Čơtlăm lơ 20/9, Khua Jơnum min djop djuai ania mơnuih mơnam dêh čar Việt Nam ơi Đỗ Văn Chiến hmâo tŭ mă tơlơi gum djru mơ̆ng Grŭp Ding jum pơtom hiăp dêh čar, hơdôm ƀirô pơ ala bruă pơtom hiăp hăng anom bơwih ƀong amăng lŏn ia ta hăng dêh čar tač rơngiao nao jao prăk gum djru neh wa bơdjơ̆ nao kơthel tal 3 ngă. Tui anun, yap truh 5 mông čơtlăm mơmot lơ 20/9, Grŭp pơsur bruă djru gum dêh čar ta hmâo tŭ mă abih bang mrô prăk lĕ 1.628 klai prăk. Mơ̆ng mrô prăk tŭ mă, Grŭp pơsur gum djru dêh čar hmâo pơhrua nao 1.035 klai prăk pơ̆ 26 bôh tơring čar pioh pơsir tơlơi răm rai.

Pơhiăp amăng mông ngă Lơphet tŭ mă, Khua Jơnum min djop djuai ania mơnuih mơnam dêh čar Việt Nam ơi Đỗ Văn Chiến pơdah pran jua ol kơdol biă lơm tŭ mă hơdôm prăk gum djru tŭ yua mơ̆ng hơdôm bôh anom bơwih ƀong, khul grŭp hăng mơnuih djru neh wa răm rai yua kơthel tal 3 ngă. Mơ-ĭt tơlơi bơni tơpă sit dơlăm truh Khua anih jưh pơ ala kơ dêh čar Khač ƀơi Việt Nam, Khua anih jưh pơ ala kơ dêh čar Thái Lan ƀơi Việt Nam, hơdôm bôh anom bơwih ƀong Khul mơnuih Việt Nam ƀơi dêh čar Thái Lan, Khul mơnuih Việt Nam ƀơi Ukraine hăng neh wa ta pơ̆ dêh čar tač rơngiao, ơi Đỗ Văn Chiến pơkôl mă yua hơdôm mrô prăk djru ƀơi anăp kơ kual răm rai yua kơthel ngă; mă yua djơ̆ bôh than, ba glăi bôh tơhnal, pơdah rơđah, hmâo tơlơi lăng tui mơ̆ng mơnuih ƀôn sang hăng mơnuih mơnam./.