Ping gah să giăm guai Rờ Kơi, tơring glông Sa Thầy hơmâo 13 grup Ping gah hăng 176 čô mơnuih Ping gah, amăng anun hơmâo 6 grup Ping gah plơi pla djuai ania ƀiă. Rĭm thun tui tơlơi črâo ba mơng Ping gah tơring čar Kon Tum hăng Ping gah tơring glông Sa Thầy, Ping gah să pok pơhai hmao tlôn hơdôm boh tơhnal kơ bruă hrăm hăng ngă tui gru hơdip mơng wa Hô tơl rĭm grup, plơi pla. Ơi A Êl, tha plơi Gia Xiêng brơi thâo, ƀu djơ̆ kơnong 14 čô mơnuih Ping gah amăng grup ƀuă hrăm, ngă tui wa đôč ôh mơ̆ wŏt mơnuih ƀôn sang amăng plơi pla ăt gơgrong ngă tui tơlơi pơtô mơng wa amăng rĭm bruă mă tong ten. Tui ơi A Êl, bruă hrăm tui wa djru brơi mơnuih Ping gah ba gru, gơgrong hăng mơnuih ƀôn sang gir run bơwih ƀong huă tui tơlơi črâo trun, tơlơi phiăn mơng Ping gah, Kơnuk kơna:

“Mơnuih Ping gah amăng grup lêng kơ ba gru, ba jơlan hlâo amăng djop mơta bruă kiăng neh met wa amăng plơi pla ngă tui. Hơdôm hơbô̆ bruă pơđĭ kyar bơwih ƀong huă amăng sang anŏ mơng mơnuih Ping gah amăng plơi pla ba glăi tŭ yua, mơnuih Ping gah djru neh met wa hlâo rông, anah phun pla kiăng pơđĭ kyar bơwih ƀong huă. Neh met wa amăng plơi pla ăt gir run bơwih ƀong huă, gơgrong ngă tui tơlơi črâo trun mơng Ping gah, tơlơi phiăn mơng Kơnuk kơna. Hrăm tui wa, neh met wa hrăm mơng bruă đơđet anun lĕ pơagaih rơnăk jum dar truh pơ bruă pơprong anun lĕ gum pơgôp amăng plơi pla”.

Kiăng lar hyu kơtang bruă hrăm hăng ngă tui tơlơi pơmĭn, gru hơdip, bruă mă mơng Khua mir sir Hồ Chí Minh, 10 thun rơgao Ping gah tơring čar Kon Tum hơmâo ngă tui, pơjing boh tơhnal bruă mă lăp djơ̆ hăng tơlơi sit nik hăng bruă jao kơđi čar amăng tơring čar brơi rĭm thun, rĭm rơwang kiăng ngă tui klă, tŭ yua hloh. Mơng thun 2023 truh ră anai bruă “Hrăm hăng ngă tui tơlơi pơmĭn, gru hơdip, bruă mă mơng Khua mir sir Hồ Chí Minh kơ pran ngă bruă, pơgôp pơjing tơring čar Kon Tum pơđĭ kyar tañ hăng hơđong kjăp”. Đại tá Lê Minh Chính, Khua anom bruă git gai tơhan wai pơgang guai tơring čar Kon Tum brơi thâo tơlơi sit nik ƀơi anom bruă:

“Ƀing gơmơi ngă ha amăng plĕ hơdôm bruă pơtrut pơsur, hơdôm tơlơi pơtrun anun lĕ tơlơi pơtrun mrô 847 mơng Ping gah ling tơhan gơnong glông kơ ngă tui gru hơdip mơng Ling tơhan rơnuk wa Hô, gir run kơdong glăi ƀing hơmâo tơlơi pơmĭn phara amăng rơnuk phrâo. Tal pơtrut ngă tui gru grua, pơdah tơlơi thâo thăo, djơ̆ hăng pran hơdip mơng Ling tơhan wa Hô amăng rơnuk phrâo. Amăng hrơi blan ngă tui kơtưn bruă pel ĕp, krăo lăng hơdôm grup Ping gah, mơnuih Ping gah laih dong pơlir hăng bruă ngă tui bruă jao đing nao hơdôm tơlơi pơplih phrâo tui tơlơi pơtrun mơng Ping gah ba tơbiă”.

Ngă tui tơlơi pơtrut pơsur “Hrăm hăng ngă tui tơlơi pơmĭn, gru hơdip, bruă mă mơng Hồ Chí Minh truh ră anai, tơring čar Kon Tum hơmâo pơjing laih 2.760 hơbô̆ bruă klă, ba glăi tŭ yua. Pơhmutu lĕ hơdôm hơbô̆ bruă: Pơphun jơnum pơƀut pơlir hăng bruă hrăm, ngă tui wa Hô; hrăm tui wa amăng tơlơi khăp pap, djru tơdruă pơđĭ kyar bơwih ƀong huă-mơnuih mơnam, pơhrŏ trun ƀun rin, man pơdong plơi pla phrâo, wai pơgang jum dar; pơjing hăng hrưn đĭ tơlơi hơdip gru grua…Yă Bùi Thị Vui, kơ-iăng Khua anom pơtô bruă Ping gah hăng pơtô ba mơnuih ƀôn sang pơsit tong:

“Bruă pok pơhai ngă tui tơlơi črâo trun mrô 05 hơmâo pơhưč lu mơnuih hăng hơmâo tơlơi mut hrŏm mơng ƀing apăn bruă, mơnuih Ping gah, mơnuih ƀôn sang amăng tơring čar. Mơng anun ngă pơplih tong ten mơng tơlơi pơmĭn truh pơ bruă mă mơng djop gưl Ping gah, gong gai, anom bruă, ƀon lan, anih anom. Pran jua mă bruă mơng ƀing apăn bruă jing klă tui, tŭ yua, giăm mơnuih ƀôn sang ƀiă”.

Mơng bruă hrăm hăng ngă tui gru hơdip mơng wa, 10 thun rơgao amăng tơring čar Kon Tum ƀuh lu khul grup, ƀing mơnuih ba gru amăng djop mơta bruă hăng hơmâo apah bơni. Đơ đam tơring čar hơmâo 17 khul grup, ƀing mơnuih hơmâo Khua dêh čar pơpŭ bơni; 9 khul grup, ƀing mơnuih hơmâo anom pơtô bruă Ping gah pơpŭ bơni…Bruă pok pơhai ngă tui tŭ yua tơlơi črâo trun mơng Ding jum kơđi čar tal XII “Pơtrut kơtang bruă hrăm hăng ngă tui tơlơi pơmĭn, gru hơdip, bruă mă mơng Hồ Chí Minh” ăt lĕ bruă akŏ phun kiăng tơring čar Kon Tum ngă tui tơlơi pơmĭn, gru hơdip mơng wa, dưi ruah ngă hơdôm bruă akŏ phun, pơplih phrâo amăng djop mơta bruă, dưi ngă truh kih hơnong pơkă, bruă jao pơđĭ kyar amăng 10 thun rơgao./.