Lơ 25/9, Jơnum min mơnuih ƀôn sang tơring čar Khánh Hòa pơphun Jơnum lăi pơthâo tơlơi pơsit mơ̆ng Khua dêh čar kơ bruă ruah Khua jơnum min mơnuih ƀôn sang tơring čar Khánh Hòa, rơwang bruă 2021-2026 hăng ơi Nguyễn Khắc Toàn, Kơ-iăng khua Ping gah tơring čar Khánh Hòa. Hlâo kơ anun, lơ 16/9, ƀơi mông jơnum tal 2, Jơnum min pơ ala mơnuih ƀôn sang tơring čar Khánh Hòa hơmâo ruah đĭ ơi Nguyễn Khắc Toàn ngă khua.

Pơhiăp ƀơi mông tŭ mă bruă mă, ơi Nguyễn Khắc Toàn ƀuăn amra hrŏm hăng ƀing gŏp mă bruă mơ̆ng Jơnum min mơnuih ƀôn sang tơring čar Khánh Hòa pơplih tơlơi pơmin ngă bruă, ngă kiăng klă kơ lŏn ia, plơi pla hăng mơnuih ƀôn sang đôč; pơtrut gru gum pơgôp - tui tơlơi phiăn - pơčeh phrâo - khut khăt - tŭ yua, lăng yôm tơlơi gơgrong bruă, pran jua bơwih brơi mơnuih ƀôn sang, đah mơ̆ng ba Khánh Hòa đĭ kyar kơtang hloh. Ơi Nguyễn Khắc Toàn, tơkeng thun 1970, plơi ñu pơ phường Đông Ninh Hòa, tơring čar Khánh Hòa; hrăm gưl prong cử nhân Luật, cử nhân Xây dựng Đảng hăng Chính quyền Nhà nước (Akŏ pơdong Ping gah hăng Gong gai Kơnuk kơna), hrăm cao cấp lý luận chính trị (tơlơi pơtô djơ̆ gal bruă kơđi čar).