Ƀơi plơi Dor, să Gla, tơring glông Đăk Đoa, anih dô̆ hơdip mơda mơng 256 bôh sang anô̆ djuai ania Bahnar, tơlơi mơ-ak mơng hrơi Rơngai, hăng khăn ia mriah kơñĭ, Ƀrô djơ̆ tal anai, neh wa amăng plơi dô̆ pơphun sa dua bruă mă bơkơjăp drơi jăn pioh čơđai hrơi ngă jơnum. Ơi Sing, khua plơi Dor, să Gla, tơring glông Đăk Đoa lăi pơthâo:

  “Tal pơdơi lơphet lơ 2/9, sang anô̆ hăng đơ đam plơi leng kơ yôl khăn gru Lŏn ia, pơphun ƀong mơñum mơ-ak hrơi pơdŏng lŏn ia. Hăng tơdơi kơ anun pơgiăng nao pơ̆ Tơdron đă bôh lông tơring glông Đăk Đoa pioh lăng pơplông đă bôh lông yua kơ tơring glông pơphun. Lăi hrŏm, tơlơi hơdip mơda neh wa ta ăt đĭ đăi mơn bơhmu hăng hlâo adih. Anun rim tal ngă lơphet hrơi pơdŏng lŏn ia lu sang anô̆ ăt pơphun mơn kơ ană bă hyu ngui, pơjing pran mơ-ak, hmâo pran jua hrăm hră kơ čơđai tơdơi kơ hơdôm hrơi pơdơi lơphet”.  

Ơi Y Sênh, djuai ania Mnông, 83 thun, ñu lĕ mơnuih arăng đăo gơnang amăng ƀon R’Bút, să Quảng Sơn, tơring glông Dak Glong, tơring čar Dak Nông. Ƀrô hrơi akŏ pơjing kơnuk kơna lŏn ia,ơi Y Sênh hơdor glăi thun blan hing ang amăng rơnuk blah wang. Tui anun, thun 1961, ơi Y Sênh mut hrŏm blah ngă, truh thun 1964 ñu nao ngă ƀô̆ đô̆i, mut hrŏm blah wang truh hrơi rơngai thun 1975 kah mơng pot glăi pơ plơi pla laih anun ñu gum hrŏm mă bruă ƀơi ƀon lan. Yua anun ñu thâo rơđah tơlơi yôm mơng thun blan rơngai mơ-ak tui ră anai:

“Tơdơi kơ pơklaih rơngai lŏn ia, laih anun neh met wa kah hơđong tơlơi hơdip mơda. Ăt yua hơmâo Ping gah, Kơnuk kơna, gong gai ƀon lan đing nao pok pơhai hơdôm hơdră djru neh met wa pơđĭ kyar tơlơi hơdip mơda. Neh met wa amăng plơi pla đăo gơnang nao tơlơi črâo trun, hơdră bruă mơng Ping gah, Kơnuk kơna, kiăng bơwih brơi tơlơi hơdip, ră anai tơlơi hơdip jai jơnap yơh”.

Hmâo ha tal anih anom ngă hơkrŭ kơjăp phik amăng rơnuk blah ngă, ƀuôn H Ngô A, să Hòa Phong, tơring glông Krông Bông, tơring čar Dak Lak ră anai glăk rim hrơi pơplih ƀô̆ mơta. Ƀu dô̆ tơguan, ah gơnang kơ Kơnuk kơna, mơnuih ƀôn sang ƀuôn H Ngô A hmâo ngă tui pran jua gơgrong kơjăp amăng rơnuk blah ngă kiăng bơwih ƀong huă ngă đang hmua klă, yak rơgao tơlơi tơnap amăng rơnuk anai, pơdŏng tơlơi hơdip mơda jai hrơi jai trơi pơđao yâo mơ-ak, klă hiam. Ơi Y Văn Niê, mơnuih amăng ƀuôn H Ngô A brơi thâo:

“Kơnuk kơna ră anai đing nao biă tơlơi hơdip mơda mơnuih ƀôn sang, pơphun hơdôm anih pơtô mă yua bôh thâo phrâo amăng bruă tơjŭ pla, rông hlô. Lu ƀing kỹ sư gah bruă đang hmua nao tơl ƀuôn, plơi pla pơtô brơi kơ mơnuih ƀôn sang. Mơng tơlơi pơtô ba anai mơnuih ƀôn sang ăt hrăm tui hăng ngă tui mơn, mơ̆ng anun pơđĭ kyar bơwih ƀong, hơđong tơlơi hơdip mơda jai hrơi jai klă hloh”.