Hơdôm bôh tơring čar Dak Nông, Lâm Đồng hmâo laih tơlơi lăi pơthâo glăi bôh tơhnal bruă mă tơlơi gum pơhiăp mơnuih ƀôn sang kơ bruă pơmut hrŏm tơring čar. Tui Tơlơi pơsit mrô 759 lơ 14/4 mơ̆ng Khua dêh čar, tơring čar Lâm Đồng amra pơmut hrŏm hăng tơring čar Dak Nông hăng Bình Thuận, mă anăn tơring čar Lâm Đồng; anih anom phun tơring čar pơkă hlâo ƀơi Đà Lạt. Tơring čar Lâm Đồng phrâo tơdơi kơ pơmut hrŏm hmâo kual lŏn prong 24.233 km2 – jing tơring čar hmâo kual lŏn prong hloh đơ đam dêh čar, mrô mơnuih ƀôn sang 3.324.400 čô mơnuih. Lơ 22/4, Gơnong bruă kơđi čar tơring čar Lâm Đồng hmâo lăi pơthâo glăi bôh tơhnal mă tơlơi gum pơhiăp mơnuih ƀôn sang pơ ala kơ sang anô̆ kơ dưm dăp anom mă bruă čar gưl tơring čar hăng dưi dăp gưl să. Kiăo tui anun, gong gai plơi prong hmâo pơphun mă tơlơi gum pơhiăp mơ̆ng rơbêh kơ 320.000 čô mơnuih ƀôn sang amăng tơring čar. Bôh tơhnal, hmâo rơbêh 97,8% mrô mơnuih ƀôn sang pơ ala kơ sang anô̆ tŭ ư bruă pơmut 3 bôh tơring čar Lâm Đồng, Bình Thuận, Dak Nông. Mrô mơnuih ƀôn sang tŭ ư bruă pơmut hrŏm dưm dăp anom mă bruă čar gưl să lĕ rơbêh lơ 97,3%.

Tui lăi pơthâo mơng tơring čar Dak Nông, hơmâo rơbêh 97,2% mrô mơnuih ƀôn sang amăng tơring čar tŭ ư hăng bruă pơmut tơring čar Bình Thuận, Lâm Đồng. Hlâo anun, hơdôm boh ƀôn lan amăng tơring čar Dak Nông hơmâo ba hyu hră pơ-ar mă tơlơi pơgôp hiăp ƀơi giăm 150.000 boh sang anŏ, ngă gêh gal brơi hloh kơ mơnuih ƀôn sang pơdah tơlơi pơmĭn mơng ƀing gơñu. Tui hơduah ĕp brơi ƀuh, abih bang mơnuih ƀôn sang lêng kơ tŭ ư hăng bruă pơmut tơring čar Dak Nông-Bình Thuận-Lâm Đồng. Mrô mơnuih ƀôn sang tŭ ư pơmut hrŏm gưl să lĕ rơbêh 97%. Him lăng tơring čar Dak Nông amra dưm dăp pơhrŏ mơng 71 anih anom gưl să, dŏ 28 bôh să.