Ƀơi ƀut plơi mrô 6, phường Tân Lợi, plơi prong Buôn Ma Thuột - anih hơmâo rơdêh 1.000 boh sang anŏ, bruă pôr pơhing, mă tơlơi pơgôp hiăp hơmâo lăi pơthâo rơđah rơđông, dưm kơnar, laih anun hơmâo mơnuih ƀôn sang tŭ ư biă. Ơi Nguyễn Ngọc Thịnh, khua grup mă tơlơi pơgôp hiăp mơ̆ng mơnuih ƀôn sang brơi thâo:“Ƀing gơmơi pơphun pôr pơthâo ƀơi djŏp glông pôr pơhing, laih dong lăi pơthâo anih pơƀut jơnum pơ sang jơnum plơi. Truh kơ mông anai, mơnuih ƀôn sang hok mơak biă mă, tŭ ư hăng tơlơi pơtrun mơ̆ng Ping gah hăng Kơnuk kơna măng bruă pơmut hrŏm, ngă hơbôt anom bruă, laih dong čang rơmang bruă ngă hơkrŭ anai truh kih”.

Ƀơi hơdôm boh plơi, mơnuih djuai ƀiă ăt pơdah pran jua lăp đing nao yôm biă kơ tơlơi pơtrun anai. Ơi Y Rul Niê, ƀuôn Pốt A, tơring glông Čư̆ Mgar brơi thâo, neh met wa ăt ƀuh mơn tơlơi tơnap lơ̆m blung a phrâo pơmut, samơ̆ ăt đăo kơnang tơring čar amra klă hloh:“Să anai hăng să adih jing ataih biă mă, pơmut glăi jing lŏn tơnah prong krên dên mơtăm, neh met wa nao rai wơ̆t hăng ƀing ngă bruă kơnuk kơna nao rai hai tơnap mơn. Samơ̆ sit ta ngă ta khŏm gir yơh, ƀing khua, mơnuih mă bruă khŏm rơgơi hloh kơ mơ̆ng hlâo. Ƀơi anăp lĕ tơnap tap samơ̆ tơdah ngă klă lĕ amra truh kih”.

Hăng lu mơnuih ƀôn sang, tơlơi kơnang hăng čang rơmang đĭ kyar ƀu kơnong hơmâo ƀơi tơring čar, ƀơi să đôč ôh mơ̆ ăt đăo kơnang hơdôm tơlơi đĭ kyar bơwih ƀong huă - mơnuih mơnam hơdôm kual. Ayong Huỳnh Trần Minh Đức ƀơi plơi prong Buôn Ma Thuột lăi:“Tơdah Dak Lăk pơmut hrŏm hăng Phú Yên jing pơtruh nao rai kual kơtang biă. Tơlơi bơwih ƀong ia rơsĭ mut hrŏm hăng ngă hmua mơ̆ng Dap Kơdư amra pơtrut đĭ kyar hơđong kjăp. Sĭ mơdrô, logistics ăt gêh gal, amun hloh mơn”.

Bơ ơi Nguyễn Ngọc Hiên, mơnuih dŏ pơ phường Tân Lợi, hơmâo dua boh plơi mơtăm, wơ̆t Dak Lăk hăng Phú Yên lăi:“Plơi amĭ kâo pơ Phú Yên, kâo hơdip pơ Dak Lăk mơ̆ng anet. Mông anai tơdah pơmut hrŏm dua boh tơring čar mơak biă. Dak Lăk hơmâo čư̆, hơmâo glai, hơmâo ia rơsĭ - pơmut glăi amra kơtang biă, ba lŏn ia ta đĭ kyar kơtang hloh”.

Rơngiao kơ tŭ ư hăng tơlơi pơtrun prong kơ pơmut hrŏm, dăp glăi anom bruă kơnuk kơna, mơnuih ƀôn sang Dak Lăk ăt pơgôp hiăp kơ hơdôm tơlơi yôm hloh hăng bruă ruah mơnuih ngă khua amăng anom bruă gong gao 2 gưl pơ anăp. Ơi Hồ Hồng, să Quảng Tiến, tơring glông Čư̆ Mgar, tơpă sit:“Kâo dŏ bơngơ̆t mơn, ră anai ta pơmut hrŏm lu tui anai jing pơwơ̆t glăi rơnuk bao cấp đưm dŏ tơguan ngă hră pơ-ar mơ̆ng ha čô mơ̆ng ha čô mơn. Yua hnun kâo čang rơmang lơ̆m pơmut hrŏm lĕ ta ngă bruă ñu hruaih, amuñ, ngă bruă hơdeč hmar hloh”.

Yă Nguyễn Thị Xuân, ƀơi plơi prong Buôn Ma Thuột ăt lăi mơn, pơmut hrŏm anom bruă djơ̆ yơh samơ̆ truh kih hă ƀô̆ ăt kơnang kơ ƀing khua, mơnuih apăn bruă mơn:“Kâo lăng tơlơi pơtrun pơmut hrŏm djơ̆ yơh. Ană plơi lêng kơ tŭ ư. Čang rơmang Kơnuk kơna ruah mơnuih mă bruă rơgơi, ngă bruă tŭ yua kiăng mơnuih ƀôn sang hơmâo tơlơi hơdip jai hrơi trơi pơđao, yâo mơak”.

Hăng brua dăp glăi, pơmut hrŏm anom bruă kơnuk kơna jing jơlan nao yôm biă mă amăng bruă pơplih phrâo anom bruă kơnuk kơna hơbôt, ngă bruă tŭ yua. tơlơi tŭ ư, đăo kơnang hăng čang rơmamg mơ̆ng mơnuih ƀôn sang sit jing tơlơi pơtrut prong biă mă kiăng djŏp gong gai ngă truh kih tơlơi pơtrun anai, ba lŏn ia ta jai hrơi đĭ kyar kjăp hloh./.