Hơmâo prap brơi măi mok, lu sang anŏ ngă hmua ƀơi Lào Cai hơmâo gơgrong lăi pơthâo gơnam tam ƀơi đang hmua mơtăm. Kơnong ha mông livestream, mơnuih blơi yua djop anih dưi kiăo tui lăng bruă pla pơjing, rơkâo blơi hăng đang hơmâo mơnuih rơkâo nao ĕp lăng kơ bruă ngă hmua. Amai Lù Minh Tình, pô hmua pla boh kruăi wuyt ƀơi să Mường Khương brơi thâo:

“Lơm ƀing gơmơi ba pơdah amăng tiktok hơmâo lu mơnuih hlâo anun hơmâo rai tơl đang hmua gơmơi hăng lăi glăi lĕ nua wĕ mut nao đang hmua 30 rơbâo hăng dưi ƀong hlao boh kruăi wuyt pơ hmua mơtăm, bơ tơdah blơi boh kruăi wuyt glăi 20 rơbâo sa kĭ. Blung blung a lơm truh bơyan pĕ pơhrui, sang anŏ gơmơi dưi sĭ giăm 3 tơ̆n boh kruăi wuyt”.

Tơlơi anai brơi ƀuh, plang internet glăk djru brơi gơnam đang hmua kual čư̆ siăng Lào Cai jê̆ giăm hăng mơnuih blơi. Ƀu djơ̆ kơnong boh kruăi wuyt, lu gơnam đang hmua yôm phara anun lĕ če, pơtơi, sa nhân, braih Séng Cù…ăt hơmâo ba sĭ amăng plang internet, dưi pơƀuh nao rai ƀơi anăp kơplah wah mơnuih pla hăng mơnuih blơi yua. Ơi Phạm Đức Trung, kơ-iăng Khua Jơnum min mơnuih ƀôn sang să Mường Khương brơi thâo:

“Ƀing gơmơi ăy hơmâo pok plang pơlir nao rai kiăng sĭ mơdrô gơnam hăng pơtô brơi mơnuih ƀôn sang mă yua plang mơnuih mơnam. Blung hlâo hơdôm gơnam anai kơnong sĭ brơi ƀing tuai jum dar Lào Cai đôč samơ̆ ră anai dưi sĭ pơ Hà Nộị, Hải Phòng…Mơnuih ƀôn sang lêng kơ hơmâo măi telephôn rơgơi yua anun bruă yua plang mơnuih mơnam ăt lêng kơ thâo soh”.

Ngă tui jơlan hơdră tui hơnong pơkă dêh čar mrô 1719, Lào Cai hơmâo pok pơhai ha amăng plĕ jơlan hơdră djru pơtop hrăm boh thâo phrâo, hrăm wai lăng anom bơwih ƀong hrŏm, djru čan prăk mă kmlai ƀiă, čih anăn pô pơkra pơjing rai gơnam tam, lăi pơthâo gơnam đang hmua ƀon lan…Truh ră anai, lu gơnam đang hmua ƀon lan dưi găn rơgao čư̆ pơtâo, plơi pla, ba nao sĭ pơ lu anih ƀiă dong. Ơi Dương Tuấn Nghĩa, kơ-iăng Khua gơnong bruă gru grua, bơrơguăt drơi jăn hăng tuai čuă ngui tơring čar Lào Cai lăi:

“Neh met wa mă yua boh thâo phrâo tañ biă mă, hơmâo lu web, tiktok, facebook dưi mă yua klă hloh. Tơlơi anai hơmâo tơlơi gum djru mơng hơdôm gơnong bruă, sang bruă, anun lĕ gơnong bruă yua boh thâo măi mok, gơnong bruă gru grua, tuai čuă ngui. Ƀing gơmơi ăt mă yua boh thâo phrâo, sit biă ñu ba bruă pơplih mrô amăng mơnuih mơnam, sit biă ñu lĕ ƀing hlăk ai”.

Mơng đang hmua truh pơ plang internet lĕ tơlơi yak nao pơplih kơtang hloh amăng tơlơi pơmĭn bơwih ƀong huă, sĭ mơdrô mơng mơnuih ngă hmua kual čư̆ siăng Lào Cai. Lơm hơmâo tơlơi djru ba lăp djơ̆, neh met wa dưi gơgrong ngă pô amăng yua plang internet, ba gơnam sĭ mơdrô lu anih dong. Pơplih mrô-glăk jing tơlơi pok rai pơđĭ kyar hơđong kjăp brơi bruă ngă hmua amăng ƀon lan./.