Hăng kual lŏn Dap Kơdư - Dơnung Tong Krah, mơ̆ng sa kual dŏ tơnap, ră anai pơƀuh rai tơlơi gơgrong bruă yom gah bơwih ƀong, pơgang lŏn ia - rơnuk rơnua, ngă atur kiăng dưm tơlơi anăp nao či đĭ kyar sui thun mơ̆ng “rơnuk hrưn đĭ mơ̆ng pô”. Ơi Hoàng Công Khiêm, Kơ-iăng khua ping gah phương Xuân Trường - Đà Lạt, tơring čar Lâm Đồng lăi:“Ƀing khua, mơnuih ping gah hăng Mơnuih ƀon sang đăo kơnang, hăng pran kơtang gum pơgôp abih bang, rim čô mơnuih hơmâo râu mơdưh tơlơi čang, tơlơi kiăng khăp, kơtưn đĭ, pran jua gir kơtir, gơgrong mă pô, jing lŏn ia ta đĭ kyar mơtăm yơh, Mơnuih ƀôn sang trơi pơđao yâo mơak mơn”.

Tơlơi yom phara hloh mơ̆ng mông Hră pơtrun yom Jơnum ruah khua ping gah dêh čar tal 14 lĕ prăp rơmet mrô rơnoh đĭ kyar phrâo, mă boh thâo ia rơgơi, pơčeh phrâo, mă yua boh thâo mrô pơtrut đĭ kyar. Hăng Dap Kơdư, hơbô̆ bruă anai pok rai tơlơi gêh găl či pơplih glăi bruă ngă hmua tui jơlan mă yua boh thâo ia rơgơi, bơwih ƀong hơdjă rơgoh, pơdar nao rai, pơđĭ tui anŏ yom mơ̆ng gơnam tam. Hăng kual Dơnung Tong Krah, biă ñu hơdôm boh tơring ter hang ia rơsĭ, anai jing phun atur či đĭ kyar bơwih ƀong huă ia rơsĭ mơtah, hyu čuă ngui yom, apui lơtrik pơkra phrâo hăng logistics phrâo. Hră Jơnum ruah khua ping gah dêh čar tal 14 yua hnun ƀu kơnong črâo pơƀuh jơlan ngă bruă hrŏm đôč ôh, ăt pok rai jơlan đĭ kyar lăp djơ̆ hăng rim kual phara. Mơnuih ping gah Mai Văn Tuấn dŏ pơ phương Phù Đổng, tơring čar Gia Lai lăi:“Hră Jơnum ping gah dêh čar tal 14 pơsit boh thâo ia rơgơi, boh thâo mrô jing hơdôm mơta bruă či đĭ kyar, hăng gơmơi ƀơi plơi pla lĕ gơmơi hluh amuñ đôč, ngă hiư̆m pă kiăng gơnam mơ̆ng hmua hơmâo sĭ nua pơmă, plai ƀiă rơngiă prăk soh sel. Mă yua boh thâo mrô ƀu djơ̆ bruă hơget tơnap đơi, mơnuih rơgơi kah mơ̆ng ngă, ƀu djơ̆ hnun ôh, hơmâo mrô čih pơthâo anih pla, hơmâo hră điện tử čih pioh djŏp bruă bruă ta ngă, hơmâo mrô ĕp ƀuh anih pơkra gơnam, hnun kah mơ̆ng dưi mut hrŏm anih mơdrô prong”.

Tơlơi pioh glăi tơlơi hơdor prong pơkŏn dong amăng Hră jơnum ruah khua ping gah dêh čar tal 14 lĕ lăi dlăm kiăng ngă bruă rơđah rơđông: lăi lĕ khŏm ngă; tơlơi gơñăm ngă, bruă kiăng ngă, hơdră pơsir rơđah; gơgrong hăng bruă hơmâo ngă; mă tơlơi djơ̆ pran mơ̆ng mơnuih ƀôn sang yơh ngă gai pơkă brơi anŏ tŭ yua hă ƀô̆. Tơlơi anai yom biă mă hăng Dap Kơdư - Dơnung Tong Krah, anih glăk hơmâo lu tơlơi lông kah hăng ayuh hyiăng ƀu lăp, hơmâo tơlơi truh na nao, anih anom aka ƀu pơtruh hrŏm, aka ƀu ngă kjăp brơi ôh bruă bơwih ƀong kơ mơnuih ƀôn sang pơ kual ataih, asuek, plơi pla djuai ania ƀiă. Mơnuih ping gah Nay Lợi, djuai ania Jarai, să Ia Hiao, tơring čar Gia Lai lăi:“Kâo tŭ ư hloh lĕ ƀing khua lăi lĕ khŏm ngă, hiăp ƀiă ngă lu, hăng ngă lĕ khŏm kiăng klă kơ mơnuih ƀôn sang yơh phun”.

Mơ̆ng akŏ truh pơ tlôn Hră jơnum ruah khua ping gah dêh čar tal 14 jing pơsit tơlơi gơgrong yom phun mơ̆ng Mơnuih ƀôn sang amăng djŏp hơdră ngă bruă. Hăng Dap Kơdư - Dơnung Tong Krah, anih hơmâo lu phung djuai, tơlơi đăo hăng tơlơi hơdip mơda, pran jua anai jai yom hloh amăng bruă ngă kjăp khul gum pơgôp djuai ania, bong kjăp rơnuk rơnua kơđi čar - mơnuih mơnam. Tha plơi Điểu Xem, djuai ania Mnông, să Kiến Đức (Lâm Đồng) lăi:“Lơ̆m ping gah pơsit Mơnuih ƀon sang yơh phun ñu, neh met wa đăo kơnang Tơlơi pơtrun ngă bruă kiăo tui djơ̆ hăng tơlơi hơdip, ƀing khua hmư̆ ană plơi lĕ, mah tơnap kar ƀơi tŭ mơn, neh met wa ăt gum ngă mơn. Pơgôp pran lĕ plơi pla hơđong, lŏn ia đĭ kyar”.

Mơ̆ng Hră Jơnum ping gah tal 14 mơ̆ng lŏn ia ta brơi ƀuh, “Rơnuk hrưn đĭ mơ̆ng pô” ƀu kơnong mơ̆ng jơlan hơdră ngă bruă akŏ phun đôč ôh, ăt hơmâo mơ̆ng tơlơi pơplih sit nik mơ̆ng abih bang anom bruă kơđi čar hăng tơlơi gum hrŏm mơ̆ng Mơnuih ƀôn sang. Lơ̆m tơlơi pơmin đĭ kyar phrâo hơmâo ngă hăng bruă sit, Dap Kơdư - Dơnung Tong Krah dưi pơplih kơtang, kơplong đĭ pơ anăp, gum pơgôp prong, kơtang hloh kơ tơlơi đĭ kyar mơ̆ng lŏn ia ta./.