Amăng anih h’ŭ tơpă, ơi Nguyễn Xuân Thắng hrŏm grup khua mua hyu mă bruă laih anun khua mua tơring čar Hà Tĩnh nao dưm guang bơnga, čuh ñang h’ŭ hơdor tơngia prong biă mă kơ Khua hơđăp git gai ping gah rơgŏm ơi Trần Phú hăng pran jua pơgôp prong mơ̆ng bruă hơkrŭ kơ lŏn ia yua Ping gah, djuai ania laih anun Mơnuih ƀôn sang ta.

Rơgŏm ơi Trần Phú lĕ khua git gai rơgơi, khin hơtai, sa čô tơhan tong ten, hơkrŭ kơ lŏn ia tơl abih tơlơi hơdip, tơgŭ blah ayăt, tuh drah pơčah asar kiăng rơngai lŏn ia, mơ-ai kơ dêh čar laih anun tơlơi hyuk hyak mơak klă kơ mơnuih ƀôn sang. Tlam lơ 16/4, ƀơi tơring čar Hà Tĩnh, Sang hră kơđi čar dêh čar djă anăn Hồ Chí Minh, Anom pơtô bruă ping gah dêh čar hăng Ping gah tơring čar Hà Tĩnh ăt ngă hrŏm jơnum bơkơtuai boh thâo ia rơgơi hăng akŏ ñu : “Khua git gai ping gah hơđăp, rơgŏm ơi Trần Phú-Sa čô tơhan ping gah tong ten, khin hơtai, jing ană tơčô ba akŏ hlâo mơ̆ng djuai ania Việt Nam”.