Ƀirô Khua pơ ala mơnuih ƀon sang dêh čar lĕ anih hơdôm bruă amăng tơlơi hơdip mơda hơmâo lăi pơthâo, pơčrông sai hăng čih pơkra jing hơdră bruă, tơlơi phiăn. Samơ̆ ăt ƀu dŏ glăi ƀơi sang jơnum đôč ôh. Bruă mơnuih ƀôn sang ruah khua đing nao biă lĕ hơdôm hơdră bruă anun dưi ba pơmut amăng tơlơi hơdip, pơsir hĭ tơlơi tơnap tap hăng ba glăi hơdôm tơlơi pơplih tong ten hă ƀŭ.

Tơlơi anai hơmâo pơdah tong ten amăng jơnum ƀu tui tơđar lok I, Khua pơ ala mơnuih ƀon sang dêh čar tal XVI phrâo pơđut hĭ tơdơi kơ 17 hrơi mă bruă, Ƀing Khua pơ ala mơnuih ƀon sang hơmâo tŭ yap mă yua 15 tơlơi phiăn hăng tơlơi pơtrun djơ̆ tơlơi phiăn, pơgôp hiăp blung a hăng 7 črăn tơlơi phiăn hăng pơsit mă yua 7 tơlơi pơtrun yôm phăn, kiăng pơsir hĭ hơdôm bruă phrâo ƀuh mơng tơlơi sit nik, pơsir hĭ tơlơi gun, ngă gêh gal ƀiă brơi mơnuih ƀôn sang, anom bơwih ƀong sĭ mơdrô.

Sit biă ñu, amăng jơnum hơmâo 2.680 tơlơi pơgôp hiăp pơčrông sai ƀơi grup hăng 535 tơlơi pơgôp hiăp amăng sang jơnum. Hơdôm mrô anai brơi ƀuh, bruă jơnum pơƀut ƀu pơčlah hăng tơlơi hơdip mơda, mơ̆ anih pơtum pơƀut, pơčrông sai hăng lăi pơthâo hơdôm bruă glăk ƀuh mơng tơlơi sit nik.

Mơng tơlơi lăng nao anun, tơlơi rô nao rai kơplah wah Khua pơ ala mơnuih ƀon sang dêh čar hăng mơnuih ƀôn sang ƀu djơ̆ kơnong lĕ ƀơi mông pơbưp, đing tơngia hmư̆ hlâo hăng tơdơi kơ mông jơnum. Anai ăt lĕ bruă mă tŏ tui na nao: mơnuih ƀôn sang ruah khua lăi pơthâo tơlơi tơnap tap, gun găn; Khua pơ ala mơnuih ƀon sang ba boh pơhiăp anun lăi pơthâo amăng mông jơnum khua mua; Khua pơ ala mơnuih ƀon sang dêh čar amra čih pơkra jing tơlơi phiăn, tơlơi pơtrun; tơdơi anun hơdôm anom bruă kơnuk kơna pơphun ngă tui hăng mơnuih ƀôn sang tŏ tui krăo lăng, lăi glăi. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong: “Tơlơi truh kih mơng mông jơnum tŏ tui pơdah tong ten lơm ngă djơ̆ “tơlơi pơtrun mơng Ping gah djơ̆ pran mơnuih ƀôn sang”, gum hrŏm sit nik, gir run ngă klă bruă kơđi čar mơng Ƀirô Khua pơ ala mơnuih ƀon sang dêh čar, Kơnuk kơna, hơdôm anom bruă, gong gai bơdjơ̆ nao amăng gơgrong pơsir hĭ hơdôm bruă phrâo ƀuh sit nik, anăm brơi kaih, ngă pơčlah, hăng pran jua: lơm lăi amra ngă, ngă mơtăm, ngă djơ̆, ngă ba glăi tŭ yua”.

Tơlơi pơsit anai ăt ba glăi tơlơi rơkâo hăng ƀing Khua pơ ala mơnuih ƀon sang dêh čar: ƀu djơ̆ kơnong đing tơngia hmư̆ mơnuih ƀôn sang ruah khua đôč ôh ăt kiăng kiăo tui ngă pơgiong hơdôm bruă mơnuih ƀôn sang ruah kha rơkâo. Yua sa hơdră bruă lăp djơ̆ jing yôm lơm mơnuih ƀôn sang ƀuh boh tŭ yua ba glăi amăng tơlơi hơdip mơda. Yua anun, Khua git gai pơ ala mơnuih ƀôn sang dêh čar rơkâo hơdôm grup khua mua, ƀing Khua pơ ala mơnuih ƀon sang kiăo tui lăng, hmao tlôn rơkâo hơdôm tơlơi gun, anŏ aka ƀu klă mơng tơlơi sit nik. Laih dong, hơdôm anom bruă ngă tui kiăng gơgrong, anăm dŏ tơguăn, ƀu gưt ngă, anăm brơi mơnuih ƀôn sang hăng anom bơwih ƀong sĭ mơdrô dŏ tơguăn.

Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, lŏn ia ta glăk yak nao rơwang “pơtrut tañ, pơplih kơtang”, hơdôm tơlơi pơtrun hơmâo tŭ yap mă yua amăng jơnum anai lĕ ngă atur yôm phăn kiăng Kơnuk kơna, djop ding jum, gơnong bruă, ƀon lan pok pơhai bruă jao mơng hơdôm blan rơnuč thun 2026, gir run pơgiong hơnong pơkă pơđĭ kyar 2 mrô hăng hơdôm hơnong pơkă pơđĭ kyar rơwang thun 2026-2030.

Ta ăt dưi lăi, mơng sang jơnum truh pơ tơlơi hơdip lĕ bruă mă mơng dua bơnah. Mơnuih ƀôn sang mơ-it nao boh pơhiăp mơng ƀing gơñu tơl Khua pơ ala mơnuih ƀon sang dêh čar; Khua pơ ala mơnuih ƀon sang pơjing hơdôm tơlơi rơkâo anun jing hơdră bruă; hăng tơlơi hơdip sit nik lĕ anih pơƀuh brơi tong ten hơdră bruă anun dưi ngă klă hă ƀŭ. Lơm bruă ngă tui hruaih, tơlơi rô nao rai kơplah wah Khua pơ ala mơnuih ƀon sang dêh čar hăng mơnuih ƀôn sang ruah khua amra ƀu dŏ glăi ƀơi ƀing pơ ala, mơ̆ jing tơlơi gum hrŏm, krăo lăng hăng pơgôp kiăng pơđĭ kyar./.