Mơ̆ng lơ 15/11 thun hlâo, Khul mơnuih ngă hmua amăng tơring čar hơmâo jak iâu pơphun bơkơtuan mă bruă yom phara pơtrun pơ djop gưl khul mơnuih ngă hmua hăng abih bang ding kơna amăng khul đơ đam tơring čar. Amăng 1 thun laih rơgao, mơnuih ngă hmua amăng tơring čar hơmâo ngă tui giăm 1.100 ring bruă, črăn bruă. Ƀrô djơ̆ tal anai, Khul mơnuih ngă hmua tơring čar Dak Lak apah bơni kơ 21 boh sang bruă hăng mơnuih mă bruă hur har hơmâo ba glăi boh tŭ yua amăng tal bơkơtưn mă bruă čơkă mơak hơdor glăi tal 120 thun Hrơi akŏ pơdong tơring čar Dak Lak.

Jao hră pơsit brơi “Gơnam sĭ mơdrô mơ̆ng đang hmua ba gru hiam tơring čar thun 2024”, brơi kơ 25 mơta gơnam mơ̆ng 23 grup, anom bruă hăng mơnuih ngă ding kơna amăng tơring čar. Ba pơdă lăi pơthâo rơbêh 200 mơta gơnam đang hmua hiam, tŭ yua, gơnam yua mă bruă, ngă hmua hơmâo ba yua boh thâo ia rơgơi phrâo laih anun ngă hmua rơgoh hơdjă huăi pruai hơbâo, kơmơ̆k ia jrao mơ̆ng djop gưl khul mơnuih ngă hmua ƀơi 15 boh tơring čar, plơi prong.