Mơguah lơ 13/5, ƀơi Sang mă bruă Khua pơ ala mơnuih ƀôn sang dêh čar ta, gah yŭ tơlơi git gai mơ̆ng Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn, Jơnum min apăn bruă Khua pơ ala mơnuih ƀôn sang dêh čar ta pok phun mông jơnum tal 33. Pơphun amăng 3 hrơi, ƀơi mông jơnum tal 33, Jơnum min apăn bruă Khua pơ ala mơnuih ƀôn sang dêh čar ta pel ĕp, gum pơhiăp amăng 14 bôh yôm phăn prăp lui kơ Tal jơnum lok 7, Khua pơ ala mơnuih ƀôn sang dêh čar ta tal 15.

Kơ-iăng Khua git gai wai lăng pơ ala mơnuih ƀôn sang dêh čar ta Trần Thanh Mẫn lăi rơđah. Kơnong dô̆ 1 rơwang hrơi tơjuh dong lĕ pơphun yơh Tal jơnum lok 7, Khua pơ ala mơnuih ƀôn sang dêh čar ta tal 15, lơm anun mrô bruă prong, yua anun, amăng mông jơnum tal 33, rơkâo ding kơna Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ hơdôm hră pơ-ar hăng hơdôm bôh yôm mơ̆ng rim rơwang bruă, hră čih tơlơi phiăn, Tơlơi pơtrun pơsit; amăng anun ngă rơđah hơdôm rơwang bruă, hră čih pơkra hmâo pơplih phrâo djop hơdôm hơdră pơtrun mơ̆ng Ping gah; hmâo kiăo tui tơhnal pơkă, tơlơi pơmin črâo ba čih tơlơi phiăn, tơlơi pơtrun pơsit; tơhnal djơ̆ Phiah, phiăn hăng pơlir hơbit hăng hơdôm tơlơi phiăn pơkă. Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn rơkâo hơdôm bôh ƀirô tañ ngă giong bôh yôm gah bruă gơgrong, tañ mơ-ĭt hră pơ-ar pioh Khua pơ ala mơnuih ƀôn sang kơsem min hlâo kơ Tal jơnum lok 7./.