bruă bơwih ƀong sĭ mơdrô hăng pơphun bruă rơwang 2021-2025; Pơkôl djru 22 tơlơi pơmin pơphun bruă mơng adơi amai mơng ngăn rơnoh čan mă kơmlai ƀiă mơng Sang prăk gah Hơdră bruă mơnuih mơnam hăng abih bang rơbêh kơ 5 klai prăk./.

VOV Tây Nguyên/Nay Jek/Siu H’ Prăk pơblang