Ƀơi lu anih, neh wa dô̆ pơkra pra yang pơpŭ kơ bơngat jua, atông čing rơngôt ba atâo kơ khua git gai pioh ha rơnuk thun mơ̆ng pô yua kơ lŏn ia yua kơ mơnuih ƀôn sang. Mơguah, neh wa Jarai ƀơi plơi Kép, phường Đống Đa, plơi prong Plei Ku, tơring čar Gia Lai, pơƀut ƀơi sang rông plơi, pơphun pioh atâo hơdor kơ Khua git gai Ping gah ơi Nguyễn Phú Trọng. Tơdơi kơ mông pioh atâo, mơnuih ƀôn sang atông čing ba atâo khua git gai prong hloh mơ̆ng Ping gah. Ayong Bưn, mơnuih amăng grŭp atông čing plơi Kép, ol kơdol pran jua lăi:

“Jua čing rơngôt pơdah tơlơi ruă pran jua. Ơi Nguyễn Phú Trọng, sa čô Khua git gai prong prin mơ̆ng lŏn ia rơngiă, ană plơi ƀu hmâo hơget hloh kơ yua tơlơi atông čing pioh rơngôt hrŏm ba wa nao pơ̆ dêh čar atâo”.

 Ƀơi kual guai dêh čar tơring glông Buôn Đôn, tơring čar Dak Lak, ơi Ama Hoài, Khua ƀuôn Niêng 3, să Ea Ñuôl, hrŏm hăng neh wa djuai ania Bơnông, Êđê, djuai ania Lao hăng ƀing yă yơng ơi phơ̆t mơ̆ng sang phơ̆t Long Thọ pơkra pra yang pơpŭ hăng ngă yang rơkâo brơi bơngat jua khua git gai mơ̆ng mơnuih ƀôn sang:

“Khua git gai Ping gah dêh čar kah hăng pô ama, pô ơi mơ̆ng ƀing gơmơi. Ƀing gơmơi hning tui biă lơm ñu nao pơ̆ dêh čar atâo. Ƀing gơmơi hơdor tơngiă kơ ơi Nguyễn Phú Trọng hmâo brơi laih ƀing gơmơi tơlơi hơdip gum hrŏm hơbit, lu tơlơi lăng ba kơ neh wa kual tơnap tap ƀơi anai”./.