Kiah mut thun hrăm phrâo, ƀing nai pơtô hăng 930 čô čơđai sang hră gưl sa Quang Trung, plơi prong Kon Tum, tơring čar Kon Tum, rim mơguah pioh 10 mơnit či lăng rup arăng pơdah thâo tơlơi pơhing mơ̆ng djop sang hră hơmâo tơlơi truh kual ia ling dăo  ngă ƀơi djop tơring čar, plơi prong gah kơdư dêh čar ta adih.

“Hrơi anai, nai neh hăng ƀing ană amôn čơđai sang hră dŏ lăng črăn phim, rup pơdah thâo ber kơ tơlơi pơhing mơnuih ƀôn sang pơ kual gah kơdư hlăk răm ƀăm yua lŏn adai ngă ia ling dăo, kiăng ƀuh anŏ răm ƀăm, rơngiă rơngiom tơnap tap mơ̆ng mơnuih ƀôn sang pơ kual gah kơdư”.

Amôn Nguyễn Hữu Bảo Anh, čơđai sang hră anih 4A, brơi thâo:

“Tơdơi kơ lăng phim tơlơi pơhing anun pap biă mă ană plơi pla pơ kual gah Kơdư dêh čar ta adih, gơñu bưp tơlơi tơnap tap ư̆ rơpa, rơ-ot găng mă laih anun ƀuh mơnuih djuai ania ta ia kor, ia pơđuăi pap đơi. Kâo čang rơmang kơthel anai tañ abih, tơlơi hơdip mơda mơnuih ƀôn sang pơ kual gah kơdư tañ hơđong glăi”.

Ƀơi anăp kơ tơlơi rơngiă rơngiom, ruă nuă gleh glar mơ̆ng mơnuih ƀôn sang kual ia ling dăo, khua mua sang hră gưl sa Quang Trung hơmâo pơphun jak iâu pơčru gơnam hăng hơmâo lu čơđai sang hră ăt kah hăng amĭ ama čơđai sang hră djru hrŏm hur har biă ba gơnam pơčruh pioh mơ-it nao. Pơkă mă pô hruh hră mơ-it juăt bì thư pơkra mơ̆ng hơdrôm hră čih ngă rup hơtai boh laih anun čih boh hră tui anai “Mơ-it nao kơ kual gah Kơdư” amăng anun dưm 200.000 prăk, adơi Đỗ Hồng Anh, hrăm anih 3 C lăi tui anai:

“Prăk anai lĕ, prăk sang bruă ama kâo brơi kơ ƀing gơmơi mơak Tết trung thu blan bơrơmia ria samơ̆ kâo ƀuh lu gơyut pơ kual Kơdư adih ia ling dăo ngă tơnap hloh anun kâo pơjing hruh angvalôp anai dưm prăk pioh mơ-it kơ hrŏm. Kâo čang rơmang kual Kơdư amra hiam glăi laih anun ia ling dăo huăi sui hrơi dơ̆ng tah”.

Kơnong ha mơguah jơnum jak iâu, Sang hră gưl sa Quang Trung, plơi prong Kon Tum, tơring čar Kon Tum, hơmâo pơčruh giăm 25 klăk prăk; 114 kơthung mì tôm, ia mơñum; 20 kơthung ia tơsâo dưm amăng ƀuăt; ƀañ kĕo; 8 blah ao pông kơsung pơgang ƀlung ia; hơmâo 400 per sum ao hăng lu gơnam kiăng yua ječ ameč pơkŏn laih anun ia jrao gun. Nai neh Đậu Thị Lan, Khua sang hră gưl sa Quang Trung brơi thâo, abih tih rơnoh prăk hrŏm hăng gơnam yua mơ̆ ƀing čơđai sang hră hăng amĭ ama čơđai sang hră pơčruh, ƀing khua mua sang hră mơ-it nao tañ truh pơ kual ia ling dăo. Ăt tui hăng nai Đậu Thị Lan mơ̆n, tơlơi lăp pơpŭ pơyôm lĕ, kơnang kơ bruă ngă djơh hăng anai, ƀing ană amôn čơđai sang hră dưi pơtô hrăm kơ tơlơi khăp pap, pran jua klă, thâo kah pơpha, pơdjru nao rai mơnuih ƀôn sang ta bưp tơlơi tơnap tap truh:

“Ƀơi anăp kơ tơlơi pơhing ia ling dăo ngă ƀơi kual Kơdư, mông anai mơnuih ƀôn sang ta hlăk tŭ tơlơi tơnap tap, bruă pơtô hrăm kơ čơđai muai hơmâo pran jua thâo khăp pap, tơlơi djru ba laih anun kah pơpha gơnam yôm biă mă. Ƀing gơñu mưn amăng pran jua thâo ƀuh tơlơi khăp pap laih anun thâo pơdjru ba ƀiă gơnam tam, pran jua kiăng mơ-it nao pơ kual Kơdư adoh hăng gơnam tam brơi lăng yôm pơphăn biă mă. Sang hră ƀuh bruă ngă anun ăt mơak hrŏm dlưh pran jua yua ƀing amĭ ama čơđai hăng ƀing čơđai pô hai thâo hluh tong ten kơ pran jua tơlơi khăp pap”.

Ƀơi plơi prong Ƀuôn Ma Thuôt, tơring čar Dak Lak lĕ ăt hlăk hơmâo lu bruă mă hiam mơak amăng bơyan Blan bơrơmi ria thun anai, kah hăng, pơdă rup mơak “Apui kơđen diăn tŭi bơngač tơlơi čang rơmang” mơ̆ng 63 boh tơring čar, ƀôn prong; ba yua hăng jao “Anih pơđok hră, jĕ giăm nao rai grup čơđai sang hră mut phung”, pơplông dăp hăng pŭ gơnam ƀong huă, ngui ngor mơak Blan bơrơmi ria, pơhrôp apui kơđen diăn; djă apui kơđen diăn, suang rup rơmung dul. Adơi H’Kim Anh Niê, hrăm anih 5 C, sang hră Lê Lợi, dŏ ƀơi tơring glông Ea Kar, tơring čar Dak Lak lăi:

“Hrơi anai kâo dưi mut hrŏm ngui ngor hăng lu hơdră, kâo ƀuh mơak biă mă yua hơmâo ngă hrŏm hơdră ngui ngor prong kah hăng anai. Tlam mơmŏt anai, kâo tŭ mă lu gơnam arăng ƀơk pơpha hăng prăk hrăm hră, bơni kơ ƀing nai pơtô gơmơi hơmâo djru ba ƀing gơyut sang anŏ tơnap tap. Kâo ƀuăn amra hrăm hră sir run hloh kiăng thâo”.

Amai Nguyễn Phạm Duy Trang, Khua apăn bruă sang bruă khul tơdăm dra mut phung dêh čar, Khua grup čơđai sang hră mut phung brơi thâo, hrŏm hăng tơring čar Dak Lak, amăng bơyan mơak Blan bơrơmi ria thun anai, Sang bruă tơdăm dra mut phung dêh čar amra jao brơi 15.000 mơta gơnam gơnam hăng 330 anung prăk apah čơđai hrăm hră rơgơi hăng ngă lu bruă hiam tŭ yua; jao brơi 4 blah tơdron ngui ngor kơ čơđai muai ƀơi tơring čar Gia Lai, Dak Nông, Lạng Sơn hăng Cao Bằng. Djru prăk mơta hăng gơnam yua rim hrơi kơ čơđai muai ƀơi 15 boh tơring čar, ƀôn prong hlăk bơbeč djơ̆ kơthel mrô 3 kơthel Yagi. Rơnoh prăk abih tih lĕ 13 klai.

“Ngă tui tơlơi jak iâu mơ̆ng Khul apăn bruă git gai tơdăm dra mut phung dêh čar, djop gưl anom bruă tơdăm dra mut phung, biă mă ñu grup čơđai sang hră, čơđai muai amăng dêh čar ăt gum hrŏm ngă tui tơlơi khăp pap, djru, kah pơpha hăng čơđai muai pơ kual Kơdư. Hơdôm gơnam djru anai ƀu kơnong ba glăi tơlơi mơak, pơtrut pơsur pran jua ƀing čơđai ƀu tơphă tơphai đôč ôh, dŏ pơtô pơhrăm tơlơi thâo khăp pap, pran jua thâo djru mơ̆ng čơđai hăng bruă mơnuih mơnam”.

Ƀơi mlam ngui ngor, čơkă mơak blan bơrơmi ria, ƀing čơđai anet hơmâo lăng arăng pơdah suang rup ania čơgrai hăng rup rơmung dul laih anun lăng adoh suang amăng mlam Blan bơrơmi ria, pơtruh nao rai hăng hơdôm tơring čar, ƀôn prong kah hăng Hải Phòng, Lâm Đồng, Bình Dương, Tiền Giang hăng ƀôn prong Hồ Chí Minh. Khul khua mua pơphun bruă ngui ngor anai hơmâo ƀơk 1.700 anung gơnam, prăk hrăm hră, rơdêh tang rơwang hăng ƀañ Blan bơrơmi ria brơi kơ čơđai muai ƀun rin ƀơi Dak Lak.

Pơhiăp ƀơi mông pơdah ngui ngor, Kơ-iăng Khua dêh čar ơi Nguyễn Hòa Bình bơni biă mă kơ ƀing ană amôn čơđai muai yua hrăm thâo, ngă bruă hiam, pơhrăm pran jua, drơi jăn hrưn đĭ amăng tơlơi hơdip mơda. Čang rơmang ƀing ană amôn djă pioh na nao gru grua hiam mơ̆ng đưm čơđai muai Việt Nam ta.

“Kâo čang rơmang rim čô ană amôn mơak soh amăng mông čơkă Blan bơrơmi ria khăp pap hăng ƀu-eng, ăt khom ngă tui klă 5 mơta tơlơi Wa Hô pơtô, thâo pơpŭ kơ ơi yă amĭ ama, luă gŭ kơ nai neh pơtô hrăm hră, luă gŭ kơ mơnuih prong, thâo gum pơgôp, kah pơpha, pơdjru nao rai tơdruă gơyut gơyâo sang anŏ tơnap tap, biă mă ñu ƀing gơyut hlăk dŏ amăng anih răm ƀăm kơthel ia ling dăo ngă, kiăng abih bang gir run hrăm hrăm, nao sang hră triăng hloh; gir run hrăm thâo laih anun pơhrăm drơi jăn pran jua kiăng tơdơi anai jing mơnuih hiam klă ngă pô man pơdong lŏn ia dêh čar jai hrơi pơdrong sah, hiam klă rơgơi kơhnâo”.