Tlam lơ 16/10, ƀơ mông jơnum khua mua ping gah tơring čar Dak Lak, Anom pơphun bruă ping gah dêh čar lăi pơthâo hră pơsit mơ̆ng Ding jum kơđi čar jao ơi Lương Nguyễn Minh Triết, ding kơna ping gah dêh čar aka ƀu sit nik, khua git gai ping gah ƀôn prong Đà Nẵng glăi ngă khua git gai ping gah tơring čar Dak Lak rơwang bruă thun 2025-2030, dơ̆ng mơ̆ng lơ 15/10/2025.

Đĭ pơhiăp tŭ mă bruă jao, khua phrâo git gai ping gah tơring čar Dak Lak ơi Lương Nguyễn Minh Triết pơdah pran jua lăp pơ-ư ang lơ̆m Gơnong dlông đăo kơnang hăng jao bruă prong kơ ñu; lăi pơtong amra mă bruă tơpă khut khăt čih pioh tơlơi pơčrâo bruă, git gai mơ̆ng gơnong dlông, thâo hluh tong ten tơlơi pơ-ư ang anai jing bruă glam ba prong prin hrŏm hăng khul khua mua apăn bruă ping gah tơring čar, git gai, wai lăng, pơčrâo bruă ngă djơ̆ tơhnal pơkă pơđĭ kyar bơwih ƀong huă kơ mơnuih mơnam, pơhlom hơđong dêh čar, pơgang rơnuk rơnua kơ mơnuih ƀôn sang tơring čar, ngă djơ̆ anŏ kiăng prong mơ̆ng sa boh tơring čar anih phun ƀơi kual Dap Kơdư. Ơi Lương Nguyễn Minh Triết thun tơkeng 1976, plơi pla phun hơđăp să Duy An, tơring glông Duy Xuyên, tơring čar Quảng Nam, ră anai gah ƀôn prong Đà Nẵng; tơlơi hrăm truh Thạc sĩ Wai lăng bruă sĭ mơdrô, kỹ sư boh thâo ia rơgơi tơlơi pơhing phrâo Silicat; hrăm bruă kơđi čar gưl dlông hloh.