Mông hrăm tơlơi Angle ƀơi anih 11 A4 mơ̆ng nai Phan Mạnh Tiến hmư̆ tơlơi pơhiăp ok or mơak. Yua tơlơi hrăm pơphun hơmâo tơlơi ngui ngor mơak, pơjing mông bưp hăng pơhiăp nao rai, pơčrong sai, pơđao nao rai mơak kơdok kơdor...Adơi Trần Tú Tài, hrăm anih 11 A4 brơi thâo, mơ̆ng nao hrăm pơ sang hră gưl klâo Thực hành Cao Nguyên, ñu hơmâo mut hrŏm lu mông hrăm tơlơi Angle kơdok kơdor mơak djơh hăng anun, djru ñu hrăm amuñ mơ̆n thâo hăng mơak hruaih tŭ ñu hơmâo mă.

“Črăn hrăm lĕ nai pơpha brơi rơđah rơđong hăng kiăo tui rim črăn tơlơi hrăm djru gơmơi tañ thâo hluh hơdôm črăn tơlơi hrăm. Tơdơi kơ anun nai pơtô amra brơi tơlơi hrăm dlông hloh, kiăng ƀing gơmơi hơmâo lu tơlơi hrăm ngă tui tui hăng tơlơi thâo mơ̆ng gơmơi, nai pô djru tui klôn, ĕp lăng hăng pơkra glăi kiăng gơmơi dưi ngă giong tơlơi hrăm djop rim hrơi”.

Lơ̆m ƀing čơđai sang hră gưl klâo hlăk hur har hăng hơdră pơphun anih hrăm tơlơi Angle mơ̆ng nai pơtô thun dŏ hlăk ai Phan Mạnh Tiến, yua djru kơ ngă plai ƀiă hŭi amăng tơlơi hrăm, pơđĭ tui tơlơi tŭ mă tơlơi thâo  amăng djop tơlơi hrăm, ƀing čơđai sang hră gưl prong Đại học Tây Nguyên nao hrăm ngă nai, nao hrăm sit nik pơ anai, ăt ƀuh tong ten hơdră pơtô hrăm phrâo amăng bruă ngă nai pơtô mơ̆ng ƀing gơñu. Gơyut Phạm Thị Thu Hà, čơđai sang hră hrăm gah tơlơi pơhiăp dêh čar tač rơngiao, Sang hră gưl prong Đại học Tây Nguyên kah pơpha:

“Kâo hrăm pơhrua tui lu biă mă mơ̆ng tơlơi thâo hơdră găn rơgao mơ̆ng nai anai kiăng tơdơi adih kiăng hla tui pioh ba yua amăng bruă pơtô hrăm”.

Hăng ƀing čơđai sang hră gưl klâo Thực hành Cao Nguyên, nai Tiến ƀu kơnong jing mơnuih pơtô ba tơlơi thâo đôč ôh, dŏ jing mơnuih pơđing hmư̆, kah pơpha. Lu čơđai sang hră hơduah ĕp ñu lăng kah hăng pô ayong, nao hlâo kiăng  tơña hrăm tui, ñu pơtô brơi hơdră pơmin, pran jua kiăng hơđong sit hrăm, djru kơ lu čơđai hơđong pran jua. Adơi Lê Sỹ Trọng, hrăm anih 11 A5 hơdor glăi tal hrăm tui sit nik, pơphun bruă mă sit nik thâo pơčeh phrâo

“Nai Tiến lĕ mơnuih ngă hrŏm hăng ƀing gơmơi, djru gơmơi amăng hơdră rông mơnŭ phai amăng đang hăng ia jrao akha kyâo. Nai djru ba tong ten biă mă amăng bruă pơphun bruă mă, pơtô brơi gơmơi hyu ĕp, pơtrut pran jua djop mơnuih. Tơdơi kơ sa rơwư̆ ngă tui tơlơi ñu pơtô hăng tŭ yua, tal blung a gơmơi tui tơlơi anun ƀuh mơak biă mă, dưi djơ̆ tơhnal pơkă ƀing gơmơi ƀuh mơak biă mă”.

Hrŏm hrŏm hăng bruă pơtô hrăm, nai Phan Mạnh Tiến dŏ ngă khua khul tơdăm dra mut phung sang hră, hur har biă mă. Rơbêh 10 thun mă bruă amăng sang hră, nai hơmâo pok pơhai lu bruă mă pơyơr pran jua amăng lăm hăng gah rơngiao kơ sang hră. Kah hăng amăng mông hơmâo klin Covid 19 ngă kơ bruă hrăm online tơnap tap, nai lăi pơthâo pơphun pơplông čih hră pơhing ƀlir ƀơi pơnăng hăng điện tử čih hăng tơlơi Angle anăn Hrơi mơak asar čur mah, pơhưč abih bang ƀing nai pơtô gưl prong amăng dêh čar hăng gah rơngiao dêh čar ngă hrŏm. Lu jơlan hơdră djru pran jua yua kơ nai pơphun brơi kah hăng “Têt khăp pap”, “Djru hrŏm bơyan pơplông”, “Tŭi apui diăn hơdor tơngia”, “Jơlan nao pơ anih mriah”, bruă mă djru ba kual guai dêh čar.....hơmâo jao hơdôm rơtuh anung prăk hrăm hră, djru ba lu čơđai sang hră tơnap tap hăng lăi pơthâo lu tơdăm dra mut phung hur har, brơi pơmut ping gah. Ơi Nguyễn Tiến Chương, Kơ-iăng khua sang hră gưl klâo Thực hành Cao Nguyên lăi:

“Nai Tiến jing sa čô nai pơtô thun hlăk ai samơ̆ mă bruă hur har biă mă abih dua mơta bruă, wơ̆t hăng tơlơi pơtô hrăm, ba bruă mă amăng khul tơdăm dra lăi pha laih anun bruă hlăk ai amăng ƀing čơđai sang hră, čơđai gưl prong mă bruă tŭ yua hiam klă. Nai Tiến ăt kơtưn ba yua ia rơgơi AI pioh pơtô hrăm, djă pioh khul grup hrăm tơlơi Angle, pơphun pơplông rơyuh teng leng mah amăng sang hră, ba tơlơi hrăm pơhiăp Angle tui hơdră phrâo, hrăm nao hrŏm hlong ngă tui, ba tơlơi hur har kơ ƀing čơđai hor hloh hrăm tơlơi Angle”.

Hơdôm tơlơi gir run ƀu pơdơi ôh mơ̆ng nai hlăk ai Phan Mạnh Tiến hơmâo čih pioh lăp bơni biă mă. Thun 2023, nai hơmâo mă pri mrô dua nai pơtô gưl tơring čar. Thun 2024, dưi hơmâo sang bruă tơdăm dra mut phung dêh čar apah bơni jing nai pơtô thun hlăk ai ba gru hlâo amăng dêh čar, yua kơ bruă ngă pơtrut pran jua hur har hrăm hră ƀơi mông jơnum “Hlăk ai ba gru hlâo ngă tui tơlơi Wa pơtô” tal VIII thun 2025. Tơlơi pơčeh phrâo anăn “Pơđĭ tui boh pơhiăp phrâo hrăm tơlơi Angle  hăng ia rơgơi AI” mơ̆ng ñu hơmâo pri A gưl sang hră hăng pri C gưl Gơnong bruă pơtô hăng pơjuăt, dưi lăng hơdră pơtô hrăm djơ̆ găl hăng rơnuk ba yua mrô amăng bruă pơtô hrăm. Kah pơpha kơ anăp ngă bruă pơ anăp, nai Phan Mạnh Tiến brơi thâo:

“Ta khom pơblih phrâo hơdră tŭ mă, ngă hiư̆m pă hơmâo lu bruă mă brơi kơ ƀing čơđai ngă hrŏm hur har laih anun ba glăi boh tŭ yua. Hrăm tơña hơdôm hơbô̆ bruă pioh pơphun lu bruă mă brơi čơđai đing nao, khăp kiăng hnun kah ta pok pơhai lu hăng prong hloh. Gir run pioh akŏ pơjing lu khul grup ngă hrŏm amăng sang hră, pơđĭ kyar thim lu khul grp ngă hrŏm pơhiăp tơlơi Angle, pơčrong sai, hơduah ĕp mơneč tơlơi thâo hơdip mơda hăng khul grup čơđai sang hră ngă tui 3 mơta bruă klă”.

Hăng hơdôm bruă mă amuñ amĕ đôč samơ̆ gir run na nao, nai pơtô Phan Mạnh Tiến hlăk djru hrŏm bruă rông ba sa rơnuk khul čơđai sang hră thâo khăp kiăng, hơmâo tơlơi glăm ba hăng čang rơmang prong pioh pơđĭ kyar drơi jăn pô. Kơnang kơ hơdôm mông hrăm mơak kơdok kơdor anun, nai hơmâo ba tơlơi mơak klă pioh kơ čơđai sang hră hor hloh hăng khăp kiăng hrăm tơlơi pơhiăp dêh čar tač rơngiao klă hloh.