Tơhan kông an tŭ mă, ngă hrŏm lu anom bruă kơnuk kơna, mơnuih tơpuôl khul grup, pơtô lăi, jak iâu ană plơi anăm pơkra mă ôh phao kơtuang, djă pioh boh pơtuh hăng mă yua tă tăn ngă hŭi rơhyưt sat răm, kiăng pơgang hơđong rơnuk rơnua.

Să giam guai dêh čar či Ia Nan, tơring glông Đưk Kơ, tơring čar Gia Lai hơmâo rơbêh 8000 čô mơnuih ƀôn sang djuai ƀiă dŏ. Anih anom, plơi pla dŏ hui dui, lu mơnuih ƀôn sang pơkra mă phao kơtuang pơnah hlô mơnong amăng glai. Trung tá Đỗ Giang Nam, Khua kông an să Ia Nan, tơring glông Đưk Kơ, tơring čar Gia Lai brơi thâo:

“Ƀơi să Ia Nan hơmâo 3 boh plơi mơnuih ƀôn sang djuai ƀiă, lu kơ mơnuih ƀôn sang ngă hmua kơdư đôč. Hmư̆ lăi, mơnuih ƀôn sang djă pioh pơdŏp lui phao kơtuang, boh pơtuh pioh hyu đŏm bua lua bơnah amăng glai treng gah hmua. Kông an ngă hrŏm ƀing tơhan pơgang guai dêh čar, tơhan plơi, hyu jak iâu, pơtô lăi ƀing hlăk ai, mơnuih ƀôn sang anăm pơkra mă ôh phao kơtuang kom hyu đŏm bua lua pơnah ră anai”.

Ƀing khua mua kông an ngă hrŏm tha plơi, mơnuih arăng đăo kơnang pioh hyu jak iâu, pơtô ƀing ba yua phao kơtuang, brơi jao glăi kơ tơhan kông an abih yơh, ƀu dưi djă pioh, mă yua phao kơtuang ôh. Kah hăng ơi Rčom Míu, mơnuih arăng đăo kơnang amăng plơi Nŭ, să Ia Nan, sit jơnum plơi pla hlong djru pơtô lăi brơi ngă tui djơ̆ jơlan hơdră tơlơi phiăn kơnuk kơna, dŏ hơdip mơda, thâo khăp pơpŭ nao rai, djru amăng bruă mă ngă hmua pla pơjing, anăm djă pioh ôh phao kơtuang, boh pơtuh, wơ̆t hăng phao kơtuang pơkra mă pô hai.

“Mă yua phao kơtuang phrâo anai, gơmơi pơtô lăi, brơi jao glăi kơ să abih, yua kơ sit mơñum tơpai măt, tơpai ruă čuă tơba, hil rơ̆t tơdruă, djă phao pơnah tă tăn, anun yơh kông an hăng tơhan pơgang guai dêh čar hyu pơtô lăi, brơi mơnuih ƀôn sang lui hĭ phao kơtuang ngă hŭi rơhyưt kơñ hơmâo tơlơi truh răm ƀăn drơi jăn pô hăng sang anŏ”.

Thiếu tá, Nguyễn Thành Duy-Kơ-iăng khua kông an să Ia Dom, tơring glông Đưk Kơ brơi thâo, hrŏm hăng bruă pơtrut tui bruă jak iâu pơtô pơblang, tơhan pơgang guai dêh čar khom thâo tañ tơlơi pơhing pơ plơi pla, pơtrut tui tơlơi glăm ba mơ̆ng ană plơi kiăng pơgang rơnuk rơnua hơđong:

“Kông an să hrom hăng djop anom bruă mut hrŏm ngă bruă hyu pơtô lăi, jak iâu ană plơi pla djop plơi, brơi jao glăi phao kơtuang, boh pơtuh. Hơmâo mơ̆n tơlơi tơnap lĕ hơdôm čô hlăk ai blơi anŏ pơkra ming, dưm truă mă pơkra phao kơtuang laih anun hyu sĭ pơthâo tơlơi pơhing amăng plang internet, gơñu hyu blơi mă hơjăn pơdop ƀu thâo ƀuh ôh. Kông an să hơmâo mă hĭ 2 mơta gơnam pơkra ming phao hăng jao glăi kông an tơring glông pioh pơsir kơđi tơlơi soh djơ̆ hăng tơlơi phiăn”.

Mơ̆ng akŏ thun truh ră anai, mơnuih ƀôn sang hơmâo jao glăi kông an tơring glông Đưk Kơ abih bang rơbêh 70 ƀĕ phao kơtuang hăng boh pơtuh, gơnam yua pơkra rai phao kơtuang....