Tơdơi giăm hmâo sa blan gum hrŏm anih pơtô luai brơi đôč hmâo pok ƀơi să, lu čơđai sang hră ƀơi 2 bôh să Čư̆ Mgar hăng Quảng Hiệp, tơring glông Čư̆ Mgar, tơring čar Dak Lak thâo laih luai ia hăng thâo hơdră pơsir lom hmâo tơlơi truh ia ƀlung. Adơi H’ Niêm Niê, ƀơi ƀuôn Kna B, să Čư̆ Mgar, tơring glông Čư̆ Mgar lăi pơthâo:

“Kâo hăng ƀing gơyut kâo ƀu thâo luai hăng ƀing gơmơi hor hrăm luai biă kiăng pơgang pơgăn ia ƀlung lơm găn ia krông, čroh hnoh. Anih hrăm anai djru ƀing gơmơi thâo luai hăng pơgang pơgăn ia ƀlung".

 Adơi Phan Hoàng Quý Phước, ƀơi să Quảng Hiệp, tơring glông Čư̆ Mgar ruai glăi:

 “Sang kâo ataih đơi anun kiăng nao pơ̆ anih pơ̆kon pioh hrăm ƀu gal ôh. Ƀing neh met hmâo ba dơnao ia luai rai pơ̆ anai, gơnang kơ anun kâo thâo luai hăng ƀu dô̆ huĭ ia kah hăng hlâo adih dong tah”.

Hơdôm anih pơtô luai brơi đôč ƀơi 2 bôh să Čư̆ Mgar hăng Quảng Hiệp hăng anăn iâo “anih luai djă hyu truh pơ̆ ƀuôn” lĕ bruă mă yua kơ khul Yua kơ čơđai muai kiăng khăp tơring glông Čư̆ Mgar gum hrom hăng hơdôm bôh anom bơwih ƀong hăng mơnuih thâo tơngiao pok pơhai amăng bơyan pơdơi prong thun anai. Bruă mă anai hmâo čơkă laih tơlơi gum djru, gum hrŏm mơ̆ng lu nai pơtô hăng mơnuih ƀôn sang ƀơi să. Ayong Hà Mạnh Tuấn, nai pơtô ƀơi Sang hră gưl 2 Ngô Mây, să Ea Mdroh lăi pơthâo:

  “Gum hrom hăng nai Chuyền pơtô luai kơ ƀing čơđai amăng tal pơdơi prong kiăng ƀing čơđai ƀơi să pô dưi hrăm đôč ƀu rơngiă prăk”.

 Yă Hồ Thị Nhâm ƀơi să Čư̆ Mgar, tơring glông Čư̆ Mgar, tơring čar Dak Lak lăi pơthâo tơlơi mơ-ak lơm gum hrŏm djru ƀing čơđai hrăm luai:

 “Kâo djru anih pioh luai, djru prăk apui kơ ƀing čơđai pioh djru gơñu hmâo anih hrăm, mưn ƀuh djru bôh tŭ yua lĕ pô djru”.

Ayong Mai Văn Chuyền, nai pơtô Sang hră gưl 2 Ngô Mây, Khua Khul Yua kơ ƀing čơđai kiăng khăp tơring glông Čư̆ Mgar brơi thâo, tơlơi dô̆ pơmin kơ lu čơđai ƀơi kual ataih, asuek hmâo ia ƀlung, amăng 3 thun rơgao, khul hmâo iâo pơthưr mơnuih mơnam, ƀing thâo tơngia gum hrŏm djru prăk pơkra anih pioh luai ba hyu hăng pok hơdôm anih pơtô luai brơi đôč truh tơl hơdôm bôh să. Truh ră anai, khul hmâo prăp brơi laih 3 bôh anih luai ia ƀơi 2 bôh tơring glông Čư̆ Mgar hăng Krông Bông. Amăng tal pơdơi prong, anih luai ia djă hyu hmâo pơplih nao rai ba truh pơ̆ hơdôm bôh să kiăng pơphun brơi kơ ƀing čơđai hrăm luai. Amăng 3 thun rơgao, hmâo laih giăm truh 600 čô čơđai dưi hrăm đôč ƀu rơngiă prăk amăng tal bơyan pơdơi prong.

Hrŏm hăng anun, lơm pơphun thun hrăm, khul gum hrŏm hăng hơdôm bôh sang hră pơphun hơdôm mông pơhrăm, pơtô brơi čơđai bôh thâo pơgang pơgăn ia ƀlung. Ăt tui hăng ayong Mai Văn Chuyền, ră anai khul glăk pok prong dong mơnuih hăng anih anom pơhrăm, pơkĕ hăng pơphun pơhrăm brơi kơ nai pơtô, Khua gơgrong grŭp ƀơi hơdôm bôh sang hră kiăng gơñu hmâo dong bôh thâo, gơgrong hlâo hloh amăng bruă lăi pơhing hyu, pơtô brơi čơđai. Hrŏm hăng anun, Khul pơsur dong ngăn rơnoh pioh brơi kơ hơdôm khul pơkă hơdră, gơnam mă yua djru bruă pơhrăm ƀơi hơdôm bôh sang hră.

“Ăt tơlơi čang rơmang djru ƀing čơđai thâo dong hơdôm hơdră bôh thâo hăng tơlơi thâo thăi kiăng pơgang pơgăn ia ƀlung ba glăi bôh tơhnal. Kâo ăt čang rơmang mơn pơ̆ anăp anai gong gai să, hơdôm khul grŭp, ƀing amĭ ama čơđai amra đing nao lu hloh dong tơlơi pơgang bĕ rơka ruă, ia ƀlung kơ ƀing čơđai, hăng čang rơmang amra hmâo lu hloh dong tơlơi gum tơngan hrŏm mơng hơdôm bôh anom bơwih ƀong, khul grŭp, hơdôm mơnuih thâo tơngia, biă ñu hơdôm grŭp gơnong bruă abih bang khul ƀơi să kiăng dưi pơphun hơdôm anih pơtô luai kơ ƀing čơđai ƀơi hơdôm anih anom kual asuek, ataih”.

Tơring čar Dak Lak ba tơbiă tơhnal pơkă truh thun 2025 abih bang čơđai amăng hnưr thun gưl sa, gưl 2 dưi prăp brơi kơ bôh thâo kơ pơgang drơi pô huĭ hmâo tơlơi truh, rơka ruă; 50% thâo anô̆ pơhlôm amăng ia. Kiăng dưi ngă tui tơhnal ba tơbiă anai, tơlơi gum tơngan hrŏm, gum pran jua mơ̆ng hơdôm mơnuih, khul grŭp hăng ƀing thâo tơngia amăng bruă pok hơdôm anih pơtô luai lĕ kiăng biă mă. Biă ñu hăng hơdôm anih anom kual asuek, ataih, kual tơnap tap, hơdôm anih pơtô luai brơi đôč amra djru brơi lu čơđai anet hmâo tơlơi gal hrăm luai, prăp brơi kơ pô bôh thâo, pơhlôm pơgang bĕ ia ƀlung./.