Phrâo ba ƀing tuai nao čuă lăng hơdôm anih anom tuai čuă ngui ƀơi Buôn Trí B, să Krông Na, tơring glông Buôn Đôn, amai Sáo Bun Trâm Adrơng brơi thâo, thun anai ñu giăm hmâo 30 thun laih, hăng ñu lĕ ană mơ̆ng sa bôh sang anô̆ hmâo amĭ lĕ djuai ania Lao, ama lĕ Êđê. Ñu ruah bruă ba tuai hyu čuă ngui yua kơ ñu hor ba tuai hyu čuă lăng ƀơi hơdôm ară jơlan amăng plơi pla, lăi pơthâo kơ gơñu tơlơi hơdip mơda, gru bôh thâo hăng phiăn juăt mơng neh wa glăk dô̆ hơdip mơda ƀơi kual lŏn Buôn Đôn anai:

"Djă amăng drơi dua djuai drah Lao hăng Êđê, kâo ruah laih bruă pơtô ba tuai hyu čuă ngui hăng čang rơmang lăi pơthâo bôh thâo djuai ania pô truh hăng lu mơnuih thâo hloh. Pơ̆ anăp anai, kâo kiăng lăi pơthâo kơ djop mơnuih lu hloh kơ phiăn juăt mơng dua djuai ania pô, biă ñu djuai ania Lao, hmâo lu phiăn ngă yang, ƀu djơ̆ kơnong kơ Tết Bunpimay đôč ôh dô̆ hmâo tơlơi jơnum ngui blan 6, blan 12 rim thun dong”.

Ƀơi Buôn Đôn, tơlơi mơnuih Lao dô̆ kơ mơnuih Bơnông, Êđê ƀu ƀiă ôh. Gơñu pơhrua hrŏm gah bôh thâo, bôh pơhiăp anun tơnap biă thâo krăn mơnuih Lao ƀudah mơnuih ƀơi anai hơđăp. Ayong Khăm Phon Lào, Khua Anom bruă đang hmua hăng pơđĭ kyar ƀôn lan tơring glông Buôn Đôn, mơnuih mơ̆ng Khul giăng mah Việt – Lao tơring glông Buôn Đôn brơi thâo:

 “Amăng sang anô̆ ră anai dô̆ bơnai, dô̆ rơkơi jing 7 djuai ania. Djuai ania Êđê hmâo, Jarai hmâo, Hrê hmâo, Yuan hmâo anun lom dô̆ hơdip hrŏm sa bôh sang lĕ brơnôm biă. Mơng tơlơi dŏ dŏng ƀong huă laih anun bôh pơhiăp leng kơ hmâo hơdôm tơlơi hrăm nao rai tơdruă amăng bôh thâo mơng rim djuai ania. Yap biă ñu, mơ̆ng muai hăng prong đĭ ƀơi Buôn Trí lĕ leng kơ thâo mơ̆ng 2 truh 3 tơlơi pơhiăp, hmâo ƀing đa thâo kreč lĕ pơhiăp truh 5-6 tơlơi pơhiăp”.

Ơi Bun Mi Lào, thun anai giăm hmâo 70 thun, dô̆ hơdip mơda ƀơi Buôn Trí B, să Krông Na, tơring glông Buôn Đôn lăi pơthâo, khă ƀing Lao rai dô̆ pơ̆ anai blung a ƀơi Buôn Đôn rơngiă laih, samơ̆ ƀing rơnuk tơdơi mơ̆ng djuai ania Lao ƀơi să Krông Na ăt tô nao rai mơn, tŭ mă, djă pioh hơdôm gru grua yôm phăn klă hiam mơ̆ng mơnuih Lao hăng hơdip hrŏm brơnôm mơ-ak klă, pơhrua nao rai bôh thâo hăng djop djuai ania ƀơi anai anun tơlơi kiăng khăp jai hrơi jai kơjăp phik:

 “Ƀơi anai bơwih ƀong ăt amuñ mơn, laih anun adơi ayong thâo jum nao rai, hmâo tơlơi hơget tơnap tap leng kơ gum djru nao rai tơdruă, lŏn klă čim brim găm. Mơnuih Lao, djuai ania Êđê, djuai ania Bơnông, djuai ania Yuan kah hăng adơi ayong sa bôh sang”.

Tui hăng ơi Phạm Trung Nghĩa, Khua Jơnum min mơnuih ƀôn sang tơring glông Buôn Đôn, Buôn Đôn ră anai hmâo 29 djuai ania dô̆ hơdip hrŏm hăng năng ai ñu 70 rơbâo čô mơnuih, amăng anun ƀing Lao hmâo năng ai ñu 300 čô mơnuih. Mơnuih Lao dô̆ hơdip mơda ƀơi anai dưi hmâo gong gai plơi pla lăng ba ngă gal brơi amăng djop bruă pioh neh wa hơđong pran jua hrăm hră, mă bruă hăng ngă đang hmua pơđĭ kyar bơwih ƀong. Rim thun, amăng hơdôm hrơi Tết tui phiăn juăt mơ̆ng djuai ania Lao, tơring glông leng kơ pơphun tâ̆o klă hăng djơ̆ phiăn juăt.

 “Mơnuih Lao dô̆ hơdip mơda ƀơi tơring glông hmâo 300 thun hăng anai laih. Hrŏm hăng hơdôm hơdră bruă mơng Ping gah hăng Kơnuk kơna lĕ tơring glông ăt hmâo mơn hơdôm tơlơi lăng ba pha ra pioh kơ mơnuih Lao ƀơi anai, ngă hiưm hơpă pơjing bruă mă kiăng mơnuih ƀôn sang dưi pơđĭ kyar ƀơi lŏn anai mơ̆ng pô. Ƀing gơmơi ăt đing nao mơn lu djuai tuai čuă ngui, biă ñu hăng djuai tuai čuă lăng bôh thâo đưm mơ̆ng djop djuai ania, mơnuih Lao ƀơi tơring glông Buôn Đôn ăt lĕ sa amăng hơdôm djuai ania hmâo gru gruă pha ra ha jăn, ƀing gơmơi ăt glăk gir run mơn mă yua hơdôm gru grua anun pioh pơjing hơdôm gru pha ra lơm pơđĭ kyar bruă tuai čuă ngui ƀơi tơring glông".

Ƀing mơnuih Lao glăk dô̆ hơdip mơda mơ-ak klă, gum hrŏm hơbit hăng djop djuai ania pơkon ƀơi lŏn Buôn Đôn, pơjing tơlơi pơhrua hrŏm kơjăp amăng tơlơi hơdip mơda, bôh thâo djru ngă hơđong tơlơi rơnuk rơnua bruă kơđi čar, pơtrut pơđĭ kyar bơwih ƀong ƀơi tơring glông./.