Ƀơi Ƀuôn Alê A, phường Ea Kao, tơring čar Dak Lak, lu mơnuih ƀôn sang pơƀuh ƀô̆ mơta ƀơi sang jơnum plơi,  đing hmư̆, ĕp lăng mông jơnum prong ping gah tui amăng tivi dŏ pơdah. Ayong Y Kanin, kah pơpha:

“Abih bang mơnuih pơ anai thâo gum pơgôp biă mă, lu adơi ayong phara ba djuai ania, ƀing gơmơi mơak biă hăng čang rơmang amra hơmâo lu tơlơi pơblih phrâo pơ anăp adih. Khua mua mơnuih thâo lu, thâo ƀuh nao pơ ataih sit mơ̆n kâo đăo jơnum ruah khua  tal anai mơ̆ng ping gah tŭ yua hiam klă. Čang rơmang tal jơnum anai hơmâo lu jơlan hơdră, tơlơi pơtrun pơtrut pơsur gah bruă ngă hmua, djru prăk tuh pơ alin kơ bruă mă, gru grua hiam pioh pơđĭ kyar bơwih ƀong huă”.

Ƀơi plơi Stơr, să Tơtung, tơring čar Gia Lai, ayong Đinh Bơn djuai ania Bahnar lăi:

“Plơi gơmơi jing kual ataih. Kiăng biă mă tal jơnum prong ruah khua ping gah dêh čar tal anai, Kơnuk kơna, gong gai plwoi pla djop gưl đing nao lu hloh kơ plơi pla. Mơnuih ƀôn sang gơmơi čang rơmang jơnum prong ping gah dêh čar tŭ yua hiam klă, hơmâo lu jơlan hơdră pơtrun djơ̆ găl pioh pơtrut pơđĭ kyar lŏn ia”.

Hăng tơlơi đăo kơnang tong ten kơ ping gah, ơi Lâm Tấn Bình, sa čô mơnuih thâo hră djuai ania Chăm ƀơi să Bắc Bình, tơring čar Lâm Đồng, čang rơmang, jơnum ruah khua ping gah dêh čar tal XIV, amra hơmâo lu hră pơtrun djơ̆, ba glăi boh tŭ yua amăng bruă mă prong, dưi pơsir anŏ kiăng pơđĭ kyar lŏn ia amăng rơnuk phrâo.

“Mơnuih ƀôn sang djuai ƀiă lăi hrŏm laih anun  amăng anun hơmâo djuai ania Chăm hnun mơ̆n, čang rơmang biă mă tơlơi pơtrun djơ̆ lăp mơ̆ng Ping gah djru lŏn ia Việt Nam ăt kah hăng djop djuai ania ƀiă amăng dêh čar bơwih ƀong huă pơđĭ kyar, djă pioh gru grua hiam djuai ania. Kiăng tui anun, abih bang djop djuai ania ăt khom ngă tui jơlan tơlơi pơtrun  bruă ngă thâo gum pơgôp djuai ania kiăng djru pran jua hrŏm lŏn ia hrưn đĭ amăng rơnuk phrâo”.