Hơdôm hrơi anai, jơlan bêtông mơ̆ng să M’Drăk mut nao amăng ƀuôn M’Suốt hyơ hyơr hla gru čar mriah pơtŭ kơñĭ, pano pôr pơthâo kơ mông Jơnum ruah khua Ping gah tal 14. Amăng hrơi hok mơak yua bơyan ngă tơbâo hơmâo hơmăi, mơnuih ping gah Y Liêu Niê, djuai ania Êđê dŏ ƀơi buôn M’Suốt, să M’Drăk brơi thâo, kơtưn ngă bruă čơkă mông Jơnum, neh met wa gir pla tơbâo, ngă kơphê, tiu, sâu riêng, rông bui rơmô, prăk hơmâo tui mơn, yua hnun mơn tơlơi hơdip đĭ đăi gŏ amŏ. Ră anai grup ping gah ƀu hơmâo dong tah sang anŏ rin, abih bang plơi dŏ glăi 11/172 boh sang rin. Anăp nao Jơnum ruah khua ping gah dêh čar tal 14, mơnuih ping gah Y Liêu Niê čang rơmang lu biă:“Neh met wa kiăng Ping gah hăng Kơnuk kơna lăng ba, tuh pơ alin pơkra jơlan nao rai hiam hloh, ia hơdjă, pơkra bơnư̆ kŏng ia, sang hră, sang ia jrao; laih dong hơmâo lu hơdră djru neh met wa djuai ania ƀiă hrăm hră, hrăm bruă, hơmâo bruă mă hơđong, mơ̆ng anun djru akŏ pơdong plơi pla jai hrơi pơdrong sah, đĭ kyar”.

Mơnuih kơhnâo gru đưm yă Hring Mlô, 58 thun, djuai ania Êđê dŏ pơ ƀuôn M’Găm, să M’Drăk brơi thâo, rơwang thun rơgao, yua hơmâo Ping gah hăng Kơnuk kơna hrŏm hăng tơlơi gir mơ̆ng neh met wa, tơlơi hơdip mơnuih ƀôn sang amăng plơi jai hrơi đĭ tui, tơlơi pơmin pran jua hơmâo hơđong mơn. Sit pô ñu ăt jing tha amăng plơi mơn, leng kơ gir djă pioh bruă rơwơi mơñam eng ao, tơkŏng tơpai čeh, ƀudah djă pioh gru grua pơkŏn...ƀu pioh rơngiă hĭ ôh. Khă hnun, kiăng bruă răk pioh hơmâo djă lui kjăp, tơdơi kơ mông Jơnum, ñu kiăng djŏp gưl, anom bruă lăng ba, hơmâo tơlơi djru lăp djơ̆, pơlir bruă đĭ kyar tuai hyu čuă ngui amăng plơi hăng bruă djă pioh, pơtrut tui gru grua hiam mơ̆ng djuai ania ÊĐê. Yă Hring Mlô lăi:“Hmua sang anŏ gơmơi hơmâo jơlan Đông Trường Sơn, đuăi găn nao hăng 1,4 ha lŏn hơmâo pla kơphê laih, hơmâo boh troh, hơmâo pơdong sang kyâo glông. Kâo thâo tơkŏng tơpai čeh, thâo mơñam mrai, hăng thâo mơna hơbai añăm mơ̆ng djuai ania Êđê gơmơi. Tơdơi kơ mông Jơnum, čang rơmang djŏp gưl, anom bruă djru ba kiăng sang anŏ gơmơi hăng neh met wa amăng ƀuôn M’Găm anai đĭ kyar čơkă tuai nao ngui amăng plơi, hrŏm hơbit hăng bruă djă pioh mơñam eng ao, atông čing. Ră anai, jơlan hiam baih, bruă čơkă tuai nao ngui jing gêh găl hloh mơn, samơ̆ kiăng hơmâo tơlơi djru, tơlơi črâo ba mơ̆ng Ping gah hăng Kơnuk kơna”.

Kiăng khua hlăk ai să M’Drăk Y Khương Mlô brơi thâo, hlăk ai rơnuk anai hơmâo lăng jing “tơngan gah hnuă mơ̆ng Ping gah”, biă ñu tơdơi kơ pơmut hrŏm gong gai. Čơkă hrơi Jơnum ruah khua ping gah dêh čar tal 14, hlăk ai tơdăm dra să M’Drăk gir ngă lu bruă sit nik. Rơbêh 2.550 čô hlăk ai kih rơmet, akă yol hla gru čar, tĕp bơnal băng rôn, pano pôr pơthâo kơ mông Jơnum. Biă ñu, mơ̆ng blan 7/2025 truh ră anai, hơdôm pluh rơbâo wơ̆t hlăk ai pơtô brơi neh wa ngă hră pơ-ar, pơmut VNeID, djru ba gong gai dưi ngă bruă bơbruai. Čơkă mông Jơnum ruah khua Ping gah dêh čar tal 14, ayong Y Khương Mlô čang rơmang:“Tơdơi mông jơnum ping gah dêh čar tal 14, kâo čang rơmang hlăk ai gơmơi hơmâo hrăm tui, thâo hluh hloh, hơmâo tơlơi gum djru, lăng ba đah mơ̆ng thâo lu tơlơi phrâo dong, gêh găl či pơtrut tui tơlơi pơčeh mă yua boh thâo mrô; laih dong gum djă pioh, pơtrut tui gru grua đưm hăng hơdôm jơlan hơdră pioh kơ hlăk ai, tơdăm dra”.

M’Drăk hơmâo rơbêh 22.000 čô mơnuih, giắm 40% lĕ mơnuih ƀôn sang djuai ania ƀiă; Ping gah să hơmâo giăm 1.200 čô mơnuih ping gah jơnum ƀơi 56 khul ping gah. Hăng pran đăo kơnang kơ Ping gah hăng Jơnum ruah khua ping gah dêh čar tal 14, mơ̆ng ping gah, mơnuih ƀôn sang truh pơ hlăk ai tơdăm dra leng kơ kơtưn ngă bruă, djă pioh gru ama grua amĭ, djru akŏ pơdong gong gai plơi pla kjăp kơtang, čang rơmang kơ sa mông Jơnum ruah khua ping gah truh kih, pok rai rơwang thun đĭ kyar phrâo kơ ană plơi pla./.