Tui hăng hră lăi pơthâo, mơnuih ƀôn sang nao ruah khua wơ̆t hăng abih bang mơnuih ƀôn sang amăng đơ đam dêh čar pơđing hmư̆, đăo kơnang kơ tơlơi git gai črâo bruă mơ̆ng Ping gah amăng bruă akŏ pơdong Ping gah, anom bruă kơđi čar hăng bruă ruah khua mua; laih dong čang rơmang bruă prăp rơmet kơ mông Jơnum ruah khua ping gah đơ đam dêh čar tal 14 tŭ yua, ăt kah hăng hơdôm jơlan đĭ kyar bơwih ƀong - mơnuih mơnam thun 2026 hăng hơdôm thun tŏ tui.

Mơnuih ƀôn sang lăi, gơñu bơngơ̆t biă lơ̆m hơmâo tơlơi truh hơjan ia dăo kơtang ƀơi kual Tong Krah hăng lu plơi pla kual čư̆ siăng, ngă răm rai kơtang kơ ană mơnuih hăng dram gơnam; bơni mơn tơlơi ngă bruă mơ̆ng Kơnuk kơna thâo prăp mă pô, tơlơi gum djru hmao kru mơ̆ng hơdôm anom bruă kơnuk kơna hăng gong gai ƀôn lan amăng bruă nao djru mơnuih ƀôn sang, ba pơđuăi ană plơi, plai ƀiă tơlơi truh kơtang.