Hơdôm hrơi anai, lơ̆m truh mơmot, ƀơi să Ea Drăng, tơring čar Dak Lăk, hơdôm glông jơlan akă hla gru čar hrŏm hăng apui hrĭp pơ-iă yang hrơi jă rơđah bơngač, pơjing rai anŏ pơplih phrâo biă kơ lu boh plơi pla. Ƀơi ƀuôn Lê B, jơlan anai glông năng ai 3km, hlâo adih kơnăm mơmot biă, ƀu hơmâo đơi ôh mơnuih tơbiă hyu, ră anai hơmâo apui jă bơngač. Dua bơnah jơlan, hla gru čar hơmâo akă yôl đĭ ƀơi djŏp sang. Ơi Nhan Ngọc Tấn, Khua khul mơnuih ngă hmua ƀuôn Lê B brơi thâo, tơlơi pơplih anai jing hơmâo mơ̆ng pran jua djơ̆ hrŏm, gum ngă mơ̆ng abih bang mơnuih ƀôn sang: “Mơ̆ng bruă iâu pơthưr, jing neh met wa ăt kah hăng mơnuih amăng khul leng kơ tŭ ư soh. Mơ̆ng hrơi hơmâo jơlan hla gru čar, jing anih anom ƀơi ƀuôn Lê B hiam hloh, râu mơdưh amăng rim čô mơnuih ƀing gơmơi pran jua khăp kơ lŏn ia”.

Ƀu kơnong pơkra jơlan hơmâo apui rơđah đôč ôh, lu mơnuih amăng khul ngă hmua ƀơi să Ea Drăng ăt hyu kih rơmet jơlan re se mơn, pla bơnga ƀơi dua bơnah jơlan, duñ, kah hĭ asuk ruk phara. Tui hăng yă Vũ Thị Thúy Hòa, Khua khul mơnuih ngă hmua să Ea Drăng, tơlơi yom hloh lĕ râu mơdưh tơlơi gơgrong ngă bruă mơ̆ng mơnuih ƀôn sang amăng hơdôm hơbô̆ bruă wai lăng mă pô hăng bruă mă rơđah rơđông, ƀơ ƀrư̆ pơplih ƀô̆ mơta plơi pla laih anun tơlơi pơmin răk pioh anih hơdip hiam, hơdjă amăng plơi pla: “Ƀu dŏ tơguan, kơnang đơi lu tơlơi djru ba mơ̆ng kơnuk kơna ôh, gơmơi iâu pơthưr ană plơi gum ngă bruă hơdôm bruă mơ̆ wai lăng mă pô, kah hăng wai lăng jơlan nao rai, apui tŭi ƀơi jơlan, ăt kah hăng kah hĭ phara djah yua laih anun mă hĭ djŏp djah yua, ia hơƀak hŭi rơhyưt”.

Ƀơi phường Buôn Hồ, tơring čar Dak Lăk, djŏp gưl Khul mơnuih ngă hmua ăt iâu pơthưr mơnuih mơnam duñ pơƀut asuk ruk, kơdung pioh ia jrao pơgang phun pla tơdơi kơ mă yua, hơdôm glông jơlan mơtah - agaih - hiam laih anun hơdư̆ ƀiă mă yua ia rjao lơ̆m ngă hmua. Phrâo anai, hơbô̆ bruă “Khul mơnuih ngă hmua wai lăng mă pô anih hơdip ayuh hyiăng” hơmâo ngă ƀơi ƀuôn Tring 1 hăng ƀuôn Tring 2, hơmâo mơnuih ƀôn sang tŭ ư biă. Ơi Y Tích Mlô, dŏ ƀơi ƀuôn Tring 2, phường Buôn Hồ brơi thâo: “Ƀing gơmơi mơak hăng bơni biă kơ tơlơi lăng ba mơ̆ng Khul mơnuih ngă hmua, djru blơi kơthung tuh asuk hăng apui lơtrik hrip pơ-iă yang hrơi tŭi rơđah plơi pla lơ̆m mơmot. Gơmơi gir kih rơmet anih anom kiăng hiam, lain anun gir pơgang ayuh hyiăng anih hơdip kiăng plơi pla jai hrơi mơtah, agaih, hiam hloh”.

Amăng tơring čar Dak Lăk ră anai glăk hơmâo 187 hơbô̆ bruă mơnuih ngă hmua gum pơgang anih hơdip, ayuh hyiăng, nao hrŏm hăng bruă man pơdong plơi pla phrâo. Lu boh tơring hơmâo jơlan rơđah - mơtah - agaih - hiam, pok prong bruă kah hĭ asuk pơ anih tuh djah, duñ pơƀut djah yua ngă hmua hăng mă yua djah djâo hla kyâo bơbrŭ či pruai kơ phun pla. Ơi Ya Toan Êñuôl, Khua khul mơnuih ngă hmua tơring čar Dak Lăk brơi thâo, tơlơi kiăng biă ñu mơ̆ng hơdôm bruă ngă anai lĕ ƀu kơnong pơhrup hiam plơi pla đôč ôh, ăt kiăng akŏ pơjing plơi pla hơdip hiam, thâo pơmin, hơđong kjăp, amăng anun mơnuih ƀôn sang yơh gơgrong phun: “Khul leng kơ pơsit rơđah man pơdong plơi pla phrâo lĕ mơnuih ngă hmua yơh pô ngă, bơ khul lĕ pô pơphun brơi, ba jơlan hăng pơtruh nao rai. Pơphun ngă bruă rơđah rơđông, jao bruă djơ̆ mơnuih, djơ̆ bruă kiăng ngă, đah mơ̆ng hơmâo anŏ kơtang, anŏ gêh găl, pơlir hăng man pơdong plơi pla phrâo, pơđĭ tui tơlơi hơdip mơ̆ng mơnuih ƀôn sang”.

Ƀơi hơdôm boh plơi pla mơ̆ng Dak Lăk hrơi anai, tơlơi pơplih ƀu kơnong ƀơi hơdôm glông jơlan hơmâo apui rơđah hloh ƀudah hiam hloh ôh, ăt pơƀuh hăng bruă mơnuih ƀôn sang thâo pơmin mă pô, gum hrŏm răk rơmet anih gơñu glăk hơdip. Mơ̆ng bruă ngă hmua, pơkra gơnam, hơdip mơda, gơñu thâo pơmin hloh kiăng ngă brơi anih hơdip hiam, agaih, djru pơplih phrâo plơi pla jai hrơi mơtah, agaih, hiam hloh./.