Yă Rơ Châm H’Yéo, phường Pleiku, tơring čar Gia Lai - Ding kơna hơđăp Khul khua apăn bruă Ping gah tơring čar, Khua hơđăp Jơnum min djŏp djuai ania mơnuih mơnam Việt Nam tơring čar Gia Lai krăo lăng biă mă hơdôm tơlơi pơhing kơ Jơnum ruah khua ping gah dêh čar tal 14. Yă H’Yéo brơi thâo, yua hơmâo tơlơi git gai hăng lăng ba yom mơ̆ng Ping gah hăng rim plơi pla djuai ania ƀiă, tơlơi hơdip mơnuih ƀôn sang pơ Gia Lai lăi hơjăn hăng Dap Kơdư lăi hrŏm jai hrơi đĭ tui hăng pơplih lu laih:“Mơnuih ƀôn sang Dap Kơdư ha pran jua kiăo tui Ping gah, kiăo tui Wa Hồ. Čang rơmang ping gah ta lăng ba dong, djru brơi kơ Dap Kơdư đĭ kyar bơwih ƀong huă, mơnuih mơnam, gru grua, pơtô hrăm, hăng bruă akŏ pơdong Dap Kơdư prong sah, bơwih ƀong đĭ, thâo rơgơi. Anun jing hơdôm bruă yom akŏ phun mơtăm”.

Hăng tơlơi thâo hluh mơ̆ng sa čô mơnuih lu thun ngă bruă čih pơkra hăng git gai hơdră djru djuai ania, ơi Ksor Phước (ƀơi Gia Lai) - Ding kơna hơđăp amăng Ping gah, Khua ding jum, Khua Jơnum min Djuai ania mơ̆ng Kơnuk kơna - pơsit bruă wai lăng djuai ania hăng hơdôm hơdră djru kơ plơi pla djuai ania ƀiă hơmâo Ping gah hăng Kơnuk kơna gir ngă na nao. Ơi Ksor Phước đăo kơnang amăng rơwang bruă phrâo, Ping gah hăng Kơnuk kơna amra lăng ba mă yua klă hơdôm anŏ yom amăng gru grua đưm, anih anom čư̆ hyiăng kriang pơtâo, anih gru đưm či đĭ kyar gru grua, čuă ngui hơđong kjăp, pơlir đĭ kyar bơwih ƀong hăng răk pioh gru grua.

“Djuai ania jing tơlơi tơnap tap, amuñ ngă rơngiă pran jua mơn, anun yơh amuñ hơmâo arăng plư, pơčut pơčao, ngă pơčlah khul gum pơgôp. Klă hloh lĕ khŏm akŏ pơjing kjăp bruă abih bang mơnuih ƀôn sang pơgang Lŏn ia, abih bang mơnuih ƀôn sang kjăp pran pơgang lŏn ia, hơkrŭ kjăp bruă pơgang lŏn ia amăng hrơi blan đĭ kyar bơwih ƀong huă, mơnuih mơnam mut hrŏm bơkơnar. Đĭ kyar bơwih ƀong kiăng kjăp kơtang bruă pơgang lŏn ia - rơnuk rơnua hăng pơhlôm hơđong plơi pla kiăng đĭ kyar bơwih ƀong. Anai jing tơlơi kâo čang rơmang hloh amăng rơwang bruă pơ anăp mơ̆ng Ping gah hăng lŏn ia, biă ñu lĕ kual mơnuih ƀôn sang djuai ƀiă ƀơi Việt Nam”.

Ƀơi kual Yŭ Kơdư (Tây Bắc), mơnuih ƀôn sang djuai ƀiă ăt glăk hok mơak čơkă Jơnum ruah khua ping gah dêh čar tal 14 mơn, mơit nao lu tơlơi čang rơmang hăng tơlơi pơtrun yom mơ̆ng Ping gah amăng hrơi blan đĭ kyar lŏn ia. Ơi Nguyễn Văn Độ, mơnuih ping gah ƀơi plơi Hưng Hà, să Chiềng Khương, tơring čar Sơn La, čang rơmang Jơnum ruah khua ping gah dêh čar tal 14 amra ba tơbiă hơdôm tơlơi pơtrun, hơdră ngă bruă lăp djơ̆, yom, sui thun, kiăo tui tơlơi hơmâo sit ƀơi rim kual plơi pla djuai ania ƀiă, biă ñu lĕ amăng đĭ kyar bơwih ƀong nao hrŏm hăng hrŏ trun ƀun rin hơđong: “Gơmơi čang rơmang Ping gah hăng Kơnuk kơna djru brơi, ngă gêh găl kơ mơnuih ƀôn sang dưi čan prăk ƀiă dong. Laih dong kiăng pơtrut pơsur anom mơdrô brơi măi mok pơkra hiam hlao gơnam mơ̆ng hmua ƀơi kual ataih, asuek, kah hăng pơkra gơnam mơ̆ng hmua, hlô rông, akan hơdang kiăng ba glăi boh tŭ yua bơwih ƀong hơmâo hloh kơ mơnuih ƀôn sang”.

Ƀing khua, mơnuih ping gah hăng mơnuih ƀôn sang să Chiềng Khương, tơring čar Sơn La ăt čang tơmang hơdôm jơlan hơdră dêh čar pơtrun hơmâo pok pơhai dưm kơnar, tŭ yua, biă ñu lĕ Jơlan hơdră đĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng čư̆ siăng, hơmâo lăng jing anih kjă yom biă mă djru ană plơi hơmâo prăk či pơkra gơnam, hơđong tơlơi hơdip mơda. Ơi Đào Việt Phương, Kơ-iăng khua ping gah să brơi thâo:“Ƀing gơmơi đăo kơnang hăng čang rơmang mông Jơnum ruah khua ping gah dêh čar tal 14 hơmâo jơlan hơdră, tơlơi pơtrun yom, lăp djơ̆, pơtrut bơwih ƀong - mơnuih mơnam hơđong kjăp amăng rơwang thun ngă bruă phrâo. Mơnuih ƀôn sang čang rơmang hơmâo lăng ba bruă ngă hmua; hơmâo hơdră djru ngă hmua pơkra gơnam ba sĭ. Laih dong čang rơmang Ping gah hơmâo hơdră đĭ kyar bơwih ƀong huă - mơnuih mơnam lăp djơ̆ hăng guai dêh čar kah hăng đĭ kyar bơwih ƀong huă ƀơi bah amăng jang guai”./.