![VOV/Siu H' Prăk pơblang](/themes/custom/vov_4/images/avatar.png)
Giăm hmâo 6000 grŭp (hăng rơbêh kơ 250.000 wot čô mơnuih), hăng khua pơ ala kơ Khua git gai Ping gah, Kơnuk kơna, hơdôm grŭp, ding jum, gơnong bruă, khul grŭp, tơring čar, ƀôn prong, anom bruă, hơdôm khul ling tơhan mơnuih ƀôn sang, hơdôm Khul pơtom hiăp, khua pơ ala hơdôm khul grŭp hăng gơyut gơyâo jar kơmar, neh wa hmâo nao jôk, mơ-ĭt guang bơnga, rơngôt hrŏm sang anô̆ Khua git gai Ping gah ơi Nguyễn Phú Trọng.
![Mơnuih ƀôn sang dŏng bă dua bơnah jơlan ba Khua git gai Ping gah dêh čar nao](https://vov4-media.solidtech.vn/sites/default/files/styles/large/public/2024-07/27-7%20nhan%20dan%20tien%20dua.jpg)
Amăng tơlơi pơmin mơ̆ng lu mơnuih lơm bâo nao Khua git gai Ping gah, abih bang gơñu pơdah pran jua pơpŭ, hning rơngôt sa čô rơgơi mơbruă, hơdip hiam, abih pran jua tuh rơyuh kơ bruă pơdŏng hăng pơđĭ kyar lŏn ia. Lu mơnuih ƀôn sang lăi lĕ, Khua git gai Ping gah ơi Nguyễn Phú Trọng lĕ sa čô khua git gai hmâo lu tơlơi găn rơgao, run abih pran jua, bôh thâo mơ̆ng pô kơ bruă lŏn ia, jê̆ giăm hăng mơnuih ƀôn sang, neh wa. Bơ̆ hăng hlăk ai ră anai, lu gơyut brơi thâo hăng hơdôm tơlơi gum hơgôp hăng pran tuh rơyuh ƀu pơdơi kơ tơlơi pơđĭ kyar lŏn ia, Khua git gai Ping gah ơi Nguyễn Phú Trọng jing gru ba jơlan hlâo, jing anô̆ ngă pơhưč prong pioh hlăk ai hrăm hăng ngă tui. Hăng hơdôm bruă mă rơđah, rơnuk hlăk ai ră anai kiăng hrưn đĭ, pơhrăm tui gru klă, pran jua hiam mơ̆ng Khua git gai Ping gah dêh čar pioh jing sa čô mơnuih klă, hmâo lu tơlơi tuh rơyuh kơ mơnuih mơnam. Pô amăng khul hlăk ai A Tống Tiến Quân, mă gah Grŭp pơphun bruă, Khul hlăk ai tơring čar Kon Tum brơi thâo, blan 7 thun anai, hrŏm hăng đơ đam dêh čar ba Khua git gai Ping gah ơi Nguyễn Phú Trọng nao pơ̆ dêh čar atâo hăng hơdor tơngia kơ hơdôm gum hơgôp mơ̆ng Khua git gai Ping gah dêh čar, drơi pô jai hmâo pran pơtrut pơhrăm, hrưn đĭ:
“Wa Nguyễn Phú Trọng lĕ sa gru than prong pioh hlăk ai hrưn đĭ jing sa čô mơnuih hlăk ai klă, pơgi kơdih anai lĕ sa čô mơnuih ping gah hmâo pran anăp nao tơpă, gir run djru tŭ yua kơ lŏn ia pô. Pơblang bruă kơđi čar hăng kông ngăn Wa pioh glăi rơnuk hlăk ai ƀing gơmơi amra gir run hrưn đĭ, ngă tui amăng bruă mă mơ̆ng pô”.
![Hlăk ai plơi Lại Đà ba Khua git gai Ping gah dêh čar nao](https://vov4-media.solidtech.vn/sites/default/files/styles/large/public/2024-07/27-7_tren_tuyen_pho_1_0.jpg)
Sa rơnuk Khua git gai Ping gah ơi Nguyễn Phú Trọng hmâo ngă laih yua kơ mơnuih ƀôn sang, yua kơ lŏn ia, sa čô mơnuih kơsem min tơlơi pơmin, bôh thâo đưm, git gai, sa kơnuih prong prin, wot amăng tơlơi hơdip, tơpă hăng ư-ang. Khă Khua git gai Ping gah ơi Nguyễn Phú Trọng đuăi lui ƀing ta laih, samơ̆ hơdôm kông ngăn mơ̆ng Khua git gai Ping gah pioh glăi amra pơđom pioh amăng pran, tơlơi pơmin mơ̆ng rim mơnuih Việt Nam hăng tơlơi pơpŭ kiăng khăp mơ̆ng gơyut gơyâo jar kơmar./.
Viết bình luận