Kah hăng Gong phun jua pơhiăp dêh čar Việt Nam hmâo pôr pơhing mơguah tom brơi, 25/7, ƀơi Sang rông Thống Nhất (ƀôn prong Hồ Chí Minh) hăng plơi pla ƀơi plơi Lại Đà, să Đông Hội, tơring glông Đông Anh (ƀôn prong Hà Nội), Grŭp mă bruă Ping gah dêh čar ta, Khua pơ ala mơnuih ƀôn sang dêh čar, Khua mir sir dêh čar, Gong gai dêh čar, Jơnum min djop djuai ania mơnuih mơnam dêh čar Việt Nam hăng sang anô̆ pơphun mông jôk atâo rơgom ơi Nguyễn Phú Trọng Khua git gai Ping gah dêh čar Việt Nam tui phiăn pioh atâo gah dêh car.

Mông jôk atâo rơgom ơi Nguyễn Phú Trọng Khua git gai Ping gah dêh čar pơphun amăng tơlơi tơhmit, ol kơdol pran jua. Amăng tơlơi hning rơngôt prong prin, Grŭp mă bruă Ping gah dêh čar yua kơ ơi Tô Lâm, Ding kơna Ding jum kơđi čar, Khua mir sir dêh čar ngă Khua grŭp ba jơlan hlâo mut jôk atâo rơgom ơi Nguyễn Phú Trọng Khua git gai Ping gah dêh čar. Grŭp Gong gai dêh čar yua ơi Phạm Minh Chính, Ding kơna Ding jum kơđi čar, Khua dêh čar ngă Khua Grŭp mut jôk hăng rơngôt hrŏm sang anô̆ rơgom ơi Nguyễn Phú Trọng. Hning rơngôt kơ Khua git gai Ping gah ơi Nguyễn Phú Trọng, Grŭp Khua mir sir dêh čar yua kơ ơi Tô Lâm, Ding kơna Ding jum kơđi čar, Khua mir sir dêh čar ngă Khua grŭp mut jôk hăng rơngôt hrŏm hăng sang anô̆ Khua git gai Ping gah ơi Nguyễn Phú Trọng. Grŭp Khua pơ ala mơnuih ƀôn sang yua kơ ơi Trần Thanh Mẫn, Ding kơna Ding jum kơđi čar, Khua git gai wai lăng pơ ala mơnuih ƀôn sang ngă Khua grŭp mut jôk atâo rơgom ơi Nguyễn Phú Trọng Khua git gai Ping gah dêh čar hăng rơngôt hrŏm hăng sang anô̆./.