Khua git gai ping gah ơi Tô Lâm hăng Khua dêh čar ơi Phạm Minh Chính nao jơnum hrŏm sang hră đôm lăm dua gưl, gưl sa hăng gưl dua Đồng Đăng, să Đồng Đăng, tơring čar Lạng Sơn. Jơnum pơphun sa amăng plĕ ăt pơtruh nao rai lăng amăng tivi hăng 17 bit anih phun hăng 104 bih anih pơƀuh ƀô̆ mơta amăng đơ đam dêh čar.

Pơhiăp đĭ ƀơi mông jơnum pơphun man pơdong, Khua git gai ping gah ơi Tô Lâm lăi pơtong, amăng rơnuk phrâo ngă tui bruă hơkrŭ, Ping gah, Kơnuk kơna đing nao biă mă, tuh pơ alin kơ bruă pơđĭ kyar pơtô hrăm ƀơi kual giăm guai. Ding jum kơđi čar hơmâo pơtrun hiăp brơi man pơdong 248 boh sang hră đôm lăm dua gưl ƀơi 248 boh să gah kơdư hang guai dêh čar. Anai lĕ sa jơlan hơdră prong, djơ̆ lăp, yom pơphăn mơ̆ng ping gah, kơnuk kơna pioh kơ mơnuih ƀôn sang dŏ ƀơi giăm guai dêh čar, kual ataih, asuek, lu tơlơi tơnap tap.

Khua git gai ping gah ơi Tô Lâm, pơtrun hiăp djop anom bruă ping gah, gong gai kơnuk kơna khom ngă bruă khut khăt hloh, ĕp lăng re se, krăp lăng tong ten, pơtrut ngă bruă djơ̆ hrơi blan pơkă, giong bruă jao, ră anai ring bruă man pơdong sang hră kiăng ngă tui hmar, kơjăp, tŭ yua hloh, hmao hăng thun hrăm phrâo 2027-2028. Hrŏm hăng anun, anom bruă pơtô hrăm man pơdong sang hră lir hơbit hăng bruă ngă tui anŏ pơblih phrâo, hlom bom, djop djel. Hrŏm hăng anun, pơtô boh hră, ăt kiăng đing nao pơtô pơhrăm ană mơnuih, thâo pơmin, khin hơtai, pran jua tơpă kiăng čơđai sang hră hur har hrưn đĭ laih anun pơ-ư ang kơ gru grua djuai ania, plơi pla ta pô.