Tlam lơ 31/10, ƀơi sang jơnum prong mơnuih ƀôn sang, tơdơi kơ ngă lơphet tŭ jum sit nik, Khua git gai ping gah dêh čar ta ơi Nguyễn Phú Trọng hlong bơkơtuai hăng Khua git gai ping gah, Khua mir sir dêh čar Khač, ơi Tập Cận Bình. Ơi Nguyễn Phú Trọng lăi, Việt Nam hăng Khač lĕ dua boh dêh čar jĕ giăm ha mơguai lŏn ia lir čư̆ siăng, ia krông, lêng kơ dêh čar kiăo tui jơlan hơdră mơnuih mơnam ngă khua pô XHCN yua ping gah git gai phun.

Khua git gai ping gah ơi Nguyễn Phú Trọng bơkơtuai hăng Khua git gai ping gah,

Khua mir sir dêh čar Khač, ơi Tập Cận Bình

Dua bơnah tŭ ư ăt djă bong bruă ngă giăng mah rô nao rai, bưp khua mua pơprong mơ̆ng dua Ping gah, dua bơnah lŏn ia, kiăng pơđĭ tui tơlơi thâo hluh nao rai tơdruă, hmao kru lăi pơthâo tơlơi pơhing kiăng pơsir djơ̆ hơdră tơdah hơmâo; pơphun na nao jơnum bơkơtuai kiăng pơđĭ kyar hơđong kjăp, tơpă Việt Nam hăng Khač. Amăng mông bơkơtuai nao rai dua čô khua git gai dua bơnah ping gah dêh čar, hơmâo lăi nao hơdôm bruă mă yôm phun, pơtrut ngă bruă kiăng ba glăi boh tŭ yua yôm bơwih ƀong huă, sĭ mơdrô tuh pơ alin, pơjing atur kjăp pơđĭ kyar dua bơnah; lăi pơtong Việt Nam-Khač lĕ bơnah ngă hrom yôm biă mă hăng hơmâo anŏ gêh găl prong djru nao rai tơdruă.

Pơđut jơnum bơkơtuai nao rai, Khua git gai ping gah ơi Nguyễn Phú Trọng hrom hăng Khua git gai Ping gah, Khua mir sir dêh čar Khač ơi Tập Cận Bình dŏ lăng hơdôm khua mua anom bruă, ding jum, tơring čar dua bơnah kĭ hră pơkôl ngă hrom amăng tal nao čuă anai

Khua git gai ping gah, Khua mir sir dêh čar Khač, ơi Tập Cận Bình lăi pơtong, dêh čar Khač amra gir run hloh pơđĭ kyar tơlơi gêh găl sĭ mơdrô tui anăp ngă kiăng bơkơnar hloh; ngă gêh găl kơ Việt Nam amra sĭ mơdrô lu mơta gơnam mơ̆ng đang hmua, kyâo pơtâo, akan hơdang nao pơ dêh čar Khač thun blan pơ anăp.