Rơwang rơnuč blan 8, nai pơtô čơđai Sang hră gưl 2 hăng gưl 3 Lê Hữu Trác nao čuă sang anô̆ adơi amai Thị Cúc, Thị Yêm, djuai ania Bơnông (plơi Tân Bình, să Dăk Ngo, tơring Tuy Đức, tơring čar Dak Nông). Dua adơi amai glăk djru sang anô̆ mă rok, pruai kơmok kơ đang kơ phê. Sang anô̆ ƀing čơđai gah sang anô̆ ƀun rin, kơnong kơ hmâo ama lĕ mơnuih mă bruă phun, amĭ ruă tơtăng ară drah rơbuh đih, ayong lĕ hmâo tơlơi rơka ruă. Adơi Thị Cúc ol kơdol pran jua lơm ƀing nai nao čuă, pơsur pran jua.

 “Sang anô̆ kâo tơnap tap, hmâo nai pơtô, amĭ ama pơsur pioh kâo nao hrăm hră. Thun hrăm phrâo kâo hmâo prăp lui hơdrôm hră, hră čih djop laih. Kâo amra gir run hrăm hră yua kơ amĭ amă”.

Ơi Điểu Thắng, ama Thị Cúc hăng Thị Yêm brơi thâo, dua čô ană đah kơmơi 15 thun laih ƀiă kơ anai jing mơnuih mă bruă phun, samơ̆ ñu ăt pơsur na nao mơ̆n ƀing ană bă hrăm hră pioh tơlơi hơdip mơda tơdơi anai plai ƀiă tơnap tap. Kơnang kơ hơdôm hơdră bruă gum djru mơ̆ng Ping gah, Kơnuk kơna mơ̆ ƀing ană bă ñu ƀu pơdơi sang hră ƀah wư.

 “Sang anô̆ kâo tơnap tap biă, ataih mơ̆ng sang hră dong, ăt kơnang kơ tơlơi lăng ba mơ̆ng Ping gah, Kơnuk kơna, sang hră, djru ba gơñu prăk ƀong huă, prăk apah anih dô̆, prăk nao rai. Kâo ăt gir run pơsur mơn ƀing ană bă gir run hrăm kiăng thâo bôh hră, thâo jŭ yap pioh tơlơi hơdip mơda tơdơi anai plai ƀiă tơnap”.

Ơi Nguyễn Thế Hiệt, Khua Sang hră gưl 2 – gưl 3 Lê Hữu Trác, să Dăk Ngo, tơring glông Tuy Đức, tơring čar Dak Nông brơi thâo, ƀơi kual tơnap tap, lu čơđai sang hră jing laih mơnuih mă bruă phun lơm phrâo hmâo 15-16 thun. Kiăng djă pioh mrô čơđai sang hră nao hră, grŭp apăn bruă sang hră hăng ƀing nao pơtô rô hyu pơ̆ plơi pla na nao pơsur ƀing čơđai nao hrăm hră. Lơm hyu pơsur, ƀing nai lăi pơthâo hơdôm hơdră bruă gum djru mơ̆ng Ping gah, Kơnuk kơna pioh kơ ƀing čơđai sang hră kual asuek, ataih, kual djuai ania ƀiă; djru amĭ ama čơđai, čơđai sang hră thâo hluh tơhnal yôm phăn mơ̆ng bruă hrăm hră hăng tơlơi hơdip mơda.

“Grŭp apăn bruă sang hră hrŏm hăng ƀing nai wai lăng anih hrăm, pơkĕ hrŏm hăng hơdôm bôh plơi pla, gong gai plơi pla nao pơsur ƀing čơđai nao hrăm. Gah hơdră bruă lĕ să kual mrô 3, kual tơnap tap tâ̆o hloh hmâo 2 hơdră bruă tui Tơlơi pơkă mrô 81 djru prăk hrăm hră hăng Tơlơi pơtrun pơsit 116 djru braih huă, prăk ƀong huă, prăk apah anih dô̆ kơ čơđai, klă biă”.

Ơi Phan Thanh Hải, Khua Gơnong bruă pơtô pơhrăm tơring čar Dak Nông brơi thâo, tơring čar biă ñu đing nao čơđai sang hră ƀơi kual asuek, ataih, kual djuai ania ƀiă. Prăp lui kơ thun hrăm phrâo, gơnong bruă pơtô pơhrăm gum hrŏm hăng glông bruă kơđi čar ƀơi plơi pla gơgrong hlâo kơ rim bôh plơi pla kiăng thâo tơlơi hăng pơsur čơđai sang hră nao hrăm hră. Hăng ƀing čơđai tơnap tap gơnong bruă amra ĕp hơdôm jơlan gah gum djru. Tơlơi pơmin mơ̆ng gơnong bruă pơtô pơhrăm tơring čar lĕ ƀu pioh čơđai sang hră hơpă lui sang hră anih hrăm yua kơ tơlơi hơdip tơnap ôh.

Ră anai hơdôm hơdră bruă gum djru kơ čơđai sang hră kual asuek, ataih, kual djuai ania ƀiă tui Tơlơi pơtrun pơsit mrô 116 thun 2016 hăng Tơlơi pơtrun pơsit 81 thun 2021 mơ̆ng Gong gai dêh čar glăk ngă tui ba glăi bôh tơhnal klă biă ƀơi tơring čar Dak Nông. Amăng hơdôm thun hrăm 2022-2023 hăng 2023-2024 hmâo laih rơbêh kơ 14.000 čô čơđai sang hră amăng tơring čar dưi djru prăk ƀong huă, prăk apah anih dô̆, djru prăk hră hrăm hăng abih bang prăk mă yua rơbêh kơ 21 klai prăk. Ơi Trần Thanh Hải brơi thâo.

“Amăng hơdôm thun rơgao, hơdôm hơdră gum djru mơ̆ng Ping gah hăng tơring čar hmâo đing nao phara hăng ană bă, čơđai sang hră ƀơi kual asuek, ataih, kual djuai ania ƀiă. Biă ñu hmâo 2 Tơlơi pơtrun pơsit lăp đing nao sit lĕ Tơlơi pơtrun pơsit 116 hăng Tơlơi pơtrun pơsit 81 mơ̆ng Gong gai dêh čar. Bruă djru gum anai mut amăng bôh nik, djru gum, pơsur ƀing čơđai kual asuek, taih, biă ñu ƀing čơđai kual djuai ania ƀiă hmâo tơlơi hơdip tơnap jing klă hloh, hrŏ trun mrô čơđai sang hră lui hrăm hră amăng hơdôm thun rơgao”.

Hơdôm hrơi anai, čơđai sang hră ƀơi kual asuek, ataih, kual djuai ania ƀiă ƀơi tơring čar Dăk Nông lăi ha jăn, Dap Kơdư lăi hrŏm glăk hur har pran jua pơwot glăi sang hră. Hrŏm hăng tơlơi gir run mơ̆ng gơnong bruă pơtô pơhrăm, ƀing nai hmâo lăng tui plơi pla, hơdôm hơdră bruă mơ̆ng Ping gah, Kơnuk kơna glăk djru klă kơ ƀing čơđai yak rơgao tơnap anăp nao pơgi kơdih anai klă hloh./.