Hluai tui anun, nai H’ Keng hmâo djru pơgang hăng ngă tui laih nua yôm bôh thâo đưm mơng djuai ania pô tui tơlơi pơhiăp hăng bôh hră čih.

Tơkeng rai hăng prong đĭ ƀơi Ƀon Bu Dak, să Thuận An, tơring glông Dak Mil, tơring čar Daknông. Tơdơi kơ hrăm giong Đại học Đà Lạt (hrăm gah Sư Phạm lịch sử), amăng thun 2014, nai H’ Keng nao mă bruă ƀơi Sang hră gưl 2 Nguyễn Trãi, tơring glông Dak Song. Hăng sa cô nai dô̆ hlăk ai, samơ̆ hăng bôh thâo pơtô mơng pô, bôh thâo đưm hăng bôh pơhiăp thâo lu, anun H’ Keng dưi hmâo arăng jak iâu nao pơtô tơlơi Bơnông ƀơi Anom pơtô abih anih 12 mơng tơring glông Dak Song, tơring čar Daknông:

 “Kâo dưi hmâo arăng jăk iâu pơtô tơlơi Bơnông ƀơi Anom pơtô brơi čơđai kiăng hrăm abih gưl 3 tơring glông Dak Song, tơring čar Daknông amăng dua tal hrăm 2016 hăng thun 2020, anih blung a hmâo 35 čô mơnuih tui hrăm, anih tal 2 hmâo 137 čô mơnuih tui hrăm. Ƀing nao hrăm lu ñu mơnuih apăn bruă, mơnuih mă bruă čar glăk dô̆ mă bruă ƀơi tơring čar Daknông, kah hăng ơi ia jrao, nai pơtô čơđai, kông ang...Ră anai tơlơi Bơnông akă dưi ba mut pơtô amăng hơdôm bôh sang hră pơtô čơđai sang hră ôh, yua anun mơnuih nao hrăm lu ñu lĕ ƀing adơi ayong, adơi amai djuai ania Yuan hrăm lu biă”.

Tơlơi Bơnông hmâo 7 mơta pha ra, amăng anun djuai Bơnông Preh dưi ruah ngă bôh pơhiăp yua hrom pioh bơkơtuai ră ruai. Yua anun, lom pơtô pơhrăm, ƀing nai khom pơblang tong ten kơ hơdră dăp bôh pơhiăp hăng đok pơhiăp. Amăng tơlơi Bơnông lu ñu lĕ ƀu hmâo tuek tuăk lu, yua anun ăt jing sa tơlơi tơnap hăng mơnuih nao hrăm djă pioh. Nai H’ Keng khon ĕp hơdră kiăng ngă hiưm hơpă mơnuih hrăm amuñ thâo hluh hloh. Yak blung a, ƀing nao hrăm hmâo lu djuai ania pha ra, bưp ƀu ƀiă tơlơi tơnap amăng bruă tŭ mă tơlơi pơhiăp phrâo. Samơ̆ hăng tơlơi gir run mơng nai H’ Keng, ƀing nao hrăm hmâo hur har laih pran jua hrăm bôh pơhiăp.

 “Ƀing nao hrăm hur har pran jua biă hăng gir run, glăi pơ̆ sang ăt iâu telephone tơña nai mơn hơdôm bôh pơhiăp akă ƀu thâo hluh. Tơlơi djuai ania Bơnông tơnap pơhiăp biă, hơdôm bôh pơhiăp tơbiă ƀu hmâo đĭ trun lu kah hăng tơlơi Yuan ôh. Djuai ania Bơnông hmâo lu bôh pơhiăp pha ra, kơnong kơ ƀơi tơring glông Dăk Mil lu djuai ania Bơnông Preh, samơ̆ ƀơi să Dăk Ghềnh hăng Dak Sắc lĕ hmâo Bơnông hrĕ pơkon dong anun hmâo hơdôm bôh pia pha ra. Lom pơtô yua hră pơtô hrom, anun bruă mă yua amăng pơtô pơblang ăt hmâo mơn hơdôm bôh pia dưi tŭ ư hrom kơplah wah hơdôm kual, yua anun anai jing tơlơi tơnap prong hloh”.

Hăng sa čô nai pơtô čơđai glăk dô̆ hlăk ai, akă hmâo lu tơlơi găn rơgao, biă ñu amăng bruă pơtô pơblang kơ pô pơhiăp, anô̆ pha ra dong lĕ hră kiăng hơduah ĕp, hră pơtô djuai ania Bơnông dô̆ ƀiă đôč, samơ̆ nai H’ Keng ƀu pơdơi pơhrăm pô, tŭ mă, pơhrua nao, kiăng bruă pơtô pơhrăm ba glăi bôh tơhnal klă hloh. Ñu hmâo pioh laih lu mông kơ bruă hyu ep hơdrôm hră, hră hrăm pơhrua nao bôh pia Bơnông mơng tơlơi hơdip mơda mơng plơi pla, ba hơdôm gru than mut amăng bruă pơtô pơblang kiăng mơnuih hrăm tañ djă pioh klă hloh. Nai H’ Keng ră ruai: hrom hăng hrăm tui hơdôm rơnuk nao hlâo, bruă pơtô pơhrăm tơlơi Bơnông khom pơphun mơng tơlơi kiăng yua amăng tơlơi hơdip mơda ră ruai bơkơtuai:

 “Khă drơi pô kâo lĕ tơkeng rai tơdơi anun hơdôm tơlơi kâo khom hrăm tui lu biă, samơ̆ kâo ăt abih pran jua mơn hăng jơlan hơdră pơtô tơlơi Bơnông mơng pô. Kâo mơ-ak biă lom dưi pơtô brơi kơ mơnuih hrăm mơng pô. Tơlơi mơ-ak prong hloh mơng kâo rim tal hyu pơtô lĕ kâo ƀuh ƀing adơi ayong, adơi amai mă yua tơlơi Bơnông pioh kơkuh nai, tơña bla nai pơtô. Jai mơ-ak hloh lom rim hrơi mơnuih nao hrăm glăi thâo dong lu bôh pơhiăp, amra dưi pơhiăp tơlơi Bơnông anun lĕ tơlơi yâu mơ-ak mơng sa čô nai pơtô”.

Kiăng hmâo bôh tơhnal klă hloh bruă pơtô pơhrăm, nai H’ Keng ăt hmâo lu mơn tơlơi dô̆ bơngot. Ñu kiăng tơlơi Bơnông lom dưi mă yua amăng hơdrôm hră pơtô pơhrăm amra djơ̆ hrom hloh hơdôm bôh pia mơng hơdôm djuai Bơnông pha ra. Gơnong bruă pơtô pơhrăm khom hmâo sa hră pơtô tơlơi Bơnông djơ̆, amuñ thâo hluh, amuñ djă pioh hăng dưi mă yua hyu djop. Mơng anun, jing hră sit nik, ƀu djơ̆ kơnong kơ ƀing mơnuih nao hrăm lĕ mơnuih apăn bruă, mơnuih mă bruă čar đôč ôh dưi hrăm, ƀing čơđai sang hră hai ăt dưi hrăm mơn tơlơi djuai ania pô tañ hloh:

 “Čang rơmang Gơnong bruă pơtô pơhrăm kơsem min hăng tañ mă yua hơdrôm hră tơlơi Bơnông kiăng dưi mă yua amăng bruă pơtô pơblang hăng pơhrăm, ƀu djơ̆ kơnong kơ ƀing mă bruă čar mơng hơdôm gơnong bruă ôh mơ̆, ñu dô̆ dưi mă yua amăng sang hră pơtô čơđai dong. Čang rơmang Ping gah hăng kơnuk kơna lăng ba djru gum lu hloh dong kơ anih anom sang hră, gơnam tam mă yua, biă ñu dưi ba tơlơi Bơnông mut pơtô ƀu djơ̆ kơnong kơ mơnuih mă bruă čar đôč ôh mơ̆, dô̆ brơi kơ ƀing čơđai sang hră lăi hrom dong, kiăng dưi djă pioh tơlơi pơhiăp hăng bôh hră čih”.

Bruă pơtô tơlơi Bơnông brơi kơ mơnuih mă bruă čar hăng čơđai sang hră ƀu djơ̆ kơnong kơ pơphun mơng tơlơi kiăng bơră ruai bơkơtuai amăng bruă mă ôh mơ̆, hluai tui anun djru pơgang laih hăng ngă tui nua yôm bôh thâo đưm mơng sa djuai ania. Yua anun, tơlơi gir run pơtô glăi tơlơi djuai ania pô mơng nai H’ Keng ƀơi tơring glông Dak Song, tơring čar Daknông lăp pơpŭ biă./.