Ƀơi tiểu khu mrô 251, să Ea Bung, tơring glông Ea Súp, giăm jơlan mrô 14C, ha guai hăng Đang glai dêh čar Yok Đôn, lu kyâo glai prong mơng 10-40 cm, glông mơng 3-4 met arăng trơ̆i pơƀut glăi khul khăl. Amăng kual glai kyâo arăng phă, hơdôm pluh ektar hơmâo pla glăi phun keo pơdjuai phrâo pơplah hăng hmua pla kơtor. Ơi Nguyễn Thanh Hồng, dŏ ƀơi să Ea Bung, tơring glông Ea Sup, sa čô mơnuih gum hrŏm, pơlir hơbit ngă tui akŏ bruă brơi thâo, kyâo glai arăng trơ̆i ƀơi tiểu khu 251, yua tă Trịnh Thị Hương, ră anai lĕ Khua kông ti pla kyâo glai 27/7 wai lăng. Đơ đam lŏn glai arăng phă giăm giăm 100 ektar. Ơi Nguyễn Thanh Hồng brơi thâo:

“Blan 7 thun 2021 yă Hương brơi mơnuih hăng rơdêh nao čuk pơagaih 40 ektar lŏn glai, laih anun truh blan 5/2022 ñu trơ̆i hĭ kyâo hăng čuk pơagaih dong 60 ektar. Đơ đam lŏn glai trơ̆i hĭ amăng 2 thun lĕ 100 ektar. Phrâo anai grup pel ĕp mơng djop gơnam bruă hơmâo nao pel ĕp, samơ̆ ăt aka ƀu hơmâo tơlơi lăi glăi brơi mơnuih amăng kông ti thâo”.

Hơdôm rơtuh ektar glai yua kông ti pla glai 27/7 phăn kiăng pla phun keo

Akŏ bruă pla glăi hăng pơđĭ kyar glai rưng hơmâo Jơnum min mơnuih ƀon sang tơring čar Dak Lak tŭ ư brơi Kông ti TNHH pla glai kyâo 27/7 ngă tui tơlơi pơtrun mrô 2959, amăng blan 11 thun 2012. Đơ đam lŏn glai ngă tui akŏ bruă lĕ 783,4 ektar, ƀơi tiểu khu 251, să Ea Bung, tơring glông Ea Sup. Hơnong pơkă mơng akŏ bruă anai lĕ pơđĭ kyar glai rưng hăng pơlir hơbit hăng ngă hmua. Pô pơ ala gah tơlơi phăn hăng Khua kông ti blung hlâo lĕ ơi Nguyễn Văn Quê, dŏ ƀơi tơring čar Tây Ninh hăng truh thun 2017 pơplih, jao glăi yă Trịnh Thị Hương, dŏ pơ tơring čar Đồng Nai.

Lu kyâo glai prong 30-40 cm, glông 3-4 met arăng trơ̆i mă

Tui ơi Nguyễn Ngọc Luật - Kơ-iăng Khua Jơnum min mơnuih ƀon sang să Ea Bung, amăng hrơi blan laih rơgao anom bruă bơdjơ̆ nao hơmâo tŭ mă tơlơi jăm ƀuah mơng mơnuih ƀon sang hăng sa, dua čô ding kơna mơng Kông ti TNHH pla kyâo glai 27/7 ngă tui akŏ bruă hơmâo lu anŏ soh. Să hơmâo gum hrŏm hăng Anom bruă wai lăng glai rưng tơring glông Ea Sup hrŏm hăng sa, dua anom bruă bơdjơ̆ nao amăng tơring glông akŏ pơjing grup hyu pel ĕp. Mơng pel ĕp, grup ƀuh bruă wai lăng glai rưng, pla kyâo, pơlir hăng ngă hmua mơng anom bruă anai aka ƀu djơ̆ hăng tơlơi pơkă mơng Jơnum min mơnuih ƀon sang tơring čar Dak Lak. Sit biă ñu, hơmâo laih rơbêh 326/783 ektar glai kyâo arăng trơ̆i hĭ; pla hơdôm pluh ektar aka ƀu djơ̆ hăng hră lăi pơthâo tui tơlơi sit nik lŏn glai mơng anom bruă wai lăng glai tơring glông Ea Sup.

“Rơnuč blan 9 laih rơgao, să hơmâo gum hrŏm hăng anom bruă wai lăng glai rưng tơring glông Ea Sup pơphun hyu pel ĕp. Mơng pel ĕp, đơ đam lŏn glai arăng čuk pơagaih amăng akŏ bruă pơđĭ kyar glai hơđong kjăp, hăng anom bơwih ƀong sĭ mơdrô, ƀing gơñu hơmâo pla glăi giăm 62 ektar phun keo pơdjuai phrâo. Tui hăng anom bruă bơdjơ̆ nao, ƀing gơñu ƀu dưi pla kyâo glai ƀơi anun. Pơ anăp anai, să amra tŏ tui rơkâo hơdôm anom bruă bơdjơ̆ naokiăng pơsir hĭ bruă anai”.

Phun keo pơdjuai phrâo pla amăng lŏn glai

Ơi Nguyễn Như Hoàng - Khua anom bruă wai lăng glai rưng tơring glông Ea Sup brơi thâo, ƀơi akŏ bruă pla glăi kyâo glai, wai pơgang hăng pơđĭ kyar glai rưng mơng Kông ti TNHH pla kyâo glai 27/7 ƀơi să Ea Bung, ƀu djơ̆ kơnong ngă soh amăng bruă wai lăng glai rưng, čuk pơagaih, man pơdong, phă glai răm ƀăm hơdai nao ngă hmua đôč ôh mơ̆, ăt hơmâo tơlơi ngă soh bơdjơ̆ nao bruă pơjao nao rai lŏn glai. Hơdôm tơlơi ngă soh anai prong biă mă, samơ̆ bruă pơsir hĭ kiăng mơng gưl glông yua anun anom bruă hơmâo hră pơ-ar rơkâo kiăng pơsir hĭ ƀing mơnuih bơdjơ̆ nao. Ơi Nguyễn Như Hoàng brơi thâo:

“Anom bruă wai lăng glai rưng tơring glông lăi pơthâo Anom bruă wai lăng glai tơring čar Dak Lak kiăng rơkâo kông ti TNHH pla kyâo glai 27/7 khŏm nao lăi pơthâo tong ten kơ bruă lŏn glai rơngiă rơbêh 326 ektar hăng bruă pơtah tai amăng wai lăng glai rưng; pơphun pel ĕp djop akŏ bruă kiăng ngă rơđah tơlơi glăm ba mơng Khul git gai hơđăp kah hăng phrâo laih dong ƀing mơnuih bơdjơ̆ nao. Rơkâo Jơnum min mơnuih ƀon sang tơring glông brơi kông ang tơring glông Ea Sup tŭ mă hră pơ-ar kiăng pơsir djơ̆ hăng tơlơi pơkă amăng tơlơi phiăn”.

Ƀơi tơring glông Ea Sup, tơring čar Dak Lak hơmâo 26 akŏ bruă jao wai lăng glai, yua apah, pơlir ngă hmua hăng pla glai, đơ đam prong giăm 20.000 ektar. Samơ̆, găn rơgao rơbêh 10 thun pok pơhai, lu akŏ bruă ƀu ba glăi tŭ yua, ƀuh lu abih phă glai, sua mă lŏn glai. Amăng anun hơmâo bruă pơjao nao rai akŏ bruă, trơ̆i hĭ abih kyâo glai pioh ngă hmua, pla glăi phun kyâo boh troh, đa kah mă lŏn pioh sĭ mơdrô.