Plơi čơđai SOS Đà Lạt ră anai glăk čem rông ba 46 čô čơđai drit druai, anai lĕ ƀing čơđai arăng ƀu gưt rông hăng ƀing čơđai sang anŏ tơnap tap, mơng 5 truh pơ 18 thun. Laih dong, 34 čô čơđai glăk kiăo tui hrăm ƀơi hơdôm boh sang hră gưl prong, sang hră cao đẳng ăt tŏ tui hơdôm tơlơi djru ba mơng plơi anai.

Hơdip hơdip ƀơi anai 8 thun laih, amon Huỳnh Thị Như Ngọc, hrăm anih 8, lăng anai lĕ kar hăng sang anŏ ñu, anih ƀing ayong amai adơi hơdip khăp pap nao rai, djru tơdruă amăng bruă hrăm hră hăng tơlơi hơdip mơda: “Amăng plơi ƀing ayong amai adơi hơdip thâo khăp pap nao rai, laih dong ăt hơmâo lu gơyut gơyâo amăng plơi ha hnưr, ƀing gơmơi hơdip jê̆ giăm mơ-ak biă, lơm hrăm hră tơña nao rai mơn. Amăng bơyan ngui ngor hơmâo ƀing anong, ƀing neh lêng kơ đing nao djru brơi ƀing gơmơi. Bơyan blan bơrơmi ria anai ƀing gơmơi čơkă lu tuai rơnguai rai čuă hăng ƀok gơnam brơi ƀing gơmơi.”

Hơdôm bơyan blan bơrơmi hlâo anun, ƀing čơđai dưi lăng arăng suang ania čơgrai, djă apui kơđen, ngui ngor hăng mut hrŏm hơdôm bruă amăng grup. Thun ania, mah hơjan na nao ƀơi Đà Lạt ăt ƀu dưi rơngiă hĭ hrơi ngui mơ-ak. Ƀing čơđai ăt hơmâo mông pơbưp, hơmâo arăng ƀơk gơnam hăng hơdôm mông pơtum jơngum tơdruă. Hăng amon Hoàng Thị Thu Thủy, bơyan blan bơrơmi amăng plơi lĕ hrơi mông mơ̆ ñu lăng mơ-ak biă mă: “Rĭm truh bơyan blan bơrơmi, ƀing gơmơi hơmâo ƀing ayong, ƀing amai rai pơ anai pơphun jơlan hơdră ngui ngor hăng ƀơk lu gơnam, ngui lu tơlơi ngui ngor. Ƀing gơmơi dưi klon ƀañ tek, pơkra apui kơđen, ngui adôh suang hrŏm, pơtum jơngum bơră ruai mơ-ak. Thun anai hơjan na nao samơ̆ ƀing neh, ƀing met ăt mơ-it rai gơnam brơi ƀing gơmơi. Kâo bơni biă mă kơ tơlơi djru ba amăng bơyan blan bơrơmi tui anai.”

Sa boh ƀañ, sa boh apui kơđen ƀudah sa anung gơnam ƀơk amăng mơmŏt ngui mah ƀu prong ôh, samơ̆ hăng ƀing čơđai glăk dŏ hơdip ƀơi Plơi SOS Đà Lạt, anai lĕ tơlơi djru ba, anai lĕ pran khăp pap. Ơi Trần Bảo Long, Khua wai lăng Plơi SOS Đà Lạt brơi thâo, rơngiao kơ prăk kak mơng grup SOS, bruă bơwih brơi čơđai amăng plơi ăt hơmâo tơlơi djru ba mơng gong gai ƀon lan hăng ƀing mơnuih čơmah dong: “Hăng ƀing čơđai sa thun hơmâo 3 bơyan ngui Tê̆t: Tê̆t tui phiăn juăt, Tê̆t kơ čơđai kơnôl 1/6 hăng Ngui bơyan blan bơrơmi ria. Ngui bơyan blan bơrơmi amăng plơi thun anai, abih bang čơđai amăng plơi lêng kơ čơkă mă lu tơlơi djru khăp pap mơng gưl gong gai ƀon lan, mơng ƀing mơnuih čơmah, tơlơi anai amra ngă kơ ƀing čơđai ngui bơyan blan bơrơmi mơ-ak mơ-ai, bă blai pran khăp pap ƀu-eng”./.