Ƀơi ƀuôn Akŏ Dhông, phương Buôn Ma Thuột, neh met wa pơƀut pơ Sang gru plơi krăo lăng hrơi pok pơphun Jơnum ruah khua Ping gah dêh čar tal 14 amăng mông kơdrưh, hur har pran jua čơkă hmư̆ biă mă. Amai H’Tít Alê ô, dŏ pơ ƀuôn Akŏ Dhông lăi: “Krăp lăng mông Jơnum ruah khua Ping gah dêh čar tal 14 kâo hok mơak, pơhưč pran biă, pơ-ư ang mơn yua anai lĕ tơlơi pơplih prong mơ̆ng lŏn ia ta. Kâo čang rơmang Ping gah hơmâo hơdră đĭ kyar tuai hyu čuă ngui či djă pioh hăng pơtrut tui gru grua hiam mơ̆ng djuai ania ta amăng rơnuk mut hrŏm jar kmar”.

Ƀơi ƀuôn Alê A, phương Ea Kao, hrơi mông anai dik dak mơak mơai bang hyu djŏp sang anŏ, ƀơi djŏp glông jơlan. Amăng Sang gru plơi pla, mơnuih ƀôn sang nao pơtum, dŏ krăp lăng mông jơnum blung a anai. Ơi Y Kanin, mơnuih amăng ƀuôn Alê A lăi: “Neh wa amăng plơi gơmơi pơƀut pơ Sang gru grua plơi pla či krăp lăng mông Jơnum. Gơmơi čang rơmang Jơnum anai hơmâo lu tơlơi pơtrun lăp djơ̆, djru đĭ kyar bơwih ƀong huă - mơnuih mơnam, lăng ba hloh kơ neh met wa djuai ania ƀiă, djă pioh hăng pơtrut tui hloh gru ama grua amĭ, pơtrut tui sĭ mơdrô, bơwih bơwang brơi tuai rơnguai pơ anai”.

Bơ plơi pla pơ Ngŏ, ter hang ia rơsĭ, hrơi mông čơkă Jơnum ruah khua ping gah ăt dik dak, hur har pran jua mơn. Lu mơnuih hok kơdok, đăo kơnang, čang rơmang kơ tơlơi pơtrun phrâo pơtrut đĭ kyar abih bang bruă, laih dong kiăng hơmâo thim tơlơi pơtrun djru neh wa hơđong pran jua nao pơ ia rơsĭ, dŏ mă bruă pơ ia rơsĭ, bong kjăp bul pơtâo plao ia rơsĭ lŏn ia ta. Ơi Đặng Nhu, dŏ pơ phương Phú Yên lăi: “Gơmơi jing mơnuih hyu mă akan, bơwih ƀong mơ̆ng ia rơsĭ yơh, čang rơmang Jơnum ping gah tal anai hơmâo hơdră djru đĭ kyar bơwih ƀong mơ̆ng akan hơdang, kiăng neh met wa hơđong pran jua ngă bruă, dŏ pơ ia rơsĭ, đĭ kyar bơwih ƀong, pơgang ba bul pơtâo plao ia rơsĭ”./.