Tui hăng tơlơi lăi pơthâo nai pơtô Lê Văn Lâm, pơtô ƀơi sang hră gưl dua tơring kual Đak Hà, tơring glông Đak Hà, tơring čar Kon Tum, lơ 5/10, phrâo anai, hơmâo sa grup mơnuih lăi ƀing tơhan kông an ĕp kơđi tơlơi soh mơ̆ng anom bruă kông an tơring čar Kon Tum hăng Ding jum kông an, pơhiăp telephôn, lăi pơthâo pô nai anai hơmâo anăn pơdjơ̆ nao kơđi tơlơi soh arăng sĭ blơi ma túy. Kiăng huăi bơbeč djơ̆ kơ sang anŏ hăng sem lăng tong ten huăi hơmâo tơlơi soh, khom ngă tui tơlơi ƀing tơhan anai pơtô brơi, nai Lâm khom čan 1 klai 100 klăk prăk mơ-it amăng mrô djă prăk amăng sang bruă prăk laih anun rơngiă abih rơnoh prăk anun. Nai pơtô Nguyễn Văn Hiền, Khua sang hră gưl dua tơring kual Đak Hà anih nai Lê Văn Lâm pơtô brơi thâo:

“Lơ̆m nai Lâm lăi pơthâo hăng kâo Khua sang hră, kâo hlong pơtum bruă juh alum, pơtă pơtăn nai Lâm, brơi nai lăi pơthâo kông an tơring glông mơtam. Gah gơmơi lĕ, kâo lăi pơthâo khul ngă bruă ping gah, jơnum min mơnuih ƀôn sang tơring kual. Mơguah anun mơtam nai Lâm nao truh pơ kông an tơring čar lăi pơthâo”.

Hrŏm hăng nai Lê Văn Lâm, dŏ ƀơi tơring kual Đak Hà, tơring glông Đak Hà, nai pơtô Hồ Thị Thu Sương, sang hră gưl klâo Trần Quốc Tuấn phrâo rơngiă 270 klăk prăk yua lê̆ tơlơi arăng plư amăng plăng internet. Tơlơi pơhaih mơ̆ng nai Sương brơi ƀuh, lơ 9/10 phrâo rơgao, ñu čih anăn ngă hrŏm hơdră ruah brơi kơ mơnuih kơhnăk adoh. Tui hăng pơtăn mơ̆ng ƀing dăp hơdră, pô čih anăn ngă hrŏm pơgôp prăk truh 100 klăk. Hơmâo mông ƀing dăp hơdră tui plang internet rơkâo brơi mơ-it prăk truh 220 klăk, hnun kah dưi mă glăi rơnoh prăk 100 klăk mơ-it hlâo kơ anun. Lơ̆m anun sư̆ rơbư̆, hlăk hning rơngôt, anun nai Hồ Thị Thu Sương hyu čan 170 klăk prăk mơ-it kơ hơdră anun laih anun kah thâo lê̆ tơlơi arăng plư laih.

Tơlơi mơ̆ ƀing nai đah rơkơi nai đah kơmơi dŏ ƀơi tơring glông Đak Hà, tơring čar Kon Tum lê̆ luh arăng plư amăng plang internet, ƀu kơnong răm ƀăm kơ prăk kăk tơlơi bơwih ƀong huă đôč ôh, dŏ ngă kơ anih sang hră gơñu pơtô, khom glăm ba bruă ngă hơduah ĕp kơđi tơlơi soh. Nai Mai Xuân Kiên, Khua sang hră gưl klâo Trần Quốc Tuấn lăi:

“Tơdơi kơ ƀuh nai anun hơmâo tơlơi djơh hăng anai khua mua sang hră khom tơña sem lăng kiăng thâo tơlơi pơhing, brơi mơnuih amăng grup mung phung Cong đoàn ƀơi sang hră nao juh alum tơña bla nai Sương, wơ̆t mơmŏt mlam pơ sang anŏ kiăng kơ ñu anăm hyu pơmin tă tăn, ngă glăi kơ drơi jăn pô. Pơtă kơ ñu, nao pơ sang bruă hơmâo tơlơi dưi hăng djru hrŏm khua mua sang hră ăt pơtô lăi, juh alum kiăng ñu hơđong pran jua”.

Kơ phun ñu hơmâo lu nai pơtô amăng tơring glông lê̆ luh tơlơi arăng plư amăng plang internet, yă Lê Thị Nhung, Khua anom pơtô hăng pơjuăt tơring glông Đak Hà, tơring čar Kon Tum, brơi thâo hăng lu tơlơi ñu hơmâo ba truh:

“Mah hơmâo lăi lui hlâo laih mơ̆ng lu sang bruă kơnuk kơna pơtrun, biă mă ñu sang bruă tơhan kông an ăt pơthâo brơi laih mơ̆n. Samơ̆ ăt dŏ hơmâo ƀing nai pơtô hrăm hră lê̆ luh arăng plư. Ƀing nai aka ƀu thâo tong ten mơ̆n ƀing anun kiăng hơgĕt? Dua lĕ ƀing gơñu hơmâo prăk pioh yua kơ bruă hơgĕt thơ, ƀuh tơlơi plư tuh pơ alin nao amăng anun hơmâo kơmlai lu. Klâo lĕ tơlơi arăng plư, gơñu tơblŭt laih anun, khom tui hăng tơlơi ƀing plư anun pơtô laih anun mơ-it prăk kiăng tañ mă glăi prăk”.