Pơphun amăng 3 hrơi, amăng jơnum anai, Jơnum min apăn bruă Khua pơ ala mơnuih ƀôn sang dêh čar sem lăng, pơgôp hiăp hơdôm boh tơhnal yôm phăn. Kơ bruă čih pơkra tơlơi phiăn, amăng jơum lok 28, jơnum min apăn bruă Khua pơ ala mơnuih ƀôn sang dêh čar  pơgôp hiăp kơ črăn tơlơi phiăn duh prăk ƀom kiơng; sem lăng, tŭ yap mă yua tơlơi pơtrun kơ bruă lăi pơthâo amăng jơnum Khul djuai ania, jơnum min mơng Ƀirô Khua pơ ala mơnuih ƀôn sang dêh čar; sem lăng, rơkâo pơhrua sa, dua črăn tơlơi phăn amăng Jơlan hơdră čih pơkra tơlơi phiăn, tơlơi pơsit thun 2024…

Kơ bruă krăo lăng, Jơnum min apăn bruă Khua pơ ala mơnuih ƀôn sang dêh čar sem lăng hră lăi pơthâo kơ bruă pơtô ba mơnuih ƀon sang mơng Ƀirô Khua pơ ala mơnuih ƀôn sang dêh čar blan 10 hăng blan 11/2023; laih dong, Jơnum min apăn bruă Khua pơ ala mơnuih ƀôn sang dêh čar sem lăng 2 boh tơhnal: bruă pơhrua, pơplih pơkra akŏ bruă tuh pơ alin ngăn drăp kơnuk kơna thun 2023 kơplah wah djop ding jum, anom bruă gơnong glông hăng ƀon lan; bruă jao akŏ bruă mă yua prăk kak amăng jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam, pơplih pơkra, pơhrua akŏ bruă tuh pơ alin man pơdong gap ƀrô mơng ngăn drăp kơnuk kơna rơwang thun 2021-2025 mơng ding jum, anom bruă gơnong glông hăng ƀon lan.