Hrŏm hăng sa dua tơlơi gum pơhiăp, rơkâo đĭ tơlơi Jơlan mrô 27 răm tui, ia ling dăo ƀơi sa dua bit anih lơm hmâo hơjan, kơƀah hnal lăi pơthâo ba truh tơlơi huĭ rơhyưt kơ mơnuih hăng rơdêh nao rai ƀơi jơlan glông; glông hrĕ apui lơtrik ƀơi tơring čar rơgao hơnong, apui tơdu ƀu djop yua kơ bruă bơwih ƀong huă hăng tơlơi hơdip mơda rim hrơi; djah tuh hyu đơr hơr ngă hơƀak anih anom dô̆; hlăt kơbuă sĭ kơ mơnuih rông ƀu pơhlôm klă hiam, ƀu hmâo suai ngă răm rai prong gah bruă bơwih ƀong... Mơnuih pơ ala kơ mơnuih ƀôn sang să Bình Thạnh, tơring glông Đức Trọng biă ñu đing nao truh tơlơi pơmut hrŏm tơring čar, pơmut hrŏm să, rơbô̆t glông bruă Kơnuk kơna, lui hĭ gưl tŏng krah.

Mơnuih pơ ala kơ mơnuih ƀôn sang Đinh Công Hoán, ƀơi plơi Thanh Bình 3, să Bình Thạnh, tơring glông Đức Trọng, tơring čar Lâm Đồng lăi lĕ, hơdră pơtrun pơmut hrŏm să, tơring čar, rơbô̆t glông bruă čar dưi hmâo mơnuih ƀôn sang tŭ ư, čang rơmang. Khă hnun hai, lơm pơmut hrŏm, pơphun mă bruă khom ruah mă mơnuih apăn bruă sit nik thâo rơgơi, hmâo pran juă klă, mă bruă hiam.

 “Hơdră pơtrun pơmut hrŏm kiăng rơbô̆t ƀirô Kơnuk kơna, plai ƀiă gun gan, prăk apah kâo tŭ ư hrŏm biă. Samơ̆, kiăng glông jơlan mă bruă čar dưi ngă ba glăi bôh tơhnal lĕ, bruă pơsit bôh thâo mơnuih apăn bruă khom djơ̆ tui tơlơi rơkâo hăng pơpha djơ̆ bôh thâo pioh gơgrong bruă git gai hluh gah. Tơlơi dong lĕ bruă pơtô pơhrăm gah tơlơi pơmin, bruă jao, pran jua khom lăng yôm, kiăng djơ̆ hăng bruă jao tui tơlơi rơkâo bruă kơđi čar khom ba tơbiă”.

Mơnuih pơ ala kơ mơnuih ƀôn sang să Bình Thạnh, tơring glông Đức Trọng, tơring čar Lâm Đồng čang rơmang Khua pơ ala mơnuih ƀôn sang dêh čar, Kơnuk kơna tañ ngă giong pơplih pơkra, akô̆ pơjing Phiah phiăn, tơlơi phiăn... pioh djơ̆ tui tơlơi kiăng pơđĭ kyar phrâo mơ̆ng lŏn ia, djơ̆ tui hăng plơi pla. Mơnuih pơ ala kơ mơnuih ƀôn sang pơdah pran jua tŭ ư hăng Ping gah dêh čar kơ rơbô̆t khul mă bruă, pơjing glông jơlan mă bruă gong gai 2 gưl, ngă tui bruă pơmut hrŏm tơring čar, lui hĭ gưl tơring glông... Khă hnun hai, neh wa ăt pơdah mơn tơlơi bơngot kơ bruă pơkă hlâo pơmut gưl să pơ̆ anăp anai hiưm ñu, pơdah tơlơi bơngot kơ pơmut hrŏm tơring čar prong đơi, glêh tơnap, ơi Phan Đình Trạch pơsit yôm hơdôm tơlơi gum pơhiăp tơpă, gơgrong mơ̆ng mơnuih pơ ala kơ mơnuih ƀôn sang. Hrŏm hăng anun, djă pioh tơlơi gum pơhiăp mơnuih pơ ala kơ mơnuih ƀôn sang lăi nao hăng rơkâo gong gai plơi pla pơsir hơdôm bôh yôm gah pô dưi. Hăng bruă pơmut tơring čar, pơmut să, ơi Phan Đình Trạc pơtŏng sit hơdră pơtrun anai ƀu kơnong kơ rơbô̆t glông bruă Kơnuk kơna, bruă mă tŭ yua ba glăi bôh tơhnal ôh mơ̆, ñu dô̆ pơjing rai anih anom, pran pơtrut phrâo pioh pơtrut pơđĭ kyar lŏn ia.

Gah tơlơi bơngot mơ̆ng mơnuih pơ ala kơ mơnuih ƀôn sang gah bôh thâo mơnuih apăn bruă pioh djơ̆ tui tơlơi kiăng tơdơi kơ pơmut hrŏm, ơi Phan Đình Trạc bơni pran jua anai mơ̆ng neh wa hăng anai jing sa amăng hơdôm bôh yôm mơ̆ Ding jum kơđi čar, Grŭp  mă bruă Ping gah dêh čar đing nao hăng pơsit jơlan gah. Tui hăng pran jua “đuăi rah, dăp glông rah” samơ̆ pơhlôm djơ̆ tui tơlơi pơkă, anô̆ kơjăp, biă ñu hơkrŭ pơsir tơlơi akă gal gah tơlơi pơkă; pơpha gưl tơlơi dưi kơtang nao pơ̆ plơi pla, ngă mă pô gơgrong mă pô, khin pơmin - khin ngă - khin gơgrong, mơ̆ng mơnuih apăn akô̆, hơkrŭ tơlơi pơtrut nao rai, bĕ hĭ. Ơi Phan Đình Trạc pơtŏng sit:

“Dưm dăp hiưm hơpă Ping gah dêh čar pơpha tơlơi dưi kơtang kơ tơring čar hăng plơi pla pioh plơi pla pơsit, plơi pla ngă hăng plơi pla gơgrong. Gưl tơring čar apăn bruă biă ñu ngă rah tơlơi pơtrun, hơdră bruă mơ̆ng Ping gah dêh čar, jing gưl mă yua rah hơdră bruă, laih anun ƀơi anăp črâo ba, wai lăng abih bang bruă mă gưl să amăng tơring čar. Gưl să ngă tui hơdră bruă mơ̆ng Ping gah dêh čar hăng mơ̆ng tơring čar mă yua, hăng dưi kơtưn pơpha gưl, pơpha tơlơi dưi, pơsir hơdôm tơlơi gah tơlơi dưi mơ̆ng gưl să. Gưl să rơkâo lĕ khom giăm mơnuih ƀôn sang, kiăo tui mơnuih ƀôn sang, pơsir djop tơlơi kiăng mơ̆ng mơnuih ƀôn sang hmao tlôn”.

 Tal anai, brô djơ̆ tal hơdor glăi 50 thun Hrơi tlaih rơngai kual Dơnung dêh čar, pơlir hơbit lŏn ia (30/4), ơi Phan Đình Trạc pơ ala kơ Grŭp khua pơ ala mơnuih ƀôn sang dêh čar tơring čar Lâm Đồng hmâo ƀơk laih 10 anung gơnam, rim anung gơnam hmâo nua sa klăk prăk, brơi hơdôm bôh sang anô̆ gah hơdră bruă, mơnuih djru ngă hơhrŭ đưm hăng ngă hơkrŭ, ling tơhan rơka ruă ƀơi să Bình Thạnh, tơring glông Đức Trọng. Gơnam tam kiăng hmao tlôn pơsur, hơdor tơngia pran jua tuh rơyuh prong prin mơ̆ng abih bang ling tơhan pơsăn drơi, rơka ruă, sang anô̆ djru ngă hơkrŭ đưm hăng ngă hơkrŭ brơi kơ tơlơi hơdip dưi pô, trơi pơđao, yâo mơ-ak hrơi anai./.