-Ơ ayong Y Khăm Ta Niê, hăng bruă gơgrong ba jing Khua ping gah plơi pla mơnuih djuai ƀiă, tơlơi hơgĕt ngă anŏ kơjăp phun akha dưi pơgang bruă kơđi čar hăng pơđĭ tui kơnuih arăng đăo kơnang, ba jơlan hlâo pioh iâu potum, thâo gum pơgôp amăng ping gah hăng mơnuih ƀôn sang plơi pla ta lĕ ?

-Khua ping gah plơi Y Khăm Ta Niê: Hăng kâo lĕ, phun ñu kah hăng akha  ngă kơjăp tơlơi khin hơtai bruă kơđi čar hăng pơjing atur ngă kơjăp đăo kơnang amăng plơi pla mơnuih djuai ƀiă laih anun tŭ mă pran jua đăo kơnang mơ̆ng mơnuih ƀôn sang. Anun lĕ pran jua khom kơjăp, tong ten ñu ƀu tŭ kơ hơmâo mă ôh, dŏ tơbiă rai mơ̆ng bruă ngă, akŏ pơjing bruă mă, tơlơi ta pơhiăp khom nao hrŏm hăng bruă mă, khom ba jơlan hlâo na nao amăng djop bruă kah hăng jơnum plơi, iâu pơtum abih bang, pơtô lăi, pơčrâo ba djop bruă ngă tui jơlan hơdră ping gah pơtrun, tơlơi phiăn kơnuk kơna pơkă laih anun ăt kơnang kơ tơlơi phiăn juăt đưm hiam klă amăng plơi pla ta pô dơ̆ng. Jing sa čô mơnuih ngă khua ping gah amăng plơi pla mơnuih djuai ƀiă, kâo pơtong rơđah bruă mă, khŏm jĕ giăm hăng ană plơi pla, pơtô lăi brơi mơnuih ƀôn sang thâo hluh laih anun hơgĕt bruă ta ngă brơi mơnuih ƀôn sang ƀuh hăng đăo kơnang biă mă. Lơ̆m khua mua, mơnuih ping gah dŏ jĕ giăm, puăi tlao mơak, thâo kah pơpha tơlơi tơnap tap, đing nao djru pơtô lăi, dơ̆ng mơ̆ng bruă mă, tơlơi dŏ dong ƀong huă, truh pơ tơlơi ngui ngor mơak kơ ană plơi pla, sit mơ̆n kơnuih hiam, tơlơi đăo kơnang kơ mơnuih apăn bruă ngă khua amra đĭ tui. Mơ̆ng anun, djru kơ mơnuih ngă khua apăn bruă ping gah hăng mơnuih ƀôn sang thâo gum pơgôp sa pran jua man pơdong plơi pla, jai hrơi pơdrong sah, hiam rô̆.

-Mơ̆ng bruă mă găn rơgao sit nik, tơlơi git gai mơ̆ng ping gah plơi A1, ngă giong bruă jao hơdôm thun na nao mơtam, tui hăng ih boh tơhnal pơpă bruă ih ngă tŭ yua hloh amăng bruă pơblih, pơđĭ tui boh tơhnal bruă ngă lơ̆m khul git gai ping gah plơi, kiăng kơ Hră pơtrun mơ̆ng Ping gah dưi ngă tui sit nik amăng tơlơi hơdip mơda rim hrơi?

-Khua ping gah plơi Y Khăm Ta Niê: Mơ̆ng bruă ngă sit nik amăng rim hrơi či plơi A1 gơmơi, kâo ƀuh lĕ hơdră ngă tŭ yua hloh kiăng pơđĭ tui boh tŭ yua amăng bruă jak iâu pơtum jơnum ping gah plơi lĕ, ngă djơ̆ tui Hră pơčrâo 50 mơ̆ng Gơnong dlông, ba bruă jơnum ping gah khom lir hơbit hăng bruă ngă sit nik amăng tơlơi hơdip mơda ană plơi amăng plơi pla. Khul ping gah ƀu pơčrong sai bruă pơ ataih, lăi nao abih bang ôh, khom đing nao kơ bruă rơđah rơđong, pơhrŏ ƀun rin, man pơdong sang, pơgang rơnuk rơnua, djă pioh gru ama grua amĭ,  pơtrut tơlơi bơwih ƀong huă kơ mơnuih ƀôn sang. Hră pơtrun ping gah plơi hă ber đôč samơ̆ djơ̆ nao bruă ngă rơđah rơđong, tum teč, djơ̆ pô ngă khua, glăm ba, bruă jao, hrơi blan pơkă, boh tơhnal dưi ngă, sit jơnum ping gah khom lăng glăi, jŭ yap bruă ngă, pel ĕp tong ten, khom pơčrong sai, abih bang khom thâo djru pơčrong sai hrŏm, lăi tơpă, lăi nao djơ̆ kơ bruă či ngă. Hrŏm hăng jơnum ping gah, jơnum plơi ăt pôr pơthâo kơ ană plơi pla mơnuih djuai ƀiă thâo tong ten Hră pơtrun mơ̆ng ping gah, kiăng djop tơlơi pơtrun dưi ngă tui sit nik amăng tơlơi hơdip mơda rim hrơi.

-Hơdôm hơbô̆ bruă akŏ pơjing khul grup atông čing ƀudah khul grup ngă hrŏm rông rơmô amăng plơi pla laih anun lu hơbô̆ bruă pơkŏn hơmâo ngă pơtrut tơlơi pơblih tơlơi pơmin bruă ngă amăng plơi pla. Laih anun tơlơi gơgrong mơ̆ng Khul git gai ping gah plơi lir hơbit akŏ pơdong anŏ pơđĭ kyar bơwih ƀong huă mơnuih mơnam hăng bruă ngă amăng plơi  hơmâo pơƀuh hiư̆m pă lĕ?

-Khua ping gah plơi Y Khăm Ta Niê: Lu hơbô̆ bruă kah hăng khul grup atông čing, khul ngă hrŏm rông rơmô hơmâo pơblih kơtang biă mă tơlơi pơmin ană plơi pla. Mơ̆ng tơlơi ĭn glăi đôč hlâo adih, ră anai thâo pơlir tơdruă ngă hrŏm, anăp  nao kơ bruă ngă. Kơnang kơ khul grup atông čing anun, mơnuih ƀôn sang ƀuh rơnoh yom mơ̆ng gru grua, ƀu kơnong djă pioh gru grua hiam đôč ôh, dŏ pơđĭ tui tơlơi hơdip mơda, pôr pơthâo rup rap amăng plơi pla. Khul grup čem rông rơmô djru kơ mơnuih ƀôn sang pơblih ƀiă tơlơi pơmin, juăt čem rông raih daih, arăng anai hơmâo khul grup djru hrŏm, hrăm tơdruă hơdră čem rông, hrưn đĭ pơklaih mơ̆ng ƀun rin. Tơlơi gơgrong mơ̆ng khul apăn bruă ping gah plơi djru pơtô ba, pơčrâo brơi hơdră mă bruă, pơpha mơnuih ping gah nao djru hrŏm, kiăng ană plơi pla ƀuh bruă ngă laih anun đăo kơnang kơ tơlơi git gai mơ̆ng ping gah ƀơi kual plơi pla.

-Dưi thâo ih arăng pơpŭ bơni ƀrô hơdor glăi 96 thun hrơi akŏ pơdong ping gah, ih hơmâo tơlơi pơtă pơtăn hơgĕt mơ̆n kơ ƀing hlăk ai, mơnuih ping gah čơđai amăng kual plơi pla djuai ƀiă, kual giăm guai dêh čar?

-Khua ping gah plơi Y Khăm Ta Niê: Hơ̆k mơak pran jua hơmâo apah bơni ƀrô djơ̆ hrơi akŏ pơdong ping gah dêh čar ta, sa tơlơi lăp pơ-ư ang prong biă mă hăng jing sa bruă ngă glăm ba prong mơ̆n. Kâo kiăng mơ-it nao kơ ƀing hlăk ai, čơđai rơnuk anai dŏ ƀơi kual guai dêh čar, plơi pla mơnuih djuai ƀiă hăng tơlơi kiăng khom pơmin, djă kơjăp tơlơi kiăng hrưn đĭ mơ̆ng plơi pla ta pô amĭ ƀă yă pơjing, anih amĭ dor la ama dor sôk ta. Anăm pơmin ôh, kual tơnap tap lĕ kơƀah hloh pơkă hăng arăng, khom lăng anun jing anih ta tơgŭ hrưn đĭ amăng bruă mă, pơhrăm pran jua, bruă ngă kiăng kơjăp tui. Hlăk ai, thun dŏ čơđai, mơnuih ping gah, khom khin pơmin, khin ngă tui laih anun khim glăm ba bruă ta ngă; gir run hrăm tui, hơduah ĕp lu mơta, djă pioh gru ama grua amĭ djuai ania pô,  khom nao hlâo djop bruă mă, anăm kơdŭn ôh, kiăng  djru hrŏm pơtrut tơlơi bơwih ƀong huă, pơgang rơnuk rơnua ƀơi guai dêh čar, akŏ pơdong plơi pla trơi pơđao yâo mơak, thâo rơgơi. Anun yơh bruă ngă tŭ yua sit nik kiăng lăp pran hăng gru grua hmư̆ hing mơ̆ng ping gah ta.

-Djơ̆ yơh ih lăi, bơni kơ ih ayong Y Khăm Ta Niê hŏ, Khua ping gah Ƀôn A1, să Ea Sup, tơring čar Dak Lak hơmâo pioh mông bơră ruai tom anai.