Lơ 25/3, rơbêh 550 čô mơnuih mă akan hơdang ƀơi phường La Gi hăng să Tân Hải, tơring čar Lâm Đồng mut lăng hrŏm mông phat kơđi lông lăng kiăng lăi pơthâo kơ bruă pơgăn mă akan hơdang ča čot, ƀu lăi pơthâo hăng ƀu djơ̆ tơlơi pơkă (IUU). Jơlan hơdră yua grup wai lăng mă akan hơdang mrô 4, anom bruă git gai tơhan kual tơhan pôlih ia rơsĭ mrô 3 gum hrŏm hăng anom pơtô bruă Ping gah hăng pơtô ba mơnuih ƀôn ang Ping gah tơring čar, sang phat kơđi tơring čar pơphun. Mông phat kơđi hơmâo pơjing rai mơng bruă sit nik hăng tơlơi ngă soh bơdjơ̆ nao bruă “Ba mơnuih tơbiă hyu gah rơngiao ča čot” hăng “Ngă prung prai hĭ glông pơhing mơng măi mok”.

Hluai tui bruă pơƀuh glăi mơng pel ĕp, mă pơkŏng, pơsir kơđi, jơlan hơdră anai ngă kơ mơnuih mă akan hơdang tañ hluh, tañ thâo hơdôm tơlơi pơkă amăng tơlơi phiăn kơ bruă mă akan hơdang. Lu boh tơhnal yôm phun hơmâo lăi pơtong anun lĕ tơlơi pơkă kơ kual mă akan hơdang, wai lăng ƀattô, song nan, bruă ngă soh tơlơi kŏm IUU amra pơsir kar hăng kơđi hình sự, kah hăng hơdôm bruă ngă soh pơkŏn anun lĕ ruh hĭ, ngă măi mok ƀu dưi hrĭp mă bruă krăo lăng lơm hyu mă akan hơdang.