5 thun hlâo adih, ayong Phan Hữu Trung dŏ ƀơi plơi Dha Mi, să Ba, tơring kual čư̆ siăng Đông Giang, tơring čar Quảng Nam sang anŏ tơnap tap biă mă, ƀu hơmâo bruă mă hơđong ôh. Tơdơi kơ hơmâo hơdră brơi nao mă bruă apah pơ dêh čar tač rơngiao, ayong Phan Hữu Trung dưi hơmâo gong gai kơnuk kơna ngă gêh găl brơi čan 200 klăk prăk mơ̆ng Sang bruă prăk djru mơnuih mơnam pioh ngă hră pơar nao mă bruă apah pơ dêh čar tač rơngiao. Tơdơi kơ 3 thun dŏ mă bruă ƀơi dêh čar Japan, ñu hơmâo pơkom pioh prăk kăk lu lăi mơ̆n. Rơngiao kơ prăk pơkrem lui, tơlơi thâo amăng bruă mă mơ̆ng ñu ƀrư̆ hrơi hruaih jai. Hơmâo prăk ƀiă laih, ayong Phan Hữu Trung pơwơ̆t glăi pơ plơi pla tuh pơ alin sĭ mơdrô blơi rơdêh pơdưŭ pơgiăng apah, anun pơhrui glăi prăk hơđong. Ayong Phan Hữu Trung lăi:

“Hlâo adih sang anŏ gơmơi tơnap tap biă mă yua hơmâo gong gai kơnuk kơna amăng kual plơi pla djru ba, pơčrâo jơlan nao mă bruă apah pơ dêh čar Japan. Rim blan kâo mă prăk blan hơmâo 32 klăk. Ră anai, tơlơi hơdip mơda plai ƀiă yơh tơnap tap pơkă hăng hlâo. Ră anai, amăng plơi pla gơmơi hơmâo lu gơyut gơyâo ăt nao mă bruă apah pơ dêh čar tač rơngiao mơ̆n”.

Ngă tui Kơčăo bruă anet mrô 3, “Pơđĭ kyar pơtô hrăm bruă mă hăng pơsir bruă mă kơ mơnuih mă bruă apah jing mơnuih djuai ƀiă hăng mơnuih ƀôn sang kual čư̆ siăng”, tơring glông Đông Giang djru rơbêh 3 klai prăk. Tơring glông anai đing nao biă mă kơ bruă brơi nao mă bruă apah pơ dêh čar tač rơngiao. Tui hăng anun, mơnuih mă bruă apah lĕ, kơnuk kơna djru prăk apah hrăm bruă, hrăm tơlơi pơhiăp dêh čar tač rơngiao, pơkă lăng tơlơi suaih pral hăng ngă hră pơar nao mă bruă pơ dêh čar tač rơngiao, kơnang kơ Sang bruă prăk djru mơnuih mơnam. Nao mă bruă apah pơ dêh čar tač rơngiao, mơnuih djuai ƀiă ƀu kơnong hơmâo prăk blan hơđong đôč ôh, dŏ djru kơ bruă lui rơmŏn kŏn rin laih anun dưi hrăm tui bruă mă pơkom pioh tơlơi thâo thăi kơ ta pô glăi pơphun bruă mă ƀơi plơi pla dơ̆ng.

Mơ̆ng thun 2022 truh ră anai, tơring glông Đông Giang hơmâo brơi nao 150 čô mơnuih mă bruă apah ƀơi dêh čar tač rơngiao. Ơi Đỗ Hữu Tùng, Kơ-iăng Khua Jơnum min mơnuih ƀôn sang tơring glông kual čư̆ siăng Đông Giang, tơring čar Quảng Nam brơi thâo, đơ đam tơring glông Đông Giang hơmâo 15.000 čô mơnuih amăng thun hlăk hơmâo pran jua mă bruă samơ̆ mrô  mơnuih nao mă bruă apah pơ dêh čar tač rơngiao aka ƀu lu ôh:

“Kơčăo bruă pơđĭ kyar pơtô bruă mă hăng pơsir bruă mă kơ mơnuih djuai ƀiă hăng kual čư̆ siăng gah “Hơdră bruă dêh čar djru pioh pơtrut pơđĭ kyar bơwih ƀong huă mơnuih mơnam amăng kual plơi pla djuai ƀiă hăng čư̆ siăng, kâo ƀuh anai lĕ kơčăo bruă tŭ yua biă mă hăng hơmâo boh tơhnal tong ten. Mơnuih ƀôn sang thâo hluh rơđah anŏ tŭ yua kơ bruă nao mă bruă apah pơ dêh čar tač rơngiao hơmâo prăk blan hơđong, djru pơđĭ tui tơlơi hơdip mơda. Anai lĕ tơlơi lăp mơak. Pơ anăp adih, tơring glông Đông Giang pơtrut tui bruă lăi pơthâo, pơphun mông jơnum pôr pơthâo bruă mă kiăng kơ mơnuih ƀôn sang ĕp lăng anih či nao mă bruă apah pơ dêh čar tač rơngiao”.

Thun blan rơgao, hơdôm tơring glông kual čư̆ siăng tơring čar Quảng Nam hơmâo pơtô lăi hăng pơphun lu anih pơtô hrăm hăng djru kơ mơnuih nao mă bruă apah pơ dêh čar tač rơngiao. Mơ̆ng thun 2022 truh ră anai, tơring čar Quảng Nam hơmâo brơi nao 4 rơbâo čô mơnuih nao mă bruă apah pơ dêh čar tač rơngiao, lu anih nao lĕ pơ dêh čar Hàn Quốc,Japan, Lao, Đài Laon. Kiăng djru kơ mơnuih mă bruă apah, nao mă bruă tui thun blan pơkă, djop anom bruă kơnuk kơna ƀơi tơring čar Quảng Nam hơmâo pơphun mông jơnum brơi hơduah ĕp lui hlâo, jŭ yap glăi anăn mơnuih ƀôn sang rơkâo nao mă bruă apah hăng pơtô pơčrâo brơi bruă mă.

Tơring čar Quảng Nam pơtong lĕ nao mă bruă apah pơ dêh čar tač rơngiao lĕ sa amăng hơdôm hơdră pơsir bruă mă, pơđĭ tui rơnoh pơhrui glăi kơ mơnuih ƀôn sang. Yua kơ anun, rim thun, djop gơnong bruă, sang bruă kơnuk kơna, tơring glông, plơi pla kơtưn bruă pơtô lăi, pôr pơthâo jơlan hơdră, tơlơi phiăn mơ̆ng kơnuk kơna pơkă kơ bruă nao mă bruă apah pơ dêh čar tač rơngiao. Lăng kơ naŏ kiăng, hră rơkâo mơ̆ng mơnuih či hyu mă bruă apah anun, ngă hrŏm djop sang bruă pơtruh brơi jơlan nao mă bruă apah hăng tač rơngiao, pơčrâo brơi djơ̆ lăp,ĕp bruă mă gêh găl hăng rim čô či mă bruă.

Ơi Nguyễn Qui Qúy, Kơ-iăng Khua Gơnong bruă Bruă mă Tơhan rơka hăng mơnuih mơnam tơring čar Quảng Nam brơi thâo:

“Kơ bruă ba mơnuih nao mă bruă apah pơ dêh čar tač rơngiao, thun blan laih rơgao dưi hơmâo khua mua tơring čar Quảng Nam đing nao biă mă. Anai lĕ, bruă mă yom amăng bruă pơhrŏ ƀun rin hơđong kơjăp ăt kah hăng hrưn đĭ ngă pơdrong kơ djop sang anŏ mơnuih ƀôn sang, biă mă ñu hơdôm tơring glông kual čư̆ siăng. Bruă brơi mơnuih nao mă bruă apah pơ dêh čar tač rơngiao lĕ ngă tui hră pơkôl hlâo, hơmâo ba glăi boh tŭ yua klă, mrô mơnuih nao mă bruă apah ƀrư̆ hrơi lu tui, tơlơi hơdip mơda sang anŏ ăt pơblih tui mơ̆n, laih dơ̆ng pơblih bruă mă pơkra ming hăng pok pơhư prong bruă sĭ mơdrô”.

Ta dưi lăi, kơnang kơ bruă ba mơnuih nao mă bruă apah pơ dêh čar tač rơngiao tui hăng hră pơkôl lĕ ngă gêh găl kơ mơnuih ƀôn sang hyu mă bruă apah ƀơi tơring čar Quảng Nam pơđĭ tui rơnoh prăk pơhrui glăi, hơđong tơlơi hơdip mơda, djru ngă brơi tơlơi bơwih ƀong huă, mơnuih mă bruă hơmâo tơlơi thâo thăi hơđong, mă bruă ba glăi boh tŭ yua lu, pơhrŏ ƀun rin hmar, hơđong kjăp.