Mơng čuah hang ia rơsĭ kret kruai, anih pioh hơdor tơhan Gạc Ma ră anai jing “Anih mriah” pơtô pơjuăt gru grua hăng pơtrut pran khăp kơ lŏn ia brơi djop rơnuk. Rĭm thun, hơdôm hơpluh rơbâo wŏt mơnuih ƀôn sang, ƀing apăn bruă, ling tơhan, ƀing hlăk ai hăng tuai čuă ngui mơng djop kual đơ đam dêh čar nao tŭi ñang hơ-ŭ hơdor ƀing tơhan rơbuh trun amăng tal blah wang Gạc Ma thun 1988, kiăng wai pơgang bul pơtâo plao ia rơsĭ hing ang mơng lŏn ia ta. Amai Nguyễn Thị Thanh Hà, mơnuih mă bruă ƀơi anih pioh hơdor tơhan Gạc Ma brơi thâo, hơdôm hrơi blan tlâo, pơlir hăng gru grua đưm hlâo, hơmâo lu mơnuih rai tŭi ñang, hơ-ŭ hơdor tơhan djai pơsăn drơi, pơdah pran hơdor tơngia mơng djop rơnuk ră anai hăng ƀing tơhan rơbuh trun yua kơ bul pơtâo plao ia rơsĭ lŏn ia ta.

“Kual anai hlâo adih lĕ bul čuah hơbôr đôč, kyâo pơtâo ăt aka ƀu hơmâo. Tơdơi anai, ƀing gơmơi hơmâo pla lu phun kyâo mơtah mơda kiăng ngă hơ-ui. Truh ră anai hơmâo bluh đĭ hiam, jum dar hơ-ui rơ-ơ̆ ƀiă mơn. Tuai rai čuă ngui jai lu samơ̆ ăt pơpha pơplih nao rai yua anun huăi ngă kơniă.”

Ƀơi anai, rĭm ară ñang hơmâo tŭi kar hăng sa tơlơi hơdor tơngia mơ-it nao ană tơčô lŏn ia Việt Nam đih glăi amăng kual ia rơsĭ. Sui mơng anai 38 thun, amăng lơ 14/3/1988, ƀơi hơdôm bul pơtâo Gạc Ma, Cô Lin hăng Len Đao dong amăng bul pơtâo Trường Sa, tơring čar Khánh Hòa, ƀing apăn bruă, ling tơhan sơlup Việt Nam hơmâo pơphun blah kơdong ayăt wai pơgang lŏn ia.

Ră anai, pran jua sông kơtang anun tŏ tui pioh glăi hăng ngă lar hyu mơng hơdôm tal glăi ĕp lăng anih pioh hơdor tơhan Gạc Ma. Ayong Trần Đăng Đức, mơnuih ƀôn sang ƀơi bul pơtâo Cam Ranh, tơring čar Khánh Hoà brơi thâo:

“Anai lĕ gru grua hiam mơng kông ti. Rĭm thun ƀing gơmơi ăt nao rơkâo kiăng kơ iâu lăi, tŭi ñang hơ-ŭ hơdor ƀing tơhan dêh čar anai djai pơsăn drơi jăn. Mơng anun pơdah pran hơdor tơngia hăng čang rơmang lŏn ia ta lêng kơ rơnuk rơnua, pơđĭ kyar, sit biă ñu ƀơi kual bul pơtâo hăng tơdron rơdêh por.”

Tơlơi pioh kơđŏm glăi mơng Gạc Ma ăt lĕ tơlơi pơ-ư ang mơng lu sang anŏ hơmâo mơnuih rơbuh trun amăng bul pơtâo plao ia rơsĭ. Bruă pơsăn drơi mơng ling tơhan ƀu djơ̆ kơnong hơmâo čih kơđŏm glăi amăng gru grua đôč ôh mơ̆ ăt jing tơlơi pơtrut kiăng djop rơnuk ră anai tŏ tui kru anong met wa, wai pơgang lŏn ia, kual ia rơsĭ dêh čar ta.

Hăng ƀing ană tơčô tơhan djai pơsăn drơi ƀơi Gạc Ma, tơlơi pioh kơđŏm glăi mơng anong met wa ƀu djơ̆ kơnong lĕ tơlơi bơră ruai gru grua đôč ôh mơ̆ ăt lĕ tơlơi pơ-ư ang hăng tơlơi glăm ba tŏ tui gru grua. Lu mơnuih ruah tui jơlan mut ngă tơhan, tŏ tui tuh rơyuh pran jua hlăk ai kơ bruă wai pơgang bul pơtâo plao ia rơsĭ. Amai Trần Thị Thủy, mơnuih glăk mă bruă ƀơi Lữ đoàn 146-Trường Sa, ană đah kơmơi tơhan djai pơsăn drơi Trần Văn Phương brơi thâo:

“Rơnuk hlăk ai kơ ama lĕ hrŏm hăng ƀing gŏp tuh drah pơčah asar ƀơi kual ia rơsĭ wai pơgang lŏn ia, wai pơgang rĭm kual lŏn hing ang mơng dêh čar Việt Nam. Kâo pô ăt glăk thun hlăk ai, pran jua dŏ hur har, yua anun čang rơmang dưi tuh rơyuh pran jua brơi kơ bruă wai pơgang lŏn ia hăng bul pơtâo plao ia rơsĭ”.

Ƀu djơ̆ kơnong lĕ anih pioh hơdor tơhan djai pơsăn drơi, anih pioh hơdor tơhan Gạc Ma ăt lĕ anih pơtô pơhrăm gru grua brơi djop anih anom ling tơhan, sit biă ñu lĕ ƀing apăn bruă, ling tơhan hlăk ai. Lu anih anom gah tơhan sơlup Việt Nam juăt pơphun brơi tơhan nao tŭi ñang, čuă lăng, pel ĕp gru grua kiăng pơtrut pran pơ-ư ang hăng pran gơgrong wai pơgang bul pơtâo plao ia rơsĭ. Hluai tui hơdôm bruă anai, rĭm čô mơnuih apăn bruă, ling tơhan hluh rơđah dong anŏ yôm mơng rơnuk rơnua, mơng anun tŏ tui gru grua sông kơtang, gir run pơhrăm klă, prap blah ngă, khut khăt tui jơlan wai pơgang bul pơtâo plao ia rơsĭ hing ang mơng lŏn ia ta. Trung tá Dương Trọng Hà, Khua khul hlăk ai Trung đoàn 196 brơi thâo:

“Tŭi ñang, hơ-ŭ hơdor, čuă lăng, pơtô pơblang ƀơi anih pioh hơ-ŭ hơdor lĕ bruă mă tui tơđar mơng Trung đoàn 196. Sit biă ñu lĕ hăng ƀing ling tơhan phrâo glăk pơ anom bruă, ƀing gơñu amra hluh rơđah gru grua mơng ling tơhan, Quân chủng hăng ƀing tơhan ba gru sông kơtang, tơhan djai pơsăn drơi amăng rơnuk blah wang. Pơhlôm brơi ƀing apăn bruă, ling tơhan kjăp bruă kơđi čar, tơlơi pơmĭn, pran pơ-ư ang hăng gir run kiăng găn rơgao tơnap tap”.

Tlâo hơpluh thun rơgao laih, samơ̆ tơlơi ƀuăn wai pơgang bul pơtâo đưm hlâo ăt dŏ hmư̆ tơ-ua bang amăng kual ia rơsĭ. Mơng anih pioh hơdor tơhan Gạc Ma ră anai, pran jua anun tŏ tui hơmâo pơtô brơi djop rơnuk, kiăng ling tơhan wai pơgang kual ia rơsĭ djă kjăp phao kơtuang, wai pơgang bul pơtâo plao ia rơsĭ hing ang kơ lŏn ia ta./.