Amăng hơdôm thun rơgao, tơring čar Gia Lai, hrŏm hăng bruă jao prap wai pơgang rơnuk rơñua hăng pơđĭ kyar bơwih ƀong huă gah ling tơhan, hơdôm khul ling tơhan hơmâo pok pơhai lu hơbô̆ bruă rơgơi pơtô ba mơnuih ƀôn sang, djru găn rơgao tơnap tap, djru mơnuih ƀôn sang hơđong bơwih ƀong huă, kiăng hrưn đĭ klă dong tơlơi hơdip mơda. Ngă tui hơbô̆ bruă “Rĭm rơwang hrơi tơjuh djru brơi sa boh sang anŏ ƀun rin”, mơng thun 2023 truh ră anai, anom bruă git gai tơhan wai pơgang guai tơring čar Gia Lai hơmâo djru brơi 750 boh sang anŏ ƀun rin, giăm ƀun rin hăng sang anŏ tui hơdră djru; jak iâu pơgôp rơbêh 810 klăk prăk, 1,7 tơ̆n braih, 47 boh rơdêh yua mă bruă hrŏm hăng giăm 3.000 hrơi mă bruă djru pơkra ming sang dŏ.

Thun 2024, hơbô̆ bruă hơmâo anom pơtô bruă Ping gah gơnong glông pơpŭ lĕ sa amăng 7 hơbô̆ bruă “Rơgơi pơtô ba mơnuih ƀôn sang” ba gru đơ đam dêh čar. Đại tá Khuất Bá Cao, Khua git gai Ping gah, kơ-iăng khua anom bruă git gai tơhan Binh đoàn 15 brơi thâo; hăng jơlan gah “djru bơwih ƀong, bơngač pran đăo gơnang”, kơnong thun 2024, Binh đoàn hơmâo pơgiong 23 ring bruă hrŏm hăng giăm 45 km jơlan rơđah bơngač, 1.500 gong truă apui kơđen, abih tih prăk tuh pơ alin 4 klai prăk; thun 2025 him lăng pok pơhai dong 13 ring bruă, nua ñu rơbêh 3 klai prăk.