VOV4.Jarai - Tlam lơ 23/9, ƀơi Ƀirô Khua pơ ala mơnuih ƀon sang dêh čar pơphun mông ngă lơphet hơdor glăi 30 thun hrơi akŏ pơjing Jơnum min wai pơgang rơnuk rơnua mơng Ƀirô Khua pơ ala mơnuih ƀon sang dêh čar hăng čơkă mă Miđai mă bruă mrô II. Nao ngă lơphet tal hơdor glăi anai hơmâo Khua mir sir, Khua khul pơgang rơnuk rơnua ơi Nguyễn Xuân Phúc; Khua git gai pơ ala mơnuih ƀon sang dêh čar ơi Vương Đình Huệ.

Khua mir sir, Khua git gai pơ ala mơnuih ƀon sang dêh čar phĭn rup hrŏm

Amăng 30 thun laih rơgao, Jơnum min wai pơgang rơnuk rơnua hơmâo pơgôp hiăp amăng hơdôm boh tơhnal čih pơkra, pơhrua Phiah phiăn thun 1992, pơjing phiah phiăn thun 2013, biă mă ƀu lĕ hơdôm hơdră wai pơgang lŏn ia, pơjing khul ling tơhan, Khul wai pơgang rơnuk rơnua; ngă tui hơdôm bruă jao amăng krăo lăng, hơdôm tơlơi pơgôp hiăp mơng Jơnum min amăng bruă krăo lăng yôm phiăn biă mă, lăp djơ̆, djru brơi kơnuk kơna, hơdôm anom bruă bơdjơ̆ nao hmao tlôn hơkrŭ pơkra hơdôm anŏ aka ƀu klă lơ̆m ngă tui hơdră bruă, tơlơi phiăn, pơgôp pơplih amăng bruă krăo lăng. Khua pơ ala mơnuih ƀon sang dêh čar ơi Vương Đình Huệ rơkâo, pơ anăp anai, Jơnum min wai pơgang rơnuk rơnua tŏ tui gơgrong lăi pơthâo hlâo bruă mă, hrưn đĭ klă dong amăng bruă pel ĕp, pơphô bruă, hơdôm tơlơi rơkâo kơ bruă wai pơgang rơnuk rơnua, biă mă ñu hơdôm tơlơi pơčeh phrâo amăng wai pơgang lŏn ia.

Siu Đoan: Pơblang